Информацион агентад «Спутник Хуссар Ирыстон»-ы уадзæг 3 майы, уыдис Паддзахадонунитарон куыстуат «Водоканал»-ы сæргълæууæг Сиукъаты Иван.
Уый лæмбынæг радзырдта «Едыс-Цхинвал»-ы магистралон хаххы реконструкцийы тыххæй.
«Ацы объект хаст æрцыд 2024 азы РХИ-йы социалон-экономикон рæзтæн ахъазгæнæг Инвестицион программæмæ. Арæзтад райдайдзæн майы мæйы. Куыстытæн хицæн æрцыд 600 милуан сомы. Проектыл бакуыстой ивгъуыд азы. Проектгæнджытæ бынаты федтой доны транспортировкæ, бакодтой геодезион куыстытæ. Ныртæккæ Цхинвалмæ Едысæй цы дон цæуы, уымæн суткæйы дæргъы йæ дебет у 8-9 мин кубометры. Фæлæ донуадзæн куы сырæза, уæд та суткæйы дæтдзæн 15 мин кубометры дон. Мах анализ скодтам зæронд системæтæн. Уыдон иууылдæр сты ивинаг. Уыцы куыстытæ куы фæуæм, уæд горæт æнæкъуылымпытæй исдзæн дон», – дзырдта «Водоканал»-ы сæргълæууæг.
Уый ма куыд загъта, афтæмæй зæронд системæтæ афтæ тынг базæронд сты æмæ сæ цы дон цæуы, уымæн йе ‘мбис сæфы фæндагыл. Донифтонгад гуырдзиаг хъæутыл кæй цыд, уымæ гæсгæ сыл контрол нæ цыд. Цæрджытæ ныххуынчъытæ кодтой хæтæлтæ æмæ уырдыгæй донхæр кодтой сæ цæхæрадæттæ. Уыдон иууылдæр ивд æрцæудзысты, донæмбырдгæнæн цъайты та æвæрд æрцæудзысты донфæрсудзæнтæ.
Проектгæнджытæ ма сныв кодтой ног цъайтæ дæр – баиу сæ кæндзысты иумæйаг доны системæмæ. Проект тынг вазыгджын у æмæ арæзт æрцæудзæн дыууæ этапæй. «Фыццаг уал уадздзыстæм доны хæтæлтæ, фæлæ сæ уадзын хъæуы ахæм бынæтты, цæмæй æрдзы фыдаудæнтæй хызт уой. Ныртæккæ Цæгатаг, Мæскуыйаг æмæ БАМ-ы микрорайонтæм Едысы доны ифтонгадæй цы дон цæуы, уый йемæ ласы бырон, уымæн æмæ комкоммæ иугонд у. Мах та фæнды саразын донæмбырдгæнæн, цæмæй донсыгъдæггонд цæуа. Æппæт ацы куыстытæ фæуыдзыстæм фæззæджы. Фæстæдæр хæххон рельеф бар нал фæдæтты ахæм куыстытæ кæнынæн», – загъта ма Сиукъаты лæппу.
Зымæгон бонты боныгъæдтæ куыд уой, уымæ гæсгæ горæты мидæг куыстытæ цæудзысты. Зæронд хæтæлтæ ма цы уынгты баззад, уым æнæмæнг иууылдæр ивд æрцæудзысты. Цæрджыты ныхæстæм гæсгæ горæты иу хай иннæйæ бæрзонддæр ран ис. Сæрдыгон бонты бæрзонддæр ранмæ дон нæ хæццæ кæны æмæ донæн йе ‘мвæзад æрхауы. Ахæм рæтты сæвæрын хъæуы донцъирæнтæ. Уыцы куыстытæ бакæнынæн та сæрмагонд техникæ ис «Водоканал»-æн.
Сиукъаты Иван ма куыд загъта, афтæмæй адæмы куырдиæттыл кусын, тынг вазыгджын хъуыддаг у æмæ уымæ гæсгæ «Водоканал»-ы алы куырдиатмæ дæр æркæсынц лæмбынæг.
Нæ уацх.
