Июлы мæйы æмбисты нæ республикæйы Президент Гаглойты Аланæн уыд фембæлд Дзауы районы цæрджытимæ, цыран, сæйраджыдæр, дзырд цыдис районы цæрджыты царды уавæртæ фæхуыздæр кæнын æмæ уыдонимæ баст ахсджиагдæр фарстытæ æрбæстон кæнын. Æмбырды рæгъмæ хаст æрцыдис Хетæгкаты Къостайы номыл Дзауы астæуккаг скъола йæ сырæзтæй абонмæ кæй тыхсынц, скъолайы бæстыхай къуындæг кæй у æмæ кълæстæ кæй нæ фаг кæнынц, уыцы фарст дæр. Банысан кæнын хъæуы уый æмæ районы ацы скъоламæ кæй цæуы иууыл фылдæр ахуыргæнинæгтæ, ахуыр дзы кæнынц уырыссаг æфсæддонты сывæллæттæ дæр. Уымæ гæсгæ ахуыргæнджытæ æмæ ахуыргæнинæгтæ дæр ахуыры рæстæджы æййафынц зындзинæдтæ. Гаглойты Алан уæд бацыд æмæ бабæрæг кодта скъолайы уавæртæ æмæ ныфс бавæрдта, ацы азы кæронмæ скъоламæ кæй бафтаудзысты ног бæстыхай.
Бирæ нæ рацыд уыцы æмбырдæй æмæ ныридæгæн аразджытæ æрæвнæлдтой скъолайы ног бæстыхай аразынмæ. Уый æрбафтаудзысты, скъолайы нырмæ цы хæрæндон уыдис, уымæ æмæ дзы сараздзысты хæринаг цæттæгæнæн къæбиц æмæ ахуырдзау фæсивæд кæм басихор кæной, ахæм уæрæх хæрæндон. Йæ сæрмæ, дыккаг уæладзыджы та уыдзысты кабинеттæ æмæ цалдæр къласы. Ацы хъуыддагыл тынг фæцин кодтой районы цæрджытæ, уæлдайдæр ахуыргæнджытæ æмæ ахуырдзау фæсивæд. Ныртæккæ кусджытæ техникæйы руаджы бацæттæ кодтой арæзтады бындур бетон кæнынмæ. Скъолайы арæзтады кусынц бынæттон кусджытæ.
ЦХУЫРБАТЫ Ларисæ
