Республикæ Хуссар Ирыстоны Культурæйы министрады цур хореографион скъола-студийы ацы аз сæ ахуыр фæуд кæнынц 26 адæймаджы æмæ уыдонæй цыппар рауагъдоны хореографион аивады хаххыл сæ ахуыр адарддæр кæндзысты Уæрæсейы уæлдæр ахуыргæнæндæтты. Уый тыххæй журналисттæн фехъусын кодта нæ республикæйы Культурæйы министр Зæгъойты Рада.
Уый ма куыд банысан кодта, афтæмæй хореографион скъола-студийы рауагъдонтæй дыууæйæ та райсдзысты Галаты Барисы номыл кафт æмæ зарды паддзахадон ансамбль «Симд»-мæ.
«Хореографион скъола-студийы рауагъдонтæй цыппарæй хореографион аивад кæй равзæрстой æмæ йæ дарддæр кæй кæндзысты, уыцы хъуыддаг мæнæн уыдис иууыл æхсызгондæр. Дыууæйæ фæлварæнтæ дæтдзысты Уæрæсейы Федерацийы уæлдæр ахуыргæнæндæттæм, иннæ дыууæ та равзæрстой Цæгат Ирыстон-Аланийы аивæдты ахуыргæнæндон», – загъта Зæгъойты чызг.
Культурæйы министр ма банысан кодта, зæгъгæ, национ хореографи у культурæйы хъæздыг бынтæй сæ иу, кæцы цыдис фæлтæрæй фæлтæрмæ.
«Абон мах кæд дзурæм паддзахадон ансамбль «Симд»-ы рæзтыл, уæд уый, фыццаджыдæр, баст у кадртæ бацæттæ кæныны хъуыддагимæ. Хореографион скъола-студийы архайд æмæ йæ фыццаг хæс дæр ууыл баст у», – банысан кодта министр.
Зæгъойты Радайы ныхæстæм гæсгæ хореографион скъола-студийæн ис æн-тыстытæ республикæйæн æддейæ æмæ йын йæ архайдæй сты райгонд.
«Фæстаг рæстæджы, Четион Майæйы коллектив сæ куыст скъола-студийы агъуысты бын куы райдыдтой кæнын, уæдæй фæстæмæ сын ис æнтыстытæ. Самарайы цы концерт радтой, уый сын ацыдис æнтыстджынæй. Коллектив ивгъуыд аз уыдысты Артекы дæр æмæ уым иттæг хорз равдыстой ирон национ культурæ. Æрæджы та æрæздæхтысты Сочæйæ Гран-приимæ, афтæ ма фыццаг æмæ дыккаг къæхæнты дипломтимæ. Кæстæр къорд та нæм æрхастой дыккаг къæпхæны диплом. Уыдон фыццаг хатт хайад райстой ахæм фестивалы», – загъта министр.
