Хъуыддагыл иузæрдион адæймаг у Ленингоры районы тракторон бригадæйы бригадир Габиты Хвича. Хъæууон лæппу йе ‘взонджы бонтæй фæстæмæ бауарзта зæххы куыст, йæ фондз æнгуылдзау зоны техникæ æмæ йын уымæ гæсгæ сæ дыууæ дæр хæссынц æхцондзинад. Габийы фырт йæ алыварс æрбамбырд кодта, хъæууонхæдзарадон техникæимæ архайын чи зоны æмæ уарзы, ахæм куыстхъом адæймæгты æмæ кæддæриддæр сæ разылæууæг хæстæ æххæст кæнынмæ дарынц бæрнон ахаст. Уымæ гæсгæ алы хатт дæр уалдзыгон-фæззыгон æнæаргъæвгæ куыстытæ бакæнынц рæстæгыл æмæ гъæдджынæй æмæ сæ разыйæ баззайынц фермертæ æмæ хицæн зæхкусджытæ. Уыцы хъуыддаджы та сын цæвиттон æвдисы Габийы фырт йæхæдæг. Уый бригадирæй дарддæр арæхстджын у техникæмæ дæр, æмæ сын алы хатт дæр рæвдз вæййынц быдырон куыстытæ æххæст кæнынмæ.
Афтæ та уыд ивгъуыд аз фæззæджы æмæ ацы азы уалдзæджы дæр. Габийы фырт æмæ йæ бригадæйы механизатортæ Хуыбылты Тамаз, Мæргъиты Илья, Дриаты Тамаз, Звиад, Хуриты Зураб æмæ йæ фырт Сослан æмæ сын фæззæджы бантыст 200 гектары фæззыгæнд мæнæу байтауын. Уалдзыгон кусынæн бæзгæ боныгъæдтæй дæр спайда кодтой æмæ уал райдианы æрæвнæлдтой хуым кæнынмæ, уый фæстæ та райдыдтой тауын. Æдæппæт уалдзæджы байтыдтой 800 гектары, уыцы нымæцы 150 гектары байтыдтой нартхор æмæ 650 гектары фæзуатыл та тыд æрцыд хъæбæрхор. Габийы фырт куыд загъта, уымæ гæсгæ дзæвгар сты, æфсирон культурæтæ кæмæн байтыдтой, уыцы зæхкусджытæ, фæлæ фылдæр фæзуæттыл тыд кæмæн æрцыдысты, уыдоны ‘хсæн сты Абреуæй Елойты Вася, Габиты Гела, Мæргъиты Бесик, Орчъосанæй Елойты Сослан, Дриаты Юри, Гамлет, Цъинагарæй Хуыбылты Маирбег, Дзеранты Але, Хуыбылты Илья æмæ æндæртæ. Кæй зæгъын æй хъæуы, хъæууон фæллойгæнджытæ æфсирон культурæтæ тыд фесты, фæлæ уæддæр зæхкусæгæн йæ аудинæгтæ нырма дзæвгар сты. Рæстæгыл сæм хъæудзæн гербицидтæ бахæссын æмæ уыцы ахсджиаг куыст ахицæн кæныныл дæр механизатортæ бакусдзысты ацы æввахс бонты.
ХУЫБИАТЫ Никъала
