Нæ республикæйы хъæууон фæллойгæнджытæ ацæугæ азы фæззыгон-зымæгон куыстытæ сæххæст кодтой дзæвгар.
Сæрды тæвд бонтæ кæй ахаста, уымæ гæсгæ мæр уыд тынг хъæбæр æмæ уый аххосæй хуым кæнын æмæ тауыны куыстыты механизатортæ æвзæрстой зындзинæдтæ. Фæлæ фæстæдæр зæхх куы сфæлмæн, уæд механизатортæ фæлæууыдысты цырд æмæ декабры мæйы онг хорз бакуыстой. Кæд сæ кусæн техникæ зæронд у, кусыны рæстæджы арæх хæлдысты, уæддæр техникæйыл кусджытæ рæвдз архайдтой сæ цалцæг кæныныл æмæ дарддæр æххæст кодтой сæ разылæууæг æнæаргъæвгæ куыстытæ.
Мæр афæлдахыны иууыл хуыздæр фæстиуджытæ равдыстой Ленингоры районы механизатортæ Хуыбылты Тамаз, Эдуард, Дриаты Звиад æмæ æндæртæ тракторон бригадæйы бригадир Габиты Хвичайы разамындæй. Ацы куыстыты цæрдæг фæлæууыдысты Знауыры районы Наниты Таликы тракторон бригадæйы уæнгтæ Гæззаты Андрей, Гаглойты Виталик, Кокойты Эдик, Гаглойты Виталик, Табуты Радик æмæ æндæртæ дæр. Уыдон фермерон æмæ хицæн арендаторты зæххы фадгуытæ бахуым кæныныл бакуыстой зæрдиагæй. Уый фæстæ æртæ районы хицæн хæдзарадтæ дæр тагъд кодтой фæззыгæнд мæнæу тауыныл æмæ цыбыр æмгъуыдмæ сæххæст кодтой сæ фæззыгон куыстыты иу хай. Цæвиттон, Цхинвалы районы хæдзарадтæ ацы культурæ байтыдтой 150 гектары бæрц.
Республикæйы Паддзахадон унитарон куыстуат «Ирагропромсервис»-ы директор Мамытаты Вахтъанг архайы, цæмæй сæм цы техникæ ис, уый уа куыстæввонг æмæ уалдзыгон куыстытыл сæмбæлой æххæст цæттæйæ. Уый тыххæй сбæрæг кодта, фылдæр сæ цахæм ивæн хæйттæ хъæуы, уый. Уыдон бынатмæ æрхæццæ уыдзысты ацы æввахс бонты æмæ сæ адих кæндзысты тракторон бригадæйы механизатортыл. Сæ раивын æмæ цалцæг кæныныл та бакусдзысты, цалынмæ уалдзыгон хуым кæнын æмæ тауыны куыстытæ нæ райдайой, уæдмæ.
Куысты рæстæджы, уæлдайдæр та хуымгæрдæны, цæмæй куыст ма къуылымпы кæна техникæйы аххосæй, уый тыххæй йæ фæнд у, бахъуыды рæстæджы сæ чи цалцæг кæндзæн, ахæм бригадæ саразын дыууæ адæймаджы скондæй. Мамытайы фырт ма куыд загъта, афтæмæй бригадирты куыстмызд у бынтон чысыл æмæ уыцы хъуыддаг аиуварс кæныныл дæр кусы. Æнæуый та республикæйы хъæууонхæдзарадон техникæ у бынтон кадавар æмæ йæ фæфылдæр кæныныл дæр кусдзæн. Уæд куыстытæ дæр цæудзысты рæвдз æмæ цыбыр æмгъуыдты.
Хуыбиаты Никъала
