Уыцы бон дæр та хъæлдзæг, худгæ цæстæнгас уыд, сæ уарзон скъоламæ чи тындзыдта, уыцы æвзонг лæппутæ æмæ чызджытæн. Сæ мидбылхудт æмæ зæрдиаг ныхасæй рæвдыдтой кæрæдзи, алчи дæр сæ уыд бæрæгбонвæлыст, алчи дæр сæ цин кодта, ахуыры фæндагыл та кæй æрлæудзысты, сæ уарзон ахуыргæнджытæ та сæ зонындзинæдтæй кæй хайджын кæндзысты. Афтæ райдыдта ног ахуыры азы цытæн бæрæгбонон мадзал Цхинвалы районы Къостайыхъæуы астæуккаг скъолайы æмæ кæрты къласгай æрлæууыдысты сæ ахуыргæнджытимæ. Рахастæуыд Хуссар Ирыстоны Паддзахадон тырыса, йæ уæлвæд та айзæлыдысты нæ республикæйы гимны зæлтæ.
О, бæрæгбон у ацы бон, фæлæ уыимæ иумæ хъыджы бон дæр. 2004 азы Беслæны цы æвирхъау теракт уыд, уый базмæлын кодта æнæхъæн рæстагон адæмты. Рохгæнæн нæй, Украинæйы зæххыл чи бабын, уыцы ирон хъайтар лæппуты дæр. Ацы зæххыл йе ‘взонг цард сæрибардзинады тыххæй нæ бавгъау кодта Къостайыхъæуы цæрæг Лохты Алим дæр. Уый йæ амæлæты фæстæ хорзæхджын æрцыд «Хъайтардзинады» орденæй æмæ йæ нæ Республикæйы Президент та схорзæхджын кодта «Уацамонгæ»-йы орденæй. Æрæмбырдуæвджытæ иу уысм æдзæмæй алæугæйæ ссардтой фæмардуæвджыты рухс нæмттæ.
Райдыдта бæрæгбонон мадзал æмæ ахуырдзау фæсивæдæн арфæйы ныхæстæ фыццаг загъта скъолайы раздæры директор Тыбылты Олег, йæ цæст сын бауарзта, цæмæй сæ ахуыры уой цæвиттойнаг. Уый фæстæ скъолайы ног директор, уæлдæр категорийы ахуыргæнæг Плиты Заирæ дæр зæрдиаг арфæтæ ракодта ахуыргæнинæгтæ, ахуыргæнджытæ æмæ ныййарджытæн, йæ цæст сын бауарзта ахуыры иууыл хуыздæр фæндийæгтæ. Цхинвалы районы администрацийы сæргълæууæг, ацы скъолайы раздæры рауагъдон Бæззаты Инал дæр бузныджы ныхæстæ загъта скъолайы коллективæн ахуыры райдианы сæраппонд æмæ йæ бафæндыд, цæмæй дарддæр кадимæ хæссой скъолайы ном. Арфæйы ныхæстæ ма загътой ахуыры хайады сæргълæууæг Мæргъиты Нелли, фыццагкъласонты ахуыргæнæг Козаты Валентинæ æмæ æндæртæ.
Сæхи рады ахуырдзаутæ дзырдтой æмдзæвгæтæ, зарыдысты зарджытæ, сæххæст кодтой цалдæр кафты. Уæдмæ хистæркъласон Хъабанты Альберт йæ хъæбысмæ систа фыццагкъласон Хъабанты Миланæйы æмæ уый ныццагъта ахуыры азы фыццаг дзæнгæрæг.
Хуыбиаты Никъала
Comments are closed, but trackbacks and pingbacks are open.