Хуссар Ирыстоны йæ тæмæны сты нæмыгон культурæты æфснайæн куыстытæ. Паддзахадон унитарон куыстуат “Ирагропромсервис”-ы директор Мамытаты Вахтанг куыд зæгъы, афтæмæй ацы куыстытæ æххæст кæнынц 10 тыллæг æфснайæн комбайны. Уыдонмæ ма æввахс рæстæджы ноджыдæр æрбафтдзæнис иу комбайн. Мамытайы фырты ныхæстæм гæсгæ уал абоны бонмæ бантыст æдæппæт 780 гекатары фæзуатыл нæмыгон культурæтæ бафснайын æмæ, зæгъгæ, æппæт дæр аразæм, цæмæй тыллæг æфснайæн компани фæуа æмбæлон æмгъуыдты.
Банысан кæнын хъæуы уый æмæ “Ирагропромсервис” æххæстæй ифтонг кæй нæу хъæууонхæдзарадон техникæйæ. Цæвиттон, иууыл тынгдæр хъуагдзинад æййафынц хъæмп æмбырдгæнæн æмæ пресгæнæн агрегаттæй. Чи сæм ис, уыдон фаг не сты, цæмæй æххæст кæной амалиуæггæнджытæ æмæ хицæн цæрджыты домæнтæ. Директор куыд загъта, афтæмæй Президент Гаглойты Аланы бахæсмæ гæсгæ хъæууон хæдзарады министрад кусы “Ирагропромсервис”-ы машинæ-тракторон парк сног кæныны фарстыл.
“Ног хъæууон хæдзарадон техникæ самал кæнын фæахъаз уыдзæн, фермертæ хуым кæнын æмæ тыллæг æфснайыны рæстæджы цы сæйрагдæр проблемæтыл æмбæлынц, уыдон аскъуыддзаг кæнынæн. Афтæ ма паддзахадон унитарон куыстуат “Ирагропромсервис”-æн фадат ратдзæн, цæмæй республикæйы фермертæ æмæ цæрджытæн сæ хъæууон хæдзарадон куыстытæ бакæнынæн афоныл æххуыс кæной”, – загъта хъæууон хæдзарады министр Мæргъиты Алан.
БЕСТАУТЫ Валя
