26-æм июлы Мыхуыры хæдзары пресс-центры Республикæ Хуссар Ирыстоны Президенты администрацийы сæргълæууæджы хæдивæг Тыбылты Алан нæ бæстæйы сæргълæууæг Гаглойты Аланы номæй Дзыллон информацийы фæрæзты кусæджы боны цытæн паддзахадон хорзæхтæй схорзæхджын кодта дзыллон информацийы фæрæзты кусджыты иу къорды.
Ацы бон хорзæхтæ райстой газеттæ «Хурзæрин» æмæ «Южная Осетия», паддзахадон телерадиокомпани «Ир», информацион агентад «Спутник Южная Осетия» æмæ полиграфион-кондадон баиугæнды кусджытæ. Тыбылты Алан, фыццаджыдæр, арфæ ракодта йæ коллегæтæн бæрæгбоны сæраппонд æмæ сын бузныг загъта сæ ахсджиаг æмæ бæрнон куысты тыххæй. Стыр æхсызгонæй банысан кодта, зæгъгæ, журналисттæ азæй азмæ рæзынц æмæ сæ куыст ахадгæдæр у, уыимæ иумæ сæ рæнхъытæ дæр кæй фылдæр кæнынц, уый.
«Мах не ‘ппæт дæр тынг хорз зонæм, журналисты куыст æнцон кæй нæу, уый. Алкæй дæр уæ лæгæй-лæгмæ зонын æмæ уын аргъ кæнын уæ куыстæн. Уымæ гæсгæ уын зæгъын стыр бузныг уæ иузæрдион куысты тыххæй. Стыр бузныг æмæ уын арфæйы ныхæстæ зæгъын Республикæ Хуссар Ирыстоны Президент Гаглойты Аланы номæй дæр», – банысан кодта Тыбылы фырт.
Информаци æмæ мыхуыры паддзахадон комитеты сæрдары хæдивæг Харебаты Мая та мыхуыры комитеты хорзæхтæй схорзæхджын кодта, сæ куысты уæлдай æнтыстджындæр чи уыд, уыцы журналистты къорды.
Нæ уацх.
