Уӕрӕсейы Федерацийы, Советон Цӕдисы ӕмӕ Уӕрӕсейы империйы бирӕ нацитӕ азымджын кӕнынц, ома нӕ размӕ никуы ауагътой, цагъайраджы цардӕй фӕцардыстӕм. Кӕцыдӕр нациты критикӕйӕн, ӕвæццæгæн, бындур дӕр ис, фӕлӕ сӕ фылдӕр та сты ӕддагон знӕгты пропагандӕйы фӕстиуӕгӕн. Бакӕсӕм ма ныры Украинӕйы цӕрджытӕм – сӕ мӕгуырдзинад ӕмӕ зындзинӕдты иууылдӕр Уӕрӕсейы аххосджын кӕнынц. Афтӕмӕй та Украинӕйы цӕрджыты фылдӕр хай этникон уырыссӕгтӕ сты ӕмӕ сӕ бӕстӕ та Ленины ӕрымысгӕ у. Ома сæ нацийыл, се ‘мтуг адæмыл, сæ Фыдыбæстæйыл сæ къух систой æмæ ныр сæхи бæсты искæйы азымы дарынц.
Кӕд ӕмӕ бирӕ этностӕ ӕфхӕрд ӕрцыдысты Уӕрӕсейы империйы ӕмӕ уый фӕстиуæгæн кӕцыдӕртӕ уӕвынад дӕр нал кӕнынц, уӕддӕр ӕххуыс дӕр бирӕтӕн бакодта. Ӕрмӕст ирæтты кой куы кӕнӕм, уӕд нӕ, ӕвӕццӕгӕн, дыууæсӕдӕ азы размӕ Османы импери ӕд Гуырдзыстон «аныхъуырдтаид». Чизоны исчи ахъуыды кӕна, ома нын туркӕгтимӕ хуыздӕр цард уыдаид. Фӕлӕ ма бакӕсӕм Туркы цӕрӕг чысылнымӕц нацитӕм, кӕддӕра сын бирӕ бартӕ ис. Зӕгъӕм, курдты адӕмыхаттӕй дзы цӕры 14 миллуан адӕймаджы бӕрц, фӕлӕ сын автономи дӕр нӕ дӕттынц. Ӕгӕрыстӕмӕй сӕ се ‘взагыл дзурын ӕмӕ сӕ традицион ӕгъдӕуттӕ ӕххӕст кӕнын дӕр нӕ уагътой ӕрӕджыйы онг. Уӕрӕсейы Федераци чысыл нацитӕн цахӕм бартӕ дӕтты национ традицитӕ ӕмӕ ӕгъдӕуттӕ бахъахъхъӕныны тыххӕй, уыйбӕрц абоны бон иунӕг хъомысджын паддзахад дӕр нӕ дӕтты.
Нӕ историйы ӕрымысинаг факт-тӕ бирӕ ис, кӕцытӕ баст сты нӕ адӕмы трагикон цаутимӕ. Уӕрӕсе нӕ рохуаты бирӕ хӕттыты фӕуагъта, фӕсайдта-иу нӕ, кӕйдӕр мӕнг ныхӕсты фӕстиуӕгӕн-иу нӕм ӕрбабырста. Уыцы ӕфсӕддон экспедицитӕ Симонович, Абхазов, Ренненкампф, Васильев, Андронников ӕмӕ ӕндӕрты сӕргълӕудӕй бабын кодтой дӕсгай хъӕутӕ, амардтой мингай адӕмы, Сыбырмӕ фервыстой мингай ирӕтты. Афтӕмӕй та ирон наци алыхатт дӕр Уӕрӕсеимӕ уыд, сӕ зындзинӕдты рӕстӕджы сын ӕххуыс кодта ӕмӕ-иу хӕстон дуджы та нӕ равзаргӕтӕ хӕсты цӕхӕры уыдысты, Уӕрӕсейы империйы интерестӕ хъахъхъӕдтой. Фӕлӕ цард мӕнгард у, Уӕрӕсейы ӕфсӕдты хицӕуттӕй дӕр æнæкомпетентонтӕ дзӕвгар уыд ӕмӕ-иу баууӕндыдысты мачабелиты лӕгхорты ӕмӕ ӕндӕр ахӕмты ныхӕстыл.
Иумийагӕй сисгӕйӕ, Уӕрӕсе ирӕттӕн ӕххуыс дӕр бирӕ бакодта. Нӕ алыварс сыхаг нацитӕй нӕм иу дӕр хорз цӕстӕй никуы каст ӕмӕ нын Уӕрӕсе куы нӕ уыдаид ӕдасдзинады гарант, уӕд бирӕйы фаг не скуымдтаиккам семӕ тох кӕнгӕйӕ. Ӕрмӕст гуырдзиӕгтӕ нын иу ӕнусы дыууӕ хатты геноцид сарӕзтой. Уымӕ гӕсгӕ махӕн ӕндӕр гӕнӕн нӕй, нӕ зӕрдӕ хъуамӕ Уӕрӕсейыл дарӕм.
Уæрæсе ма цы адæмты нæ бауагъта куынæг кæнын
Монголтӕ
Монголтӕ уыдысты хъомысджын хӕстон наци ӕмӕ кодтой цӕугӕ цард. Чингисханы фӕстӕ сӕ импери ныддихтӕ, цы зӕххытӕ бацахстой, уым сыл бынӕттон знӕмтӕ тых кӕнын райдыдтой ӕмӕ рӕстӕг куыд цыд, афтӕ ассимиляци кодтой. 17 ӕнусы кӕрон Монголийы фылдӕр хай, ома сӕ рагфыдӕлты зӕххытӕ, бахаудтой Китайы скондмӕ ӕмӕ ӕрмӕстдӕр 20-ӕм ӕнусы райдианы тыхамӕлттӕй ссӕрибар сты цагъайраджы цардӕй. Уый фӕстӕ се ‘ргом раздӕхтой Уӕрӕсейы империмӕ ӕмӕ сӕм бахатыдысты, цӕмӕй сӕ бахъахъхъӕной ӕддагон знӕгтӕй. Уӕрӕсейы империйӕн рагӕй фӕстӕмӕ Китаимӕ уӕззау ахас-тытӕ уыд, нӕ фидыдтой, ӕмӕ уымӕ гӕсгӕ разы уыдысты монголты сӕрыл рахӕцыныл. Афтӕмӕй Уӕрӕсе ӕмӕ Китайӕн Монголийы территори ссис буферон зонӕ. Ки-тай нӕ разы кодта ахӕм вариантыл ӕмӕ 1920 азы ныббырста Монголимӕ. Фӕлӕ урсгвардионты фӕрцы монголтӕ фӕсырдтой се знӕгты. 1930 азы та Япон ӕрхъавыд Монголийы территори бацахсынмӕ, фӕлӕ та сӕ Сырх Æфсад басаста.
Факттӕм ӕркӕсгӕйӕ Монголи абоны бон хӕдбар паддзахады ном хӕссы Уӕрӕсейы фӕрцы. Ӕвӕццӕгӕн Китайы сконды куы баззадаиккой, уӕд цалдӕр ӕнусмӕ сасси-миляци уыдаиккой ӕмӕ сӕ наци фесӕфтаид.
Сомихӕгтӕ
Сомигӕтӕ нымад сты рагон чырыстон нацийыл ӕмӕ сын уыд стыр ахадындзинад антикон ӕмӕ астӕуккаг æнусыккон историйы. Зынгӕ æфсæддон ӕмӕ паддзахадон архайджытӕ дзӕвгар уыд сомихаг нацийы минӕвӕрттӕй. Сӕ историйы сын цалдӕр хатты уыд хъомысджын паддзахад, фӕлӕ-иу сӕхицӕй тыхджындӕрты амӕттаг баисты. Абоны бон сӕ рагфыдӕлты зӕххытӕ фесӕфтой, байстой сын сӕ пысылмон диныл хӕст адӕмтӕ ӕмӕ сӕхӕдӕг та ныппырхытӕ сты ӕгас дунейыл. Хӕрзӕрӕджы ма сыл ӕрцыд ноджы иу трагеди – фесӕфтой та сӕ рагфыдӕлты зӕххытӕй ноджы – Хӕххон Хъарабахы.
Абоны бон Сомихыстон уӕвынад кӕны Уӕрӕсейы империйы фӕрцы. Туркӕгтӕ ӕмӕ персӕгтӕ хъомысджын уыдысты ӕмӕ сомихӕгты куынӕг кодтой, сырдтой сӕ сӕ зӕххытӕй. Уӕрӕсейы импери милуангай сомихаг лигъдӕтты йӕ дӕлбазыр бакодта ӕмӕ сын ныры Сомихыстоны территорийыл хицӕн губерни сарӕзта. Афтӕмӕй бахъахъхъӕдтой сӕ наци, сӕ традицитӕ, сӕ культурӕ. Ӕнӕ уӕрӕсейӕгты ӕххуысӕй цалдӕр ӕнус-мӕ куынӕг ӕрцыдаиккой ӕмӕ дзы удӕгас чи баззадаид, уыдон та ас-симиляци ӕрцыдаиккой. Фӕстӕдӕр Советон Цӕдисы скондӕй рахызтысты хӕдбар паддзахадӕй, фӕлӕ йӕ рӕстӕг куыд равдыста, афтӕмӕй ницы бузныг фесты Уӕрӕсейӕ.
Грекъӕгтӕ
Дунейы зонадӕн иууыл фылдӕр лӕггӕдтӕ чи бакодта, уыдонӕй иу у грекъаг наци. Схонӕн сӕ ис легендарон адӕмыхатт дӕр, уымӕн ӕмӕ се ‘хсӕнӕй рацыдысты зынгӕ философтӕ, ахуыргӕндтӕ, аивады курдиатджын гоймӕгтӕ, паддзахадон архайджытӕ. Рагзаманты сӕ паддзахады территоритӕ хӕццӕ кодтой Гибралтарӕй Кавказмӕ ӕмӕ йе ‘взаг та нымад уыд ӕхсӕнадӕмоныл, абон англисаг ӕвзаг куыд у, афтӕ.
Рӕстӕг ӕппынӕдзух ивы ӕмӕ грекъæгтӕн фӕзынд тыхджын ныхмӕлӕууӕг – Ромаг импери. Састы бынаты баззадысты грекъӕгтӕ ӕмӕ сын сӕ зӕххытӕн схицӕуттӕ сты ӕндӕр адӕмтӕ. 15-ӕм ӕнусы грекъӕгты рагфыдӕлты зӕххыты фылдӕр хай баисты хъомысджын Османы империйы. Туркӕгтӕ скуынӕг кодтаиккой грекъаг нацийы, фӕлӕ сӕм ӕххуысмӕ фӕзындысты се ‘мдин Уӕрӕсейы импери. 1821-1829 азты уӕззау тохты фӕстиуӕгӕн Греци ссис хӕдбар паддзахад. Фӕстӕдӕр Уӕрӕсейы импери, стӕй та Советон Цӕдис ӕппынӕдзух хъахъхъӕдта Грецийы ӕддагон знӕгтӕй, кодта сын ӕфсӕддон ӕххуыс, дӕтта сын финанстӕ аслам кредитты хуызы. Ныры цаутыл афӕлгӕсгӕйæ грекъӕгтӕ ферох кодтой ӕппӕт уыцы лӕггӕдтӕ.
Дзуттӕгтӕ
Ацы нацийы курдиатджын минӕвӕртты ранымайынӕн нын ӕнӕхъӕн уац дӕр не сфаг уыдзӕн. Дзуттӕгтӕн ахӕм егъау ӕндӕвдад ис адӕмты историйыл рагфыдӕлтӕй фӕстӕмӕ, ӕмӕ сӕ бирӕтӕ ӕнхъӕлынц, ома ӕгас дунейыл хицауиуӕг кӕнынц. Сӕ историйы сын ахӕм рæстæджытæ уыд ӕмӕ-иу сӕ скуынӕгмӕ бирӕ нал хъуыд. Рагфыдӕлты сӕ ныддӕрӕн кодта Ромаг импери ӕмӕ уый фӕстиуӕгӕн лидзинаг фесты Ӕввахс Хурыскӕсӕнӕй. Егъау диаспоратӕ сарӕзтой Африкӕйы, Азийы, Европӕйы, Америкӕйы.
Дзуттӕгты скуынӕг кӕныны план сног кодтой немыцаг фашисттӕ ӕмӕ Советон Цӕдис куы нӕ уыдаид, уӕд сын ӕнтысгӕ дӕр бакодтаид. Абоны бон ныгуылӕн бӕстӕты ахуыргӕнӕн чингуыты нал фыссынц, гитлеронты Сырх Æфсад кӕй ныддӕрӕн кодта ӕмӕ уый фӕрцы дзуттаг наци кӕронмӕ куынӕг кӕй не ‘рцыд. Ӕмӕ ӕрмӕст дзуттӕгты нӕ фервӕзын кодта Сырх Æфсад, фӕлӕ ма цыгайнӕгты, славянаг адӕмты ӕмӕ ӕндӕрты.
Гуырдзиӕгтӕ
Ацы адӕмыхаттӕн грекъӕгтимӕ ӕмӕ дзуттӕгтимӕ абарӕн нӕй, бирӕ къаддӕр масштабы нацисты. Тыхджын паддзахад сын уыд успаддзах Тамары рӕстӕджы. Уыцы паддзахад кӕй фӕрцы уӕвынад кодта, уый дӕр зындгонд у, фӕлӕ уыцы историон факттӕ барӕй не ‘ргом кӕнынц. Астӕуккагæнусы Гуырдзыстоны территоримӕ бырсын райдыдтой пысылмӕттӕ ӕмӕ сӕ паддзахад пырх кӕнын райдыдта, сӕ территоритӕ сын истой, сӕ адӕм та ассимиляци кодтой тыхджындӕрты ‘хсӕн. Ӕмӕ та ам дӕр уыдонмæ ӕххуысмӕ фӕзынд се ‘мдин бӕстӕ – Уӕрӕсейы импери – бахызтой сӕ скуынӕгӕй. 19-ӕм ӕнусы райдианы гуырдзиаг паддзах Георгий XII бахатыд Уӕрӕсемӕ, цӕмӕй сӕ се скондмӕ айсой.
Уӕрӕсейы империйы сконды уӕвгӕйӕ, гуырдзиӕгтӕ бахъахъхъӕдтой сӕ наци, традицитӕ, культурӕ, кӕд ӕмӕ абоны бон гуырдзиӕгтӕ афтӕ дзурынц, ома оккупацийы цардыстӕм ӕмӕ ма нын ассимиляци сарӕзтой, уӕддӕр. Уӕрӕсейы скондмӕ бахизгӕйӕ, сӕ цӕрджыты нымӕц уыд 370 мины бӕрц ӕмӕ 20-ӕм ӕнусы райдианы та сӕ нымӕц схӕццӕ 1 500 000 адӕймагмӕ. Уымӕй уӕлдай ма ӕнӕнхъӕлӕджы сӕ территоритӕ дӕр фӕуӕрӕхдӕр сты Хуссар Ирыстон, Абхаз ӕмӕ Ачъарайы фӕрцы. Цин хъуамӕ кӕниккой ахӕм лӕггӕдты фӕстӕ гуырдзиӕгтӕ, фӕлӕ сӕ цӕст хуымӕтӕджы «бузныг» зӕгъын дӕр никуы бауарзта.
ДЖИОТЫ Алыксандр
