Ацы аз Къуайсайы Хаджеты Таймуразы номыл астæуккаг скъолайы къæсæрæй фыццаг хатт бахызтысты 15 фыццагкъласоны. Уыдонæн арфæйы ныхæстæ загъта скъолайы директор Хуыгаты Суликъо. Уый банысан кодта, зæгъгæ, ахуыргæнинагæн йæ царды ахсджиаг бынат ахсы, ахуыры азы фыццаг бон.
«Арфæ кæнын, мæнæ абон цы кæстæрты тыххæй æрæмбырд стæм, уыдонæн. Фæнды мæ зæгъын уый, æмæ ацы кæстæртæн сæ рæстæг цъус мæгуырау кæй у, Украинæйы зæххыл цы сæрмагонд æфсæддон операци уагъд цæуы, уый тыххæй. Не скъолайы ахуыргæнджытæ сты хорз специалисттæ, фæлæ сæм хатын, цæмæй сæ куыст ноджы хуыздæр æххæст кæной æмæ ацы кæстæртæн раттæм хорз хъомылдзинад, зонындзинæдтæ, уымæн æмæ нæ сомбон баст у ацы кæстæртыл. Арфæ кæнын, абон ацы бæрæгбоны рæстæджы нæ фарсмæ чи ‘рбалæууыд, уыцы уазджытæн, афтæ ма республикæйы æмæ Дзауы районы къухдариуæггæнджытæн, скъолайы ахуыргæнджытæн æмæ ахуыргæнинæгтæн», – дзырдта Хуыгаты Суликъо.
Уыцы бон ма фыццагкъласонтæн арфæйы ныхæстæ загъта нæ республикæйы Парламенты транспорт, энергетикæ æмæ сæудæджерады комитеты сæргълæууæг Тедеты Руслан. Депутат арфæйы ныхæстæ загъта скъолайы фыццагкъласонтæн æмæ æмткæй скъолайы ахуыргæнинæгтæ æмæ ахуыргæнджытæн. Банысан кодта, зæгъгæ, ацы бон уæлдай циндзинад æрхæссы канд ахуыргæнинæгтæн нæ, фæлæ ахуыргæнджытæ æмæ ныййарджытæн дæр. Дзауы районы администрацийы къухдариуæггæнæджы номæй фыццагкъласонтæн бæрæгбонон лæвæрттæ бакодта районы администрацийы ахуырады хайады сæргълæууæг Джиоты Алексей.
Фыццагкъласонтæн ма арфæйы ныхæстæ загъта Къуайсайы администрацийы сæргълæууæг Хуыгаты Алан дæр. Йæ цæст сын йæ зæрдæ бауарзта, цæмæй суой сæ Фыдыбæстæйы аккаг кæстæртæ. Ацы аз уымæн йæхи лæппу дæр ис фыццагкъласонты ‘хсæн.
Уый фæстæ мадзалы хайадисджытæ иу уысм æмырæй алæугæйæ, ссардтой Беслæны теракты фæмардуæвджыты рухс нæмттæ.
Мадзалы кæрон æмдзæвгæтæ бакастысты мадзалы сæйраг хайадисджытæ æмæ уый фæстæ уыдонæн айзæлыд фыццаг дзæнгæрæг.
P/S Нæ республикæйы сæргълæууæджы егъау æххуысы фæрцы ацы аз скъолайы фыццаг хатт фæзынд физикæйы предметон кабинет. Уый, кæй зæгъын æй хъæуы, фæахъаз уыдзæн скъолайы ахуыргæнинæгты хорз ахуырæн.
ТАНДЕЛАТЫ Виленæ
