Хетæгкаты Къостайы номыл Хуссар Ирыстоны паддзахадон драмон театры труппæйæн йæ куысты график афтæ арæзт у, æмæ иу гастролон балц адарддæр кæнынц иннæмæй. Бæрæг куыд у, афтæмæй театры труппæйæн сæ гастролон балцытæ рауайынц æнтыстджын, фестивалтæй æрхæссынц хорзæхтæ æмæ сæрмагонд призтæ. Уый та стыр ахъаз у артистты профессионалон рæзтæн æмæ иумиагæй та нæ театр популяризаци кæнынæн.

Нæ газеты фæрстыл ма куыд фехъусын кодтам, афтæмæй æрæджы нæ театр гастролон балцы уыдис горæт Налцыччы, цыран хайад райстой æхсæнадæмон театралон фестиваль «Южная сцена»-йы. Театр фестивалмæ ахаста французаг драматург, сценарист Жан Ануйы уацмысмæ гæсгæ æвæрд спектакль «Антигона», кæцыйы æвæрæг режиссер у театры аивадон къухдариуæггæнæг Дзуццаты Тамерлан. Фестивалы хайад истой Цæгат Кавказы регионты æмæ ма æндæр республикæты паддзахадон театрты коллективтæ. Республикæ Хуссар Ирыстоны паддзахадон драмон театры пресс-службæйы нын куыд фехъусын кодтой, уымæ гæсгæ спектаклæн скодтой стыр аргъ æмæ компетентон жюрийы тæр-хонмæ гæсгæ номинаци «хуыздæр æрыгон актрисæ»-йыл нымад æрцыдис нæ театры артисткæ Бекъойты Зæринæ, кæцы æххæст кæны Антигонайы роль. Ацы спектакль ма ацы аз æвдыст æрцыд, Ульяновскы цы фестиваль уагъд цыдис, уым æмæ йыл сценæмæкæсджытæ сæмбæлдысты стыр æхсызгонæй. Жюрийы тæрхонмæ гæсгæ фестивалы хуыздæр  спектаклыл нымад æрцыдис Кæсæг-Бал-хъары паддзахадон драмон театры спектакль «Къæвдауæйгæнæг». Номинаци «хуыздæр сценографи»-йы та уæлахиздзау ссис Адыгеяйы националон театр. Тæбæхсæуты Балойы номыл цæгатирыстойнаг паддзахадон академион театры сгуыхт артист Гуыбиаты Хъазбеджы та схорзæхджын кодтой «нæлгоймаджы хуыздæр ролы» номинацийы.

Ныр та Хетæгкаты Къостайы номыл Хуссар Ирыстоны паддзахадон драмон театр гастролон балцы ис Цæгат Ирыстон-Аланийы, цыран æнæхъæн къуырийы дæргъы сæ репертуаримæ зонгæ кæнынц цæгатирыстойнаг театруарзджыты. «Банысан кæнын хъæуы уый, æмæ ацы мæй нæ театр арæх кæй цæуы гастролон балцыты.

Къуырисæры та афæндараст сты Цæгат Ирыстонмæ æхсæз боны æм-гъуыдмæ, гастролтæ аххæсдзысты фыццæгæм декабрмæ. Дыццæджы Тæбæхсæуты Балойы номыл паддзахадон академион театры сценæйыл нæ театрæн байгом гастролон балц æмæ адæмы рæгъмæ рахастой ирон æвзаг æмæ литературæйы бындурæвæрæг Хетæгкаты Къостайы æнæмæлгæ уацмыс «Фатимæ»-мæ гæсгæ æвæрд спектакль, кæцыйы сæвæрдта режиссер Дзуццаты Тамерлан. Ацы спектаклæй дарддæр ма нæ театр ахаста цалдæр спектаклы, уыдоны нымæцы трагеди «Æфхæрдты Хæсанæ», йæ æвæрæг режиссер Бекъойты Розæ. Сценæмæкæсджытæн ма равдисдзыстæм цалдæр комедийы, афтæ ма æртæ аргъауы дæр. Ирон театрæй дарддæр ма нæ спектакльтæ æвдыст цæудзысты Октябры хъæуы, Æрыдоны æмæ Елхоты клубты сценæтыл.

Нæ театры гастролтæ байгом кæныны церемонийы хайад райста Республикæ Хуссар Ирыстоны Президент Бибылты Анатоли дæр. Уый йæ раныхасы банысан кодта, дыууæ театры æнгом ахастытæн кæй ис интеграцион нысаниуæг æмæ сын арфæ ракодта сæ дарддæры æмгуыстадæн», – банысан кодтой театры пресс-службæйы. Уым ма нын куыд фехъусын кодтой, уымæ гæсгæ ма гастролты фыццаг бон Хуссар Ирыстоны паддзахадон драмон театры аивадон къухдариуæггæнæг Дзуццаты Тамерлан æмæ Тæбæхсæуты Балойы номыл цæгатирыстойнаг паддзахадон академион театры аивадон къухдариуæггæнæг Колыты Владислав сæ къухтæ æрфыстой Æмгуыстады фæдыл бадзырдыл. Ацы бадзырды фæлгæтты дыууæ театрæн сæ бон уыдзæнис сæ куысты фæдыл кæрæдзийæн æххуыс кæнын. Уый æмрæнхъ ма арæзт цæудзысты иумиаг проекттæ æмæ ахъаз уыдзысты интеграцийæн. Пресс-службæйы куыд банысан кодтой, уымæ гæсгæ абоны онг дæр сæ цæгаттаг коллегæтимæ кæнынц æмгуыстад. Нæ театримæ кусынц режиссер Бекъойты Розæ, сценограф Чилæхсаты Магрез, музыкæвзарæг Гæззаты Зоя.  Уыдонæн сæ куысты  æвдисæн у спектакль «Æфхæрдты Хæсанæ».

«Ацы спектакль фыццаг хатт æвдыст æрцæудзæн цæгатирыстойнаг сценæмæкæсджытæн æмæ уымæй æхгæд æрцæудзæнис нæ театры гастролон балц дæр. Уый фæстæ та 2020 азы апрелы мæйы Хуссар Ирыстонмæ радон гастролон балцы æрцæудзысты нæ цæгаттаг коллегæтæ. Ацы хъуыддаг махæн ссис традицион æмæ йын ис æвæрццаг фæстиуджытæ», – загътой театры пресс-службæйы.

ЦХУЫРБАТЫ Ларисæ

Comments are closed, but trackbacks and pingbacks are open.