Абон изæрæй 18:00 сахатыл Хетæгкаты Къостайы номыл Хуссар Ирыстоны паддзахадон драмон театры сценæйыл А. Александровы номыл Уæрæсейы Æфсады кафт æмæ зарды Академион номдзыд ансамбль равдисдзæн концерт. Уый тыххæй нын фехъусын кодтой нæ республикæйы Культурæйы министрады пресс-службæйы.
«Ацы концерт уагъд цæуы Хуссар Ирыстоны Культурæйы министрады хъæппæрисæй. Хуссарирыстойнаг сценæмæкæсджытæн ансамблы коллектив равдисдзысты сæ хъæздыг репертуарæй бирæ музыкалон номыртæ, артисттæ сæххæст кæндзысты æфсæддон классикон зарджытæ, афтæ ма нырыккон композицитæ кæфтытимæ. Концерт у æнæаргъæй», – банысан кодтой пресс-службæйы.
Александровы номыл Уæрæсейы Æфсады кафт æмæ зарды Академион ансамбль популярон у Уæрæсейы æмæ фæсарæнты дæр. Ансамбль цалдæр хатты концертон программæтимæ фæуазæг ис Хуссар Ирыстонмæ дæр æмæ-иу сын се сфæлдыстадимæ зонгæ кодтой куыд горæт Цхинвалы, афтæ Ленингоры районы цæрджытæ дæр. Фæстаг хатт ансамблы артистты арæхстдзинадæн ирон аивадуарзджытæ саргъ кодтой 2017 азы.
