Израилаг-полестинаг конликтмӕ глобалон политикӕйы цӕстӕнгасӕй куы акӕсӕм, уӕд бӕлвырдӕй зыны, израилаг гарзджын тыхтӕ кӕй сты АИШ-ы ӕфсӕддон дӕлхӕйттӕ. Комкоммӕ зӕгъгӕйӕ та, Израиль бирӕ азты дӕргъы хъахъхъӕны АИШ-ы интерестӕ Хӕстӕг Хурыскӕсӕны.
Уымӕн ӕвдисӕн ацы территорийыл бирæнымæцон конфликттӕ – Израиль йӕ цыбыр историйы схӕцыдис сыхæгтæй алкӕимӕ дӕр. АИШ ныр 50 азы дӕргъы нӕ уадзы размӕ Египеты, Сирийы, Саудаг Аравийы, Ливаны, Иракы, Йемены ӕмӕ ма ӕндӕр бӕстӕты, ӕмӕ йын уыцы хъуыддаджы йӕ къух разæнгардæй аразы Израиль. Дӕсгай азты регионы нӕ мынӕг кӕнынц алыгъуызон конфликттӕ, бынӕттон адӕмтӕн Израилы паддзахад ссис се ‘нӕуынон. Уымӕй уӕлдай ма АИШ-ӕн иу хаттæй иннæ хаттмæ æнтысы бынӕттон бӕстӕты кӕрӕдзиимӕ сызнаг кӕнын, се хсӕн ӕппынӕдзух фыдӕхдзинад тауын.
Ахӕм хаосы америкӕйаг компанитӕн ӕнцондӕр у Хӕстӕг Хурыскӕсӕны ӕрдзон ресурстӕ сӕхирдæм ссивын.
Израилы сӕргълӕууӕг Нетань-яху цы бон сси, уӕдæй нырмæ Палестинӕимӕ сӕ ахастытӕ бӕрӕг февзӕрдӕр сты. Нетань-яху куыд политик, афтӕ Палестнӕйы паддзахады сырӕзты ныхмӕ у, палестинӕгты проблемӕ мурмӕ дӕр нӕ дары, ӕмӕ уыцы хъуыдыйы «рæстдзинад» йе ‘мбӕстӕгты ӕмӕ АИШ-ы разамынады туджы бауагъта. Уымӕ афтæ æгъатырæй палестинӕгтӕн сӕ «хурхыл ныллӕууыдысты», алыгъуызон фæрæзтæй сӕ дӕлдзиныг кӕнын райдыдтой, сусӕгӕй-ӕргомӕй сӕ сырдтой ӕмӕ куынӕг кодтой. Дзыллон информацийы фӕрӕзты уыцы фыдракӕндтӕ нæ хъæр кодтой, цӕмӕй Израиль дунейы ӕхсӕнады цӕсты сыгъдӕгӕй баззадаид.
Ахӕм политикӕ расайдта ног ныхмӕлӕуд 2023 азы – 7 октябры ливайнаг парти ХАМАС-ы палестинаг хайы хӕстонтӕ бабырстой Израилмӕ ӕмӕ та ногӕй райдыдта тугкалӕн хӕст. Ацы хатт æвирхъау антигуманон нысаниуæгимæ…
Пентагон ницыуал æвгъау кæны, æрмæст Израиль ӕхсӕнгарз ӕмӕ нӕмыгæй ма фæтыхсæд, зæгъгæ. Ифтонг сӕ кӕны алыгъуызон нырыккон хӕстон системӕтӕй, ӕрвиты сӕм бархион хӕстонты, Астæуденджызмæ та бакодтой егъау ӕфсӕддон наутӕ.
Хӕстӕг Хурыскӕсӕны бӕстӕты разамынад ӕмбарын райдыдта, АИШ сӕ хӕрзӕбонӕн кӕй никуы архайдта ӕмӕ комкоммӕ рацыдысты Израилы ныхмӕ. Ӕгӕрыстӕмӕй ма арабаг бӕстӕтыл нымад чи нӕ сты, уыдон дӕр. Зӕгъӕм, Турчы президент Эрдоган Израилы рахуыдта оккупант ӕмӕ Палестинӕйы хӕстон архӕйдтытӕ та – ӕфсӕддон фыдракӕндтӕ. Афтӕмӕй та Турк НАТО-йы уӕнг у.
Иугонд Штатты æцæг нысан – Иран
АИШ-ӕн Сири ӕмӕ Иракы территориты цы ӕнӕзакъонон ӕфсӕддон дӕлхӕйттӕ ис, уыдонмӕ а фæстаг бонты цалдӕр хатты бабырстой ӕмӕ сын сӕ хӕстонтӕй скуынӕг кодтой. Америкӕйаг политиктӕ барӕй азымджын кӕнынц Ираны, цӕмӕй уый дӕр глобалон конфликты архайæг суа. Æцӕгдзинадæй та Иран фылдӕр хӕттыты ницы бар фӕдары ахӕм бабырстытӕм, стӕй йӕ хъӕугӕ дӕр ницӕмӕн кӕны? Иракы ӕмӕ Сирийы цӕр-джытӕ ӕнӕуый дӕр сӕ удхӕссӕг куы уынынц АИШ-ӕй ӕмӕ ӕнӕ Ираны ӕххуысӕй дӕр америкӕйаг хӕстонты ныхмӕ сæ ныфс нæ бахæсдзысты? Хӕстӕг Хурыскӕсӕны америкӕгты нымайынц тыхӕйисджытыл ӕмӕ сӕм нырӕй фӕстӕмӕ та ноджы фылдæр кӕсдзысты знаджы цӕстӕнгасӕй.
Ацы регионы АИШ-ӕн иууыл тӕссагдӕр знагыл нымад у Иран ӕмӕ алы амӕлттӕй архайы йе рлӕмӕгъ кӕныныл. Иннæ хъомысджын падддзахад ам у Турк, æмæ йæ нырыонг контроль кодтой пропагандӕйы фӕрцы та йæ сызнаг кодтой Иранимӕ.
Фӕлӕ Америкæйы фыдæнæн ныридӕгӕн Иран ӕмӕ Турчы æхсӕн ӕмахастытӕ фӕхъӕрмуддӕр сты, се ‘хсӕн фӕзынд ӕууӕнкдзинад, бафыстой сӕ къухтӕ дзӕвгар иумӕйаг экономикон проекттыл, ӕмӕ уыцы хъуыддаг АИШ-ӕн арвы цӕфау у. Дыууӕ хъомысджын бӕстӕйы Израилимӕ, куы схӕцой уӕд уый ХАМАС-ы хӕстонты ныхмӕлӕуды хуызӕн нӕ уыдзӕн. АИШ-ӕн та Иранимӕ конфликт куы райдайа, уӕд ӕгас Хӕстӕг Хурыскӕсӕн туджы зӕйты бын фӕуыдзӕн. Ныридӕгӕн ныгуылæйнаг провокацитӕ куыд ӕвдисынц, афтӕмӕй АИШ хъавы Иранимӕ схӕцынмӕ.
Ныгуылӕн бӕстӕты хъомысад канд доллар ӕмӕ АИШ-ы гарзджын тыхтимӕ баст нӕу – пропагандӕйæн дæр иттæг стыр нысан ис. Рагӕй фӕстӕмӕ АИШ йæ цӕрджытӕн сæ туджы уадзы, зæгъгæ, мах стӕм ӕппӕты хуыздӕр наци, нӕ демократи у иууыл растдӕр, на политикӕ та нысанмӕздӕхт у сабырдзинад тауынмӕ. Фӕлӕ ныртæккæ милуангай америкæйæгты ӕппӕт иллюзитӕ ӕрбайсӕфтысты Украинӕйы конфликтимӕ. Дыууӕ азы дӕргъы дунеон дзыллон информацийы фӕрӕзты Путины хонынц тиран, лӕгмар, агрессор, кӕцы, зæгъгæ, хъавы европӕйаг демократи скуынӕг кӕнынмӕ. Уый фӕстиӕуӕгӕн домынц ӕппӕт бӕстӕтӕй, цӕмӕй Уӕрӕсе ӕфхӕрд ӕрцӕуа. Сӕ бӕллиц у Уӕрӕсейы куыд паддзахады ныппырх, цæмæй дарддӕр ӕлдариуӕг кӕной.
Куыддæр израилаг-полестинаг конфликт райдыдта, афтæ цыбыр рӕстӕгмӕ демократийыл дзурӕг бӕстӕты репутаци фӕцудыдта, цъаммар бӕстӕты ном сыл сбадт. Ӕвиппайды ирдӕй рабӕрӕг сты ныгуылӕн бӕстӕты дывӕр стандарттӕ. Кӕд ӕмӕ нырыонг украинаг сабыр цӕрӕг адӕмы хъысмӕтыл тынг «мӕт кодтой» АИШ ӕмӕ европӕйаг бӕстӕтӕ, алыварсон ӕххуыс сын кодта уӕд ныр уыдонӕй палестинаг амӕттӕгты тыххӕй ничи бахъынцым кодта. Никæй зæрдæмæ бахъардтой уыйбӕрц сабиты ныццӕгъдыны хабæрттæ. Ома, Израилӕн алцы бар дӕр ис, уымӕн ӕмӕ мах се ‘вварс стӕм.
Иунӕг ныгуылӕн демократон бӕстӕйы минӕвар дӕр абоны онг Израилы ныхмӕ санкциты кой не скодта. Ӕгӕрыстӕмӕй Нетаньяхуйӕн уайдзӕф дӕр ничи бакодта йӕ фыдракӕндты фæдыл. Исты мыййаг Уӕрӕсе дӕр Израилау сывӕллӕттыл ӕмӕ сылгоймӕгтыл бомбӕтӕ калда, рынчындӕттӕ ныппырх кодта, сабыр цӕрӕг адӕмы ӕххормагӕй мардта, кӕнӕ лигъдӕтты куынӕг кодта? Палестинӕйы 3-4 бонмӕ æхсæнгарзæй цал сывӕллоны амӕлы, уый Украинӕимæ абарæн дæр нæй. Афтæмæй Путиныл ӕрымысыдысты, ома давы украинаг сывӕллӕтты. Нетаньяху 5 минӕй фылдӕр сывӕллоны кӕй амардта, уый кой та нӕ кӕнынц.
Израиль рагӕй у агрессор ӕмӕ оккупант. Ныридӕгӕн дӕр хӕцы Сириимӕ ӕмӕ Ливанимӕ, исы сын сӕ территоритӕ. Бирæтæ афтӕ хъуыды кæнынц, ома Израилӕн йӕ гарзджын тыхтӕ хæрздзӕттӕ ӕмӕ ифтонг сты. Æцӕгдзинадӕй та АИШ-ы ӕндӕвдад куы нӕ уаид Хӕстӕг Хурыскӕсӕныл, уӕд афонмӕ Израилы паддзахадӕн йӕ кой дӕр нал уаид.
Израилаг-палестинаг конфликт бангом кодта ӕппӕт Хӕстӕг Хурыскӕсӕн бӕстӕты. Цалдӕр боны размӕ уыд Арабаг бӕстӕты Лигӕйы ӕмӕ Исламаг ӕмгуыстады организацийы саммит сӕрмагондӕй Палестинӕйы конфликты тыххӕй. Ам иууылдӕр сразы сты ахӕм хъуыдыимӕ, ома Израилы разамынад комкоммӕ бӕрндзинад хӕссы палестинаг цӕрджыты ныхмӕ фыдракӕндты тыххӕй ӕмӕ ма йӕ банымадтой оккупантыл дӕр. Уымӕ гӕсгӕ æввахс рӕстӕджы сараздзысты сӕрмагонд кусӕгон къорд, кӕцы ӕрӕмбырд кӕндзӕнис израилаг гарзджын тыхты фыдракӕндты тыххӕй информаци ӕмӕ йӕ адæтдзысты ӕппӕтдунеон слестгӕнӕн органтӕм. Хуымӕтӕгæй зæгъгæйæ та ӕфсӕддон трибуналмæ. Дзырд ма цӕуы, Хӕстӕг Хурыскӕсӕны бӕстӕтӕ бойкот Израилӕн саразыныл АИШ-ы хурскæсæйнаг ӕфсӕддон базӕтӕн мауал дӕттой бар Израилы ӕхсӕнгарзӕй ифтонг кӕнынӕн, аскъуыной йемæ дипломатон, экономикон бастдзинӕдтӕ, мауал ын дӕдтой энергоресурстӕ.
ХАМАС-ы ныгуылӕн бӕстӕ-тӕ ӕмӕ сӕ сателлиттӕ ныма-йынц террористон организацийыл ӕмӕ Израилы гарзджын тыхтӕ, ЦАХАЛ-ы та – райгуырæн бӕстӕйы хъахъхъӕнджытӕ. Фӕлӕ хъуыддаг уымӕ цӕуы ӕмӕ ЦАХАЛ æввахс рӕстӕджы йæхæдæг нымад ӕрцӕудзӕнис террористон организацийыл. Ахӕм хъуыды ныридӕгӕн загъта Иран ӕмӕ бирӕ бӕстӕтӕ йемӕ сразы сты.
ДЖИОТЫ Алыксандр
