2008-æм азы августы хæстыл 15 азы сæххæсты боны сæраппонд нæ республикæйы цы мадзæлттæ уагъд цæудзысты, уыдонæй сæ иу уыдзæнис спектакль «Фæстаг æвдисæн»-ы равдыст, кæцы дзурæг у ирон адæмы ивгъуыд æнусы 20-æм азы геноцидыл. Нæ республикæйы Культурæйы министрады пресс-службæйы нын куыд фехъусын кодтой, уымæ гæсгæ театрдзаутæн спектакль равдисдзысты 7-æм августы изæры 18:00 сахатыл. Ацы спектакль цæуы синхронон тæлмацæй уырыссаг æвзагмæ æмæ нæ республикæйы уазджытæн æмбæрстгонд уыдзæн йæ сюжет.
Спектакль «Фæстаг æвдисæн»-ы автор у Республикæ Хуссар Ирыстоны сгуыхт журналист, фыссæг Остъаты Алан, йæ æвæрæг режиссер та у нæ паддзахадон драмон театры аивадон къухдариуæггæнæг Дзуццаты Тамерлан. Остъайы фырт йæ пьесæ бацæттæ кодта, Гуырдзыстоны хицауад нын нæ адæмæн цы геноцид сарæзта, ууыл сæдæ азы сæххæсты бонмæ. Официалонæй 2020 азы Хуссар Ирыстоны расидт æрцыд геноциды азæй æмæ ирон адæм æндæр æмæ æндæр мадзæлтты мысыдысты уыцы трагикон бонтæ.
Спектаклы æвдыст цæуынц, гуырдзиаг меньшевиктæ 1920-æм азы куыд мардтой сабырцæрæг, æнæаххос адæмы, уый. Цæвиттон, æртындæс ироны цы уазал ныккæнды дардтой сæ мæлæты размæ æмæ сæ стæй Згъудеры къуылдымы куыд фехстой, уыцы ныв сценæйыл цæуы дзæвгар рæстæг (20 минуты) æмæ уый дæр фаг у, цæмæй адæймаг бамбара, ирон адæммæ гуырдзиæгтæ цы зæрдæ дардтой, цы фыдмитæ сын кодтой, уый. Лигъдæттæ уæззау уавæры бахаугæйæ хæхты сæрты хизгæйæ, цагъды кæй кодтой, бирæ хъæутæ кæй федзæрæг сты, уыцы нывтæн ногæй æвдисæн уыдзысты театрдзаутæ.
