Ӕрӕджы Никол Пашинян комкоммӕ эфиры дзуапп лæвæрдта ӕмбӕстӕгты фарстатӕн. Иу хайадисӕг ӕй афарста, зæгъгæ, Абхаз ӕмӕ Хуссар Ирыстоны территоритӕ Сомих оккупацигондыл нымайы Уӕрӕсейы ‘рдыгӕй? «Сомих стыр аргъ кӕны Гуырдзыстоны иудзинадӕн, йӕ территориалон ӕнӕхъӕндзинадӕн ӕмӕ йӕ хæдбардзинадӕн – уыдис Пашиняны дзуапп. Бирӕты зӕрдӕмӕ нӕ фӕцыд, чидӕртӕ та «арвы цӕфау фесты», фӕлӕ дис кӕнын нӕ хъӕуы. Пашинян у Ныгуылӕн бӕстӕты «ӕвӕрд» адӕймаг ӕмӕ йын цахӕм инструкцитӕ радтой, уыдонмӕ гӕсгӕ кусы. Соросы организацийы уыйбӕрц азты дӕргъы ӕнӕхъуаджы «фӕахуыр» кодта?
Фыццаджыдӕр Пашинян ауӕй кодта карабахаг сомихӕгты. Нырма сын ныфсытӕ февӕрдта, ныццыд сӕм, алыгъуызон «аргъӕуттӕ» сын фӕдзырдта ӕмӕ ма семӕ кафгӕ дӕр фӕкодта. Карабахаг сомихӕгтӕ ахъуыды кодтой, зӕгъгӕ нын ныр тас нал у. Фӕлӕ ӕнӕнхъӕл фесты. Райдыдтой хӕстон архӕйдтытӕ ӕмӕ Пашинян, страус змисы йӕ сӕр куыд атъыссы, афтӕ йӕхи бааууон кодта. Сӕ рагфыдӕлты зӕххытӕй лидзинаг фесты сӕдӕ мин адӕймагӕй фылдӕр. Фӕлӕ диссаг! Пашинян дарддӕр премьерæй баззад. Ӕндӕр уавӕрты, ӕвӕццӕгӕн, Пашиняны хуызӕн уӕйгӕнӕджы уӕхстыл сфизонӕг кодтаиккой. Дуг аивта æви сомихӕгтӕ раздӕрау сӕрӕн нал сты, уый зын зæгъæн у.
Пашинян уыдæтты фæстæ йæ бынаты кæй баззад, уымӕн ис бӕрӕг аххосӕгтӕ. Фыццаджыдæр Ныгуылӕн бӕстӕтӕ арф уидӕгтӕ ауагътой Сомихы, контроль кӕнынц ӕппӕт политикон процесстӕ. Дыккаг та уый ӕмӕ Сомихы элитӕты сбирӕ сты уӕйгӕнджытӕ. Сайынц бынӕттон цӕрджыты ӕмӕ сӕ разӕнгард кӕнынц «европӕйаг» цард кӕнынмӕ. Уымæ сын хорз царды цӕвиттонӕн Ливи, Ирак, Афганистан, Югослави, Палестинӕ ӕмӕ ӕндӕр ахӕмтӕ ӕрхӕссынц? Адӕм та се скондмӕ гӕсгӕ ӕнцон сайӕн сты, тагъд баууӕндынц фӕлитойтыл ӕмӕ «ныййарц» вӕййынц уӕйгӕнджыты фӕдыл.
Пашиняныл йе ‘рлӕудӕй фӕстӕмӕ бӕрӕг уыд, сомихӕгты хорз фидӕнмӕ кӕй не ‘ркӕндзӕн, уый. Уымӕн ӕмӕ чидӕриддӕр Ныгуылӕн бӕстӕтӕм йӕхи фӕивӕзта, уыдонӕй иунӕг бӕстӕ дӕр райгондӕй нӕ баззад.
2019 азӕй фӕстӕмӕ Сомих ИНО-йы рабадтыты рӕстӕджы йӕ позицитӕ цӕхгӕр фӕивта бирӕ фарстатӕм. Зӕгъӕм, Гуырдзыстоны тыххӕй дзы цы фарстатӕ вӕййы, уыдоныл хъӕлӕс кӕнын райдыдта иннӕрдӕм, кӕд ӕмӕ йӕхицӕн дӕр Хӕххон Карабахы лигъдӕтты фарста актуалон уыд, уӕддӕр. Йӕхи адӕмы интересты сӕрты чи ахызт ӕмӕ йӕ бӕстӕйӕн зиан чи хӕссы, уыцы Пашиняны хъуыдымӕ гӕсгӕ гуырдзиаг лигъдӕттӕн ис, Абхаз ӕмӕ Хуссар Ирыстоны территоритӕм раздахыны бар. Уымӕ гӕсгӕ азербайджайнаг лигъдӕттӕн дӕр бар радта Хӕххон Карабахмӕ бацӕуынӕн ӕмӕ куыд федтам, афтӕмӕй уыдон бацыдысты, сомихæгтæ та ацыдысты….
Нӕ бӕстӕйы Президент Гаглойты Алан карз дзуапп радта Пашинянӕн, банысан кодта, зӕгъгӕ йӕ адӕмы чи ауӕй кодта, ахӕм политикы ницӕйаг ныхӕстӕ нӕ хъӕуынц Хуссар Ирыстоны.
«Мах стыр аргъ кӕнӕм сомихаг нацийӕн, рагӕй фӕстӕмӕ нын ис хӕларадон ахастытӕ. Фӕлӕ Хӕххон Карабахы уӕззау уавӕры чи ныууагъта, ахӕм адӕймаджы ныхӕстӕн махмӕ кад нӕй. Карабахӕгтӕ ӕнхъӕлмӕ кастысты Сомихмӕ ӕххуысмӕ, фӕлӕ сӕ Пашинян рохуаты ныууагъта. Нӕ йӕм разынд уыцы лӕгдзинад дӕр, цӕмӕй Арцахы банымадтаид хӕдбарыл», – зӕгъы Гаглойты Алан.
Гаглойты Аланы карз дзуапп бирӕтӕм диссаг фӕкаст, ома дипломатон этикет ахӕм ныхӕстӕ зӕгъынӕн бар нӕ дӕтты. Фӕлӕ лӕмбынӕг куы ӕркӕсӕм, уӕд бӕлвырдӕй фендзыстӕм, Пашинянмӕ кӕй ис негативон ахаст тынг бирӕ политикты ‘рдыгӕй ӕмӕ йӕ ӕргом ӕфхӕрын кæй райдыдтой. Ома, сомихӕгтӕн ӕргомӕй ӕвдисынц, ницӕйаг сӕргълӕууӕг кӕй равзӕрстой сӕхицӕн, уый.
Ӕрӕджы, Минскы уыд Коллективон ӕдасдзинады бадзырды организацийы (ОДКБ) рабадт ӕмӕ дзы Пашинян хайад нал райста. Ӕгӕрыстӕмӕй ма дызӕрдыг кӕнын райдыдта, ацы организаци Ереванӕн ницы пайда хӕссы ӕмӕ дарддӕр хъуамӕ равзарой, хъӕуы ма йе сконды уӕвын æви нæ хъæуы. ОДКБ-йы скондӕй рахизынмӕ йӕ, кӕй зӕгъын ӕй хъӕуы, разӕнгард кӕнынц Ныгуылӕны бӕстӕтӕ ӕмӕ Пашинян развӕлгъау цӕттӕ кӕны йе ‘хсӕнады ацы хъуыддаг саразынмӕ.
Сомихы ӕргом ныридӕгӕн, ӕрмӕстдӕр, ныгуылӕнырдӕм зылд кӕй у, уый хорзыл дзурӕг нӕу ӕмӕ дзы фӕхæрд уыдзысты ӕрмӕстдӕр сомихӕгтӕ. Ныридӕгӕн бафыстой ног бадзырдтӕ, цӕмӕй нырӕй фӕстӕмӕ ӕхсӕнгарз ӕлхӕной ныгуылӕн бӕстӕтӕй, сӕ хӕстонты сын цӕттӕ кӕной НАТО-йы инструктортӕ ӕмӕ фидӕны Сомихы территорийыл ӕвӕрд ӕрцӕуой НАТО-йы ӕфсӕддон базӕтӕ. УФ-йы паддзахадон думӕйы депутат Виктор Водолацкийы хъуыдымæ гæсгæ Сомих равзӕрста Украинӕйы фӕндаг: «Мах ӕвдисӕн стӕм, Пашинян растдӕр Ющенко, Порошенко ӕмӕ Зеленскийы хуызӕн кæй архайы, уымæн. Хъыгагӕн, федтам, паддзахад йӕ суверенитет куы фесафы, уӕд йӕ уавӕр цӕмӕ ӕрхауы, уый дӕр», – банысан кодта Водолацкий.
ДЖИОТЫ Алыксандр
