Гуырдзыстоны ӕдасдзинады службӕйы кусджытӕ контртеррористон мадзӕлттӕ ауадзыны фӕстиуӕгӕн 5 февралы Тифлисы баурӕдтой автомашинӕ, кӕцыйы ӕмбӕхст уыд халӕнхос «С-4». Йӕ уӕз уыд 14 килограммы бӕрц ӕмӕ йӕ ӕвӕргӕ та бакодтой электромобилы аккумуляторты хуылфы. Ӕдӕппӕт уыдысты ӕхсӕз рӕмудзӕн хайы детонатортимӕ ӕмӕ электронон таймертимӕ, кӕцыты, ӕгӕрыстӕмӕй, активацийы рӕстӕг дӕр ӕвӕрд уыд. Ӕфсӕддон эксперттӕ куыд ӕмбарын кӕнынц, афтӕмӕй ахӕм вазыгджын куыст бакодтаид ӕрмӕстдӕр бӕрзонд ӕмвӕзады специалист. «С-4» тынг тӕссаг рӕмудзӕн ӕрмӕг у, йӕ разиан кӕныны радиус тротилӕй у бирӕ фылдӕр. Ацы автомашинӕйы хицау у Украинӕйы ӕмбӕстаг ӕмӕ хъавыд Уӕрӕсейы территоримӕ ахизынмӕ, бӕлвырддӕрӕй та – горӕт Воронежмӕ.
Спецслужбӕйы кусджытӕ слестгӕнӕн мадзӕлттӕ ауадзыны фӕстиуӕгӕн куыд рабӕрӕг кодтой, афтӕмӕй террористты автомашинӕ Гуырдзыстоны территоримӕ ӕрбахызт 19 январы гуырдзиаг-туркаг контролон-уадзӕн пункт «Сарпи»-йыл. Автомашинӕ рацыд Украинӕйӕ, горӕт Одессӕйæ, ахызт Румыны арӕнтыл Болгаримӕ, стӕй уырдыгӕй та – Туркмӕ. Халӕнхос ластой Уӕрӕсемӕ теракт саразыны нысанӕн. Террористтӕ хӕдтулӕгӕн барӕй равзӕрстой электромобиль, цӕмӕй халӕнхос бамбӕхстаиккой сӕрмагонд аккумуляторты хуылфы, ома сӕ уым ничи ссарддзӕн, ӕрмӕстдӕр сӕ кӕд лыг акӕнай.
Куыд ма рабӕрӕг, афтӕмӕй халӕнхос ӕнӕхъӕнӕй хъуамӕ ахызтаид гуырдзиаг-уӕрӕсейаг арӕнтыл, фӕлӕ террористтӕ цӕмӕдӕр гӕсгӕ сӕ фӕнд фӕивтой ӕмӕ сын се ‘рдӕг Тбилисы райстой. Чидæртæ афтӕ хъуыды кæнынц, зæгъгæ, террористтӕ Тбилисы дӕр фӕнд кодтой теракт саразын, цӕмӕй йӕ Уӕрӕсейы ‘фсон фӕкодтаиккой ӕмӕ гуырдзиаг- уӕрӕсейаг ӕмахастытӕ февзӕрдӕр уыдаиккой.
Ацы хъуыддаг саразыныл архайдтой авд гуырдзиаг ӕмбӕстаджы, ӕртӕйæ уыдысты украинӕгтӕ, ӕртӕ та – сомихӕгтӕ. Операцийы цыд контроль кодта украинаг ӕмбӕстаг Андрей Шарашидзе. Уый райгуырд Батумы ӕмӕ фӕстӕдӕр цӕрынмӕ ацыд Украинӕмӕ. Слестгӕнджытӕ куыд ӕмбарын кӕнынц, афтӕмӕй террористтӕн ӕххуысгӕнджытӕ сæхæдæг бӕлвырдӕй нӕ зыдтой, автомашинӕйы рӕмудзӕн ӕрмӕджытӕ кæй ис, уый. Ӕнхъӕл уыдысты, ома дзы уыдзӕн исты контрабандон товар кӕнӕ наркотиктӕ.
Андрей Шарашидзе 2020 азы ӕвзӕрстыты Украинӕйы хъавыд депутат суӕвынмӕ. Уыд кандидатӕй хаст Владимир Зеленскийы парти «Слуга народа»-йӕ, фӕлӕ фаг хъӕлӕстӕ нӕ райста. Уымӕй размӕ та кодта бизнесы куыст Уӕрӕсейы – уыд ӕргом акционерон ӕхсӕнад «Палатин»-ы сӕргълӕууӕг, ӕмӕ кодта базарады куыст, уагъта ӕмӕ уӕй кодта соктӕ, цайтӕ ӕмӕ кофе. 2019 азы хъалонисӕн органтӕ ацы организацийы куысты сбӕлвырд кодтой цухдзинӕдтӕ ӕмӕ фӕлывдмитӕ, ӕмӕ йӕ сӕхгӕнын код-той.
Цауы фӕстæ Гуырдзыстоны барадхъахъхъӕнӕг органтӕ бакодтой уголовон хъуыддаг теракт саразынмӕ цӕттӕгӕнӕн куыстытӕ кӕныны фӕдыл. Уӕрӕсейы федералон ӕдасдзинады службӕ куыд хъусын кӕны, афтӕмӕй Гуырдзыстоны территорийӕ украинаг террористтӕ фыццаг хатт нӕ пайда кӕнынц Уӕрӕсейы ныхмӕ. 2023 азы ма сбӕлвырд кодтой, Болгарийӕ Уӕрӕсемӕ контрабандӕйы хуызы кӕй ластой рӕмудзӕн ӕрмӕджытӕ. Халӕнхос-иу бавӕрдтой хуымӕтӕджы электроплитайы ӕмӕ-иу ӕй ахӕм хуызы Уӕрӕсемӕ арвыстой. Контрабандон товарты иу хай транзитӕй цыд Гуырдзыстоны уылты.
Гуырдзыстоны паддзахадон ӕдасдзинады службӕ ӕнхъӕлмӕ кӕсы дзуаппмӕ Украинӕйӕ. Фӕлӕ сын цы хъуамӕ сдзуапп кӕной Украинӕйы ныры разамынад, кӕд ӕмӕ сӕхӕдӕг дӕр террористтӕй ницӕмӕй хицӕн кӕнынц. Гуырдзыстон ацы цауы фӕстӕ йӕ арӕнтыл контроль фӕтыхджындӕр кодта.
Гуырдзиаг спецслужбӕтӕ развӕлгъау кӕй базыдтой терактмӕ цӕттӕгӕнӕн куыстытӕ ӕмӕ ма йӕ кӕй раргом кодтой, уый хуымӕтӕджы нӕу. Ныгуылӕн бӕстӕтӕ рагӕй архайынц, цӕмӕй гуырдзиӕгтӕ ӕрбакӕной дыккаг фронт Уӕрӕсейы ныхмӕ. Фӕлӕ Гуырдзыстоны къухдариуӕгад нӕ разы кӕны украинӕгтау ныгуылӕн бӕстӕты политикон интересты тыххӕй сӕ адӕмы ныццӕгъдыныл. Кӕд ӕмӕ сыл егъау ӕндӕвдад ис, «къуыммӕ» сӕ баскъӕрдтой ӕмӕ сын тыххӕй аразын кӕнынц алыгъуызон фыдмитæ Уӕрӕсейы ныхмӕ, уӕддӕр сӕм нырма ныхмӕ фӕлӕууыны хъару ис. Фӕззӕджы сӕм уыдзысты парламентон ӕвзӕрстытӕ ӕмӕ тӕссаг у провокацитӕй, ӕгӕрыстӕмӕй, теракттӕй дӕр. Провокацитӕн ӕмӕ теракттӕн та сӕ нысан у адӕмы фӕтӕрсын кӕнын ӕмӕ ӕхсӕнад схӕццӕ кӕнын, ома, хаос саразын. Ӕмӕ хаосы ӕнтыстджынӕй архайыны хъуыддаджы та ныгуылӕн бӕстӕтӕн ӕмбал нӕй.
Джиоты Алыксандр
