Тверы областы уагъд æрцыд 15-16-аздзыд боксерты ‘хсæн Уæрæсейы чемпионат. Хайад дзы райстой Ирыстоны боксы скъолайы хъомылгæнинæгтæ дæр. 80 кг уæзы категорийы фыццаг бынат бацахста Итониаты Самирæ. Уый финалы фæуæлахиз Краснодары минæвар Вероника Воблаяйыл. Дыккаг ссис Сланты Камиллæ (52 кг). Бронзæйон призер та – Гæззаты Ланæ (52 кг).
Лæппуты ‘хсæн 57 кг уæзы категорийы дыккаг бынат бацахста Хъæбæлоты Артур. Æвзист майдан ма бафтыд Хъараты Астемыры къухты. Уый та архайдта 75 кг уæзы категорийы. Бронзæйон хорзæхимæ та æрæздæхт Цæллаты Сæрмæт (70 кг).
***
Украинæйы национ комитет Дунеон Олимпион комитет æмæ дзюдойæ дунеон федерацийæ домы, цæмæй уæрæсейаг спортсменты иу къорды ма бауадзой Европæйы чемпионаты хайад райсын. Дзырд цæуы Таймæзты Мадинæ, Тасойты Инал æмæ æндæр уæрæсейаг спортсментыл. Украинæйаг фарс дзюдоистты аххосджын кæны сæрмагонд æфсæддон операцийы æвварс кæй рахæцыдысты, уымæй. Европæйы чемпионат уагъд æрцæудзæн Загребы 25-28 апрелы. Ерысты уæрæсейаг æмæ белорусаг спортсментæ хайад исдзысты нейтралон статусы хуызы.
Хуриты Батрадз
