Дыууæ къуырийы размæ райдыдтой уалдзыгон быдырон куыстытæ. Бæрæг куыд у, афтæмæй Хъæууон хæдзарады министрад развæлгъау бацæттæ кæны, йæ балансыл цы зæхгуысты æмæ тауыны техникæ ис, уыдон.
2021-æм азы Уæрæсейы Федерацийæ нæ Хъæууон хæдзарады министрад райста тыллæгæфснайæн комбайн «Кировец», трактортæ æмæ минералон хъацæнтæ пырхгæнæн техникæ. Ацы министрад ахæм техникæйæ цух рагæй уыд. Нæмыгон культурæтæ æфснайыны афон-иу куы ‘рцыд, уæд-иу техникæ арæх хæлдысты, хатт-иу кусынæн дæр нал сбæззыдысты.
«Нæ къухты цы 20 тракторы ис, уыдон иууылдæр сты æмбæлон уавæры. 11 комбайнæй æхсæз сты ног. 2020 азы, раззаг азтæм абаргæйæ, хъæууон хæдзарады кусджытæ бакуыстой фылдæр быдыртæ», – зæгъы «Ирагропромсервис»-ы директор Мамытаты Вахтанг.
Уый ма куыд зæгъы, афтæмæй хицæн адæмæй дæр цæуы домæнтæ хуым кæныны тыххæй. Бирæтæ суанг январы мæйæ рады слæууыдысты.
«Æнæхъуаджы нæ фæзæгъынц, куыстуарзаг, цардфæразон адæймаг дуры цъуппыл дæр йæхи фæдардзæн, зæгъгæ, куыд раздæры дуджы, афтæ та ныр дæр адæм бамбæрстой, зæхх адæймагæн йæ дарæг кæй у. Кæд ныртæккæ техникæйы фæрцы бирæ куыстытæ бакæнæн ис, уæддæр зæхх фæллойгæнæг адæмæй афæдзы дæргъы бирæ хъару æмæ фердæхтдзинад домы. Цæмæй абоны бон бахуым кæной, байтауай алыгъуызон æфсирон æмæ æндæр хъæууонхæдзарадон культурæтæ, уый тыххæй зæххмæ афоныл зилын хъæуы. Æмбæлон æгъдауæй йæхи чи бацæттæ кæны уалдзыгон куыстытæм, уымæн та, кæй зæгъынæй хъæуы, кæддæриддæр вæййы хорз æнтыстытæ, йæ фæззæг рауайы бæркадджын. Йæ куысты фæстиуджытыл канд йæхæдæг нæ фæцин кæны, фæлæ ма йæ адæм дæр», – загъта Мамытаты Вахтанг.
Хъæууон хæдзарады министрады пресс-службæ та куыд фехъусын кодта, афтæмæй ныртæккæ министрады куыст цæуы гъæдджын культурæты тауинæгты фонд саразыныл. Уый фадат дæтдзæнис хъæууонхæдзарадон культурæты фæзуæттæ рауæрæхдæр кæнынæн. Хордæттæг зæххытæ хъуамæ иууылдæр цæуой куыст.
Нæ уацх.
