Мемориалон фæйнæг Хуссар Ирыстоны УФ-йы минæварады æххуысæй
Нæ республикæйы 3-æм астæуккаг скъола нымад цæуы иууыл рагондæр скъолатæй сæ иуыл. Ам Стыр Фыдыбæстæйон хæсты рæстæджы рæстæгмæ сарæзтой эвакуацион госпитал №1960 æмæ-иу мингай цæф салдаттæн медицинон æххуыс бакодтой ирон медиктæ. Абон нæ бæстæйы кæстæр фæлтæрæй бирæтæ, æвæццæгæн, зонгæ дæр нæ кæнынц, кæддæр Цхинвалы, уæды Сталиниры госпиталтæ кæй уыд æмæ адæм æмхуызонæй кæй æххуыс кодтой цæф хæстонтæн. Рæстæг цæуы æмæ цæмæй истори ма рох кæна, цæмæй фидæны фæлтæртæй рохуаты ма уа Стыр Фыдыбæстæйон хæст, уый тыххæй абон арæзт цæуынц сæрмагонд мадзæлттæ.
Цытджын мадзалы хайад райстой нæ республикæйы Хицауады Сæрдар Джуссойты Константин æмæ РХИ-йы Парламенты сæрдар Æлборты Алан, нæ республикæйы министрадтæ æмæ ведомствоты сæргълæуджытæ, афтæ ма Хуссар Ирыстоны Уæрæсейы Федерацийы æххæстбарджын минæвар Марат Кулахметов æмæ УФ-йы Æдасдзинады федералон службæйы Арæнгæрон управленийы службæгæнджытæ. Мемориалон фæйнæг бакæныны мадзалы хайад райстой 3-æм астæуккаг скъолайы ахуыргæнджытæ æмæ ахуыргæнинæгтæ.
Айзæлдысты Уæрæсейы Федерацийы Гимны зæлтæ. Мадзалы банысангонд æрцыд ирон адæмы хайбавæрд Уæлахизы хъуыддагмæ, афтæ ма фæсчъылдымы фæллойгæнджыты æххуыс дæр къаддæр кæй нæ уыдис, уый.
«Ацы эвакуацион госпиталы Стыр Фыдыбæстæйон хæсты рæстæджы хос кодтой Сырх Æфсады афицертæ æмæ салдаттæн. Иууыл иумæ госпиталы медицинон æххуыс бакодтой иу æхсæз мин адæймагæн. Уый тынг бирæ у. Мах Хуссар Ирыстоны ветерантимæ куы ‘мбæлдыстæм, уæд-иу нын æрымысыдысты госпиталь дæр. Уыдон дзырдтой, зæгъгæ, тынг зын уыдис уæззау цæфты зындзинæдтæм кæсын, дзырдтой нын ирон адæм иузæрдион æххуыс куыд кодтой госпиталæн, рынчынтæн. Хуымæтæг адæм горæтæй æмæ хъæутæй хастой госпиталы рынчынтæн сæ къухты цы уыдис, уый – хæлцадон продукттæ, ирон уæливыхтæ, ‘хсадтой сын сæ уæлæдарæс. Ам банысан кæнын хъæуы уый æмæ уæд рынчынтæн кæй æххуыс кодтой бынтон æвзонг медицинон хотæ. Уыцы нывтæ цæстыты раз куы растынц, зæрдыл куы æрлæууынц, уæд, адæймаг кæд дæриддæр ахъуыды кæны, зæгъгæ, иууылдæр куыд зæрдиагæй æххуыс кодтой хæстонтæн, зæгъгæ», – радзырдта Марат Кулахметов.
Уый ма йæ раныхасы банысан кодта, зæгъгæ, ахæм цаутæн адæмы хъайтардзинад, уыцы дуг æмæ историйæн рохгæнæн нæй. Уæлдайдæр та госпиталы рынчынты чи дзæбæх кодта æмæ сæ сæ къæхтыл чи лæууын кодта, уыдоны хъайтардзинад. «Уæд госпиталы чи куыста, уыцы медиктæн сæ 80 проценты уыдысты Хуссар Ирыстоны цæрджытæ. Ныфс мæ ис, скъолайы патриотикон æмæ иузæрдион куысты руаджы фидæны номгай кæй сбæрæг кæндзысты госпиталы чи куыста, уыдоны нæмттæ. Хъыгагæн, абон бирæтæ не ‘хсæн нал сты, фæлæ сæ ном ссарын у ахсджиаг хъуыддаг махæн. Уый тыххæй абон байгом кодтам ацы мемориалон фæйнæг дæр», – банысан кодта Хуссар Ирыстоны УФ-йы Æххæстбарджын минæвар. Уый фæстæ 3-æм астæуккаг скъолайы директор Бестауты Мадинæйæн бар радтой æмæ байгом кодта мемориалон фæйнæг.
Скъолайы ахуыргæнинæгтæ аив бакастысты хæсты те-мæйыл æмдзæвгæтæ, Стыр Уæлахизы цытæн азарыдысты цалдæр зарæджы. Æфсæддон музыкæйы зæлтæм мадзалы хайадисджытæ мемориалон фæйнæджы цур сæвæрдтой венок æмæ дидинджытæ.
ЦХУЫРБАТЫ Ларисæ
