19-æм августы Хетæгкаты Къостайы номыл Хуссар Ирыстоны паддзахадон драмон театр Ленингоры райцентры æмæ Цъинагары хъæуы цæрджытæн равдыста Туаты Дауыты пьесæмæ гæсгæ æвæрд, музыкалон комеди «Пæсæйы фæндон», кæцыйы æвæрæг-режиссер у Цæриаты Валери. Ленингоры культурæйы хæдзармæ цы бирæ адæм æрбамбырд, уыдон æхсызгонæй сæмбæлдысты театры артисттыл æмæ уый фæстæ та аргъгæнæг уыдысты музыкалон комедийæн.
Спектакль «Пæсæйы фæндон»-æн куыд саргъ кодтой æмæ сценæмæкæсджытыл цы тæлмæнтæ ныууагъта, уый фæдыл нын йæ хъуыдытæ загъта ленингойраг чызг Цæриаты Элизæ. Уый, фыццаджыдæр, банысан кодта ахæм культурон мадзæлттæ сæрдыгон улæфты рæстæджы хорз рæстæг арвитынæн ахъаз кæй сты, афтæ ма адæймаг сценæйæ кæй исы бирæ зонындзинæдтæ. «Цалдæр бон раздæр нæм поселочы бакод-той афишæтæ æмæ дзы куы бакастæн Цæриаты Валери у спектаклы æвæрæг-режис-сер, уæд мын тынг æхсызгон уыдис æмæ спектаклмæ балхæдтон билет. Спектакл тынг фæцыдис мæ зæрдæмæ. Йæ сюжеты ирдæй зыны мæгуыр æмæ хъæздыг адæмы социалон уавæр ирон адæммæ, афтæ ма уарзондзинад тыхджындæр кæй разыны, уый. Ирон национ музыкæ дзы арæх кæй зæлыд, уый уæлдай æхцондзинад хаста адæймагæн. Артистты аив хъазт дæр тынг фæцыд мæ зæрдæмæ», – райгондæй дзырдта Цæриаты чызг.
Спектакль «Пæсæйы фæндон» йæ рæстæджы нымад цыдис нæ театры репертуары хуыздæр спектаклтæй сæ иуыл æмæ-иу æм театрдзаутæ цыдысты стыр æхсызго-нæй. Ацы спектаклы сæйраг ролтæ æххæст кодтой уæды рæстæджы зындгонд артисттæ. Бирæ азты дæргъы Мысырханы ролы æххæст кодта адæмы уарзон артисткæ дзæнæттаг Цоциты Нинæ. Фæстаг хатт ма нæ театры репертуары уыд 1989 азы æмæ та нæ театры къухдариуæгады бафæндыд куы та йæ сног кодтаиикой. Классикон спектакль сæвæрынмæ уалдзæджы æрæвнæлдта Цæриаты Валери. Уый дыууæ ирон театры æмгуыстады фæдыл бадзырды фæлгæтты, хуынд æрцыдис Цæгат Ирыстонæй æмæ йæ æвæрд спектаклæй фæхъæздыгдæр кодта Хетæгкаты Къостайы номыл Хуссар Ирыстоны паддзахадон драмон театры репертуар.
Спектакль «Пæсæйы фæндон»-ы ролтæ сæххæст кодтой, хуссарирыстойнаг сценæмæкæсджытæн хорз зонгæ чи сты, уыцы артисттæ. Уыдон сты: Республикæ Хуссар Ирыстоны адæмон артисткæ Гæджиты Ингæ сгуыхт артисттæ Уанеты Эдуард, Хаситы Сослан, Гаглойты Артур, Чохели Натиа, артисттæ Дыгъуызты Иринæ, Мæргъиты Ингæ æмæ æндæртæ.
Хуссар Ирыстоны паддзахадон драмон театры аивадон къухдариуæггæнæг Дзуццаты Тамерлан нын куыд фехъусын кодта, уымæ гæсгæ артисттæ сæ улæфты фæстæ ацы мæйы гастролон балцыты хъуамæ ацæуой нæ республикæйы дæрдтаг районтæм. 24-æм августы фæнд кæнынц спектакль ахæссын Къуыдаргоммæ. Дарддæр та сæхи цæттæ кæнынц ног те-атралон сезонмæ, кæцы хъуамæ байгом уа сентябры мæйы æмбисты.
Спектакль «Пæсæйы фæндон»-мæ ма 17-æм августы бакастысты Цъинагары хъæуы цæрджытæ дæр.
ЦХУЫРБАТЫ Ларисæ
Comments are closed, but trackbacks and pingbacks are open.