Гастролон балцытæ рауадысты æнтыстджын

Хетæгкаты Къостайы номыл Хуссар Ирыстоны паддзахадон драмон театр æнтыстджынæй æрæздæхт гастролон балцæй.

Хетæгкаты Къостайы номыл паддзахадон драмон театры пресс-службæйы нын куыд фехъусын кодтой, афтæмæй нæ театр æрæздæхт гастролон балцæй æмæ семæ æрхастой æхсызгон хабæрттæ. Паддзахадон театр уалдзæджы райдианы хуынд æрцыдис дыууæ фестивальмæ. Артистты иу къорд апрелы мæйы хайад райстой Майкопы уагъдцæуæг æппæтадæмон фестиваль «Кавказский меловой круг»-ы, кæцы уагъд цыдис 22 апрелæй 28 апрелмæ. Ам сценæмæкæсджытæн равдыстой спектакль «Антигона», сæвæрдта йæ нæ театры аивадон къухдариуæггæнæг, режиссер Дзудцаты Тамерлан. Уымæ гæсгæ уый гастролон балцы дæр театры труппæимæ ацыдис фестивальмæ.

Уымæй дарддæр ма апрелы мæйы кæрон Луганскы Адæмон Республикæйы дæр уагъд æрцы-дис театралон фестиваль «Госпожа удача», зæгъгæ, ахæм номимæ æмæ уырдæм та аластой æмæ дзы равдыстой Островскийы пьесæ «Хъæд»-мæ гæсгæ æвæрд спектакль, кæцыйы æвæрæг у Андрей Цисарук. «Фестивалы фæлгæтты махæн нæ театр спектакль равдыста фæстаг бонты. Нæ труппæйы нын схорзæхджын кодтой дипломæй. Банысан кæнын хъæуы уый дæр æмæ нын нæ театры тынг хорз кæй суазæг кодтой æмæ ныл кæй баузæлыдысты, уый. Кæд спектакль ирон æвзагыл уыд, уæд-дæр синхронон тæлмац цыдис. Ардæм театры труппæимæ ацыдис Хетæгкаты Къостайы номыл паддзахадон драмон театры директор Уалыты Мадинæ дæр.

Пресс-службæйы нын куыд загътой, афтæмæй нæ театры артисттæ сæ къухдариуæггæнджытимæ гастролон балцæй  баззадысты тынг райгондæй. Сæ гастролон балц сæм сæвзæрын кодта хорз тæлмæнтæ.

Æппæтадæмон фестиваль «Кавказский меловой круг»-ы жюрийы тæрхонмæ гæсгæ сæрмагонд призæй хорзæхджын æрцыд Хетæгкаты Къостайы номыл паддзахадон драмон театры артист Бекъойты Заринæ, спектакль «Антигона»-йы Антигонæйы роль аив кæй сæххæст кодта, уый тыххæй. Фестивалы ма номинаци «Дыккаг планы нæлгоймаджы хуыздæр роль»-ы дипломæй схорзæхджын кодтой Цоциты Андрейы, спектакль «Антигона»-йы Гемоны ролы хорз кæй ахъазыд, уый тых-хæй. Номинаци «Хуыздæр режиссурæ»-йы тыххæй дипломæй та хорзæхджын æрцыд театры аивадон къухдариуæггæнæг, спектакль «Антигона»-йы режиссер-æвæрæг Дзудцаты Тамерлан.

ЦХУЫРБАТЫ Ларисæ