Æрвылазон патриотон акцийы фæлгæтты Республикæ Хуссар Ирыстоны Президент Гаглойты Аланæн радтой фыццаг «Георгийы лентæ».
Скъоладзаутæ паддзахады сæргълæууæджы пиджакыл бакодтой мысæн æмæ æфсæддон кады символ æмæ йын радтой флаер, цыран фыст ис йæ истори æмæ йæ куыд дарын хъæуы, уый.
Волонтертæ Гаглойты Аланмæ æнхъæлмæ кастысты президенты администрацийы раз. Уырдæм æрбацыдысты Стыр Фыдыбæстæйон хæсты рæстæгæй баззайгæ мотоцикл «Урал»-ыл. Президент скъоладзаутæн баныфсæвæрдта, Уæлахизы боны бæрæгбонмæ «Георгийы лентæ»-имæ кæй æрбацæудзæн, уымæй.
«Мах нæхи цæттæ кæнæм Уæлахизы бæрæгбонмæ æмæ та ногæй сæмбæлдзыстæм Театралон фæзуаты. Æнæмæнгдæр æрбацæудзынæн, цы лентæ мын балæвар кодтат, уыимæ», – загъта Президент.
Уый фæстæ скъоладзаутæ бацыдысты Хицауады Сæрдар Джуссойты Константинмæ.
Стыр Фыдыбæстæйон хæсты Уæлахизыл 60 азы сæххæстæй фæстæмæ 9 майы хæдразмæ æххæст æрцæуы акци «Георгийы лентæ». Ацы акци канд иумæйагуæрæсейон нæу, фæлæ у дунеон. Йæ сæйраг нысан у, рæзгæ фæлтæрæн сæ зæрдыл æрлæууын кæнын, цы стыр аргъæй æлхæд æрцыд Уæлахиз, уый. Æхсызгон нын у, Фыдыбæстæ хъахъхъæнджыты нæмттæ кæстæртæ кæй нæ рох кæнынц, уый.
Георгийы лентæ у, фашизмæй дуне чи ирвæзын кодта, фронтæн æппæт дæр чи лæвæрдта, уырдыгæй чи нал æрыздæхт, уыдоны номæн кады символ. Уый ма у Стыр Уæлахизы цытæн ветераны кад æмæ сæрыстырдзинады символ дæр.
Сау хæххытæ нысан кæнынц фæздæг, бурбын сырх та – арт. Уымæ гæсгæ йæ хонынц сыгъдæг Георги Уæлахиздзауы дзуары кадæн. Лентæ дарын хъæуы риуыл галиуæрдыгæй фарс.
Акцийы организатортæ фæнд кæнынц æртæ мин лентæйы онг байуарын Хуссар Ирыстоны адæмæн.
Кокайты Зæринæ
