Паддзахадон телерадиокомпани «Ир»-ыл 30 азы кæй сæххæст, уый тыххæй Президент Гаглойты Алан паддзахадон хорзæхтæй схорзæхджын кодта, ПТРК «Ир»-ы кусджытæй чи фесгуыхт, уыдоны. Коллективæн загъта арфæйы ныхæстæ æмæ, сæ профессионалондзинад, сæ активон æмбæстагон позици æмæ Хуссар Ирыстоны æрцæугæ цауты объективонæй адæммæ кæй хæццæ кæнынц, уый тыххæй.
Бузныджы ныхæстæ загъта æмæ уæлдай арфæтæ ракодта, уæззау уавæрты телеканалæн бындур чи æрæвæрдта, уыдонæн дæр.
«Абоны дунейы бирæ æнæрæстагон информаци ис, фæлæ нæ адæм кæддæриддæр фенхъæлмæ кæсынц ПТРК «Ир»-ы» ног хабæрттæм, уымæн æмæ сымах рæстагон информаци дæттут», – банысан кодта Президент Гаглойты Алан.
«Республикæ Хуссар Ирыстоны сгуыхт экономист»-ы кадджын ном Президент радта Гобозты Татьянæйæн, бирæ азты дæргъы финансон-экономикон хайады æнтыстджын куысты тыххæй. Цалдæр адæймаджы та райстой Кады грамотæтæ.
Информаци æмæ мыхуыры комитеты сæрдар Хъотайты Мария дæр банысан кодта, телеуынынад цы уæззау уавæрты фæкуыста, уый.
«Уæд адæм иууылдæр кæрæдзиимæ æнгом уыдысты. Телеканалы кусджытæ дзæвгар рæстæг, уæлдайдæр уæззау азты къапеччытыл фæкуыстой патриотизмы, Райгуырæн бæстæмæ уарзондзинады æнкъарæнтимæ», – загъта комитеты сæрдар. Банысан кодта, иннæ информацион фæрæзтæй телеуынынады куыст уæззаудæр кæй у, куыстыты сæйраг фронт фæскадр кæй аззайы, уый дæр.
Мария раарфæ кодта телеканалы коллективæн. Сабырдзинады, æнтыстыты æмæ позитивон хабæрттæ хъусын кæныны фæндиæгтæ сын йæ зæрдæ бауарзта.
Коллективы номæй паддзахады сæргълæууæгæн бузныджы ныхæстæ загъта паддзахадон телерадиокомпанийы директор Хъазиты Хатуна, йе ‘ппæтварсон æххуысы æмæ сæ проблемæтæм æдзух хъусдарды тыххæй.
***
17 мартъийы Цæрæнуатон-коммуналон хæдзарады кусджыты профессионалон бæрæгбон кæй у, уый тыххæй сын раарфæ кодта Президент Гаглойты Алан.
«Сымахæн уæ разы стыр хæстæ ис. Æппæт тыхтæй архайут, цæмæй Хуссар Ирыстоны горæттæ æмæ районты паркты, скверты, уынгты фæтк уа, уый тыххæй. Уый стыр хъуыддаг у. Махæй алчи дæр уыны, уæ тыхтæ уæ куыстæн кæй не ‘вгъау кæнут æмæ сæ уæ профессийæн кæй дæттут, уый», – банысан кодта бæстæйы сæргълæууæг æмæ сын загъта æнæниздзинад, хæрзиуджытæ, фæрныгад æмæ сæ куыстæй сæ зæрдæ цы райа, ахæм фæндиæгтæ.
Сæ куысты чи фесгуыхт æмæ бирæ азты æнтыстджын куыст чи кæны, цæрæнуатон-коммуналон хæдзарады уыцы кусджыты Президент схорзæхджын кодта Кады нысаны, Кады грамотатæ, майдантæ æмæ РХИ-йы Президенты бузныджы фыстæджытæй.
Нæ уацх.
