Программæ «Будущее России»-ы фæлгæтты Дзæуджыхъæуы уагъд æрцыд тæхæг аппаратты космикон конструктор Къомайты Русланы номарæн турнир стъолы теннисæй. Ерысты хорз бæрæггæнæнтæ равдыстой хуссарирыстойнаг æвзонг теннисиситтæ. 12 азы онг кæуыл цæуы, уыцы спортсменкæты ‘хсæн фыццаг бынат бацахста Лалыты Азæ, дыккаг ссис Габуты Илонæ. Æмæ æртыккаг бынатыл та ацыд Хъуылымбегты Виктория. 18 азы онг кæуыл цæуы, уыцы спортсменкæты ‘хсæн æвзист майдан рамбылдта Майя Касрадзе, бронзæйон призер та ссис Къуылыхты Заринæ. «Уæлахизмæ тырнындзинад»-ы призтæй хорзæхджын æрцыдысты Тедеты Алинæ, Цхуырбаты Иринæ, Бæззаты Константин æмæ ерысты иууыл кæстæр хайадисæг Бететы Алыксандр.
Армрестлинг
Хуссарирыстойнаг спортсмен Хæбæлаты Арсен ссис армрестлингæй Уæрæсейы чемпионаты бронзæйон призер. Ерыстæ уагъд цыдысты горæт Орелы. Арсенæн ахæм æнтыст йæ къухты бафтыд 80 кг уæзы категорийы архайгæйæ.
Волейбол
Дзауы поселочы кæронмæ бахæццæ Дзауы районы гом турнир волейболæй. Ерысты хайад райстой 6 командæйы. Турниры иууыл хуыздæр цæттæдзинад равдыста 5-æм астæуккаг скъолайы командæ æмæ ссис турниры уæлахиздзау. Дыккаг бынат бацахста 2-æм астæуккаг скъолайы командæ. Æртыккаг бынатыл та ацыдысты 1-æм скъолайы ахуырдзаутæ.
«Ацы аз сфæнд кодтам Цхинвалæй æртæ командæйы фæхонын. Уыцы хабар бандæвта ерысты цымыдисдзинадыл. Иннæ аз фæнд кæнæм турнирмæ скъолаты иууылдæр фæхонын», – фехъусын кодта Дзауы районы администрацийы спорты хайады сæргълæууæг Джиоты Алик.
ХУРИТЫ Батрадз
