Культурæйы министрады пресс-службæйы нын куыд фехъусын кодтой, афтæмæй 16-æм июны 18:30 сахатыл паддзахадон драмон театры сценæйыл æвдыст цæудзæн уæрæсейаг режиссер Роман Габриайы æвæрд литературон-музыкалон спектакль «Къоста».
Ацы спектакль у цымыдисон. Театралон аивадуарзджыты рæгъмæ режиссер хæссы гениалон поэты цардæй ист эпизодтæ. Афтæ ма йæ сценæтæй бирæтæ цæуынц музыкæимæ æмæ уымæй ирддæр кæны спектакль. Ирыстоны адæмы уарзон хъæбул Къостайæн æвдисы спектакль йе ‘взонджы бонтæ, Анна Поповайы куы уарзта, уыцы рæстæг, афтæ ма, йæ адæмы бартыл куыд тох кодта, йæ царды уыцы эпизод. Къоста уæззау низимæ куыд тох кодта Петербурджы рынчындоны, уый иувæрсты дæр нæ ахызт Роман Габриа. Спектаклы æртæ артисты – Гаглойты Эдуард, Куымæриттаты Батрадз æмæ Пæррæстаты Димитр æххæст кæнынц Къостайы фæлгонц.
Спектакль «Къоста» фыццаг хатт нæ театры сценæйыл æвæрд æрцыдис 2019 азы æмæ уæд нæ аивадуарзджытæ банысан кодтой, зæгъгæ, ахæм литературон-музыкалон спектакль æнæмæнгхъæуæг у театры репертуары. Уый фæстæ «Къоста»-йæн аргъ кодтой Санкт-Петербургы театрдзаутæ дæр Балтийы бæстæты XXIV-æм дунеон театралон фестиваль «Встречи России»-йы фæлгæтты.
ЦХУЫРБАТЫ Ларисæ
