Уый æмбаргæйæ журнал «Фидиуæг»-ы сфæлдыстадон къорд арæх уадзы фембæлдтытæ республикæйы районты хъæуты цæрджытимæ. Абоны онг уал ахæм фембæлдтытæ уыд Ленингор, Дзау æмæ Знауыры райцентры. Фембæлдысты ма Къуайсайы цæрджытимæ дæр. Æппынфæстаг та фæуазæг сты Цъинагары хъæуы цæрджытæм. Хайад дзы истой Хетæгкаты Къостайы премийы лауреат, поэт Чехойты Оля, Джусойты Нафийы премийы лауреат, фыссæг Наниты Асиат, фыссæг æмæ æхсæнадон активон архайæг Тедеты Индирæ, æвзонг поэттæ Елбачиты Алыксандр æмæ Бязырты Павел. Афтæ ма журнал «Фидиуæг»-ы сæйраг редактор, поэт, преми «Булæмæргъ»-ы лауреат Годжыцаты Нелли, поэзийы хайады кусæг Хъодалаты Мария æмæ зарæггæнæг Дзукъаты Ланæ.
Цы программæимæ фæуазæг сты, уым уыд æмдзæвгæтæ, ирон мыхуыры историйы цаутæй скъуыддзæгтæ. Фæлæ уал райдианы уазджытæ бацыдысты, Цъинагары хъæуы гуырдзиаг-ирон ныхмæлæуды рæстæджы цы авд нæлгоймаг фæмард знаджы нæмыгæй, уыдоны иумæйаг цырты размæ. Ам æрымысыдысты Беслæны трагедийы амæттæгты рухс нæмттæ дæр.
Цъинагары хъæуы Культурæйы хæдзармæ бирæ адæм не ‘рбамбырд. Фысымтæ куыд загътой, афтæмæй хъæуы кæрон уыцы рæстæджы хъæд сыгъд æмæ адæмы фылдæр хай уырдæм афæдис сты. Уым ма уыдыстæм, афтæмæй æрбайхъуыст зынгсирвæзты ныхмæ тохгæнджытæ хуыссынгæнджытæ, дам, арт ахуыссын кодтой. Табу Хуыцауæн!
«Фидиуæг»-ы коллективыл алы хатт дæр цæрджытæ хъарм æнкъарæнтимæ фембæлынц. Ацы хатт дæр та афтæ рауад. Уазджытæй алчи дæр загъта йæ зæгъинæгтæ. Чехойты Оля, Наниты Асиат, Тедеты Индирæ, Елбачиты Александр, Хъодалаты Мария, Бязырты Павел, Дзукъаты Ланæ. Газет «Хурзæрин»-ы номæй та ныхасы рацыдтæн мæхæдæг.
Фысымтæ дæр раныхас кодтой хъæуы скъолайы директор æмæ хореографион ансамбль «Арвырон»-ы къухдариуæггæнæг Гуссойты Ласко, хатыр ракуырдта уазджытæй, Цъинагары зонæйы цæрджытæ се ‘ппæт кæй не ‘рбацыдысты, клуб йемыдзаг кæй нæу адæмæй, уый фæдыл. Ласко ногæй «Фидиуæг»-ы коллективы Цъинагармæ фæхуыдта ноябры мæйы. Уазджытæ дæр ныфс бавæрдтой, ног хъæлдзæг программæимæ сæм кæй фæуазæг уыдзысты.
Фембæлд хъарм уавæрты цыд, фæлæ дзы уæддæр сæйраг уыд, Ирыстоны зынгæ хæрзаудæн архайæг Чехойты Оля хъæуы цæрджытæн афæдзы дыккаг æмбисæн йæхи хардзæй 111 журналы кæй рафыста, уый.
Меценатæн стыр бузныджы ныхæстæ загътой скъолайы ирон æвзаг æмæ литературæйы ахуыргæнæг Хъодалаты Мери, Бестауты Емзар – клубгæс æмæ Хуыбылты Маирбег – хъæусоветы сæрдар.
P.S. «Фидиуæг»-ы редакцийæн балц саразынæн баххуыс кодтой Хицауады сæрдар Джуссойты Константин æмæ Хицауады Администрацийы кусæг Плиты Инал.
Цъинагары
Скъолайы агъуысты ныртæккæ цæуы капиналон цалцæггæнæн куыстытæ. Уыдон Зонындзинæдты бонмæ кæронмæ нæ бахæццæ сты. Ныр сывæллæттæ ахуыр кæндзысты дыууæ сменæйæ. Не сцæттæ ис ног ахуыры азмæ се спортивон зал дæр. Ахуыргæнинæгтæн нæй фадат æмбæлон æмвæзадыл физкультурæйы уроктæ уадзынæн. Спортзал ис, фæлæ нæ кусы.
Объект арæзт æрцыд цалдæр азы размæ. Цъинагайрæгты цинæн кæрон нал уыд. Бæстыхай рауад аив, раивтой йын йæ агъуыст, бакодтой йыл рудзгуытæ, бауагътой йæм инженерон-коммуникацион хызæгтæ, архайдтой хъæрмадон системæ саразыныл. Мидæггагон куыстытæ дæр бæргæ бакодтой, фæлæ уæддæр спортзал не скуыста.
Спортивон залмæ хъуамæ бахизæн уа скъолайæ, йæ мидæг хъуамæ уа алы уавæртæ дæр. Залы фадат хъуамæ уа хъазæн зымæгон æмæ къæвдабонты футболæй, волейболæй, баскетболæй. Хъуамæ дзы уа физикон цæттæдзинады ахуыргæнæн хатæн. Скъоладзаутæн та – дзаумæттæивæн, хинайæн куыд лæппутæн, афтæ – чызджытæн дæр. Йæ рæстæджы зал эксплуатацимæ лæвæрд не ‘рцыд, уымæн æмæ дзуапп нæ лæвæрдта уæлдæр æрнымад нормæтæн. Объектаразджытæ сæ куыст нывыл нæ бакодтой.
Фыццаджыдæр уал, агъуысты сæр раст æмбæрзт не ‘рцыд. Æвзæр боныгъæдты йæ систыл фæлæдæрсы къæвдайы дон æмæ систæ сты скъуыдтæ. Объект куы арæзтой, уæд бирæ къуыхцытæ ауагътой инженерон-хъармгæнæн куыстыты дæр. Скъолайы директор Гуссойты Ласко бæргæ дзырдта, уайдзæфтæ дæр сын кодта, фæлæ йын аразджытæ зæрдæ æвæрдтой, зæгъгæ, спортивон зал куы сырæза, уæд дзы æппæт фадæттæ дæр уыдзæн. Фæстагмæ куыд рабæрæг, афтæмæй уал азы дæргъы кæмæ æнхъæлмæ кастысты, уыцы спортивон зал не сбæззыд физикон цæттæдзинады уроктæ уадзынæн.
Ацы проблемæ аиуварс кæныныл зæрдиагæй архайдта Ленингоры районы сæргълæууæг Гæджиты Иларион дæр. Ныфс бавæрдта, Цъинагары скъолайы ахуыргæнинæгтæн сæ бæллиц кæй сæххæст кæндзæнис республикæйы разамынады æххуысæй. Æрæджы сæм уыдис Паддзахады сæргълæуæг Гаглойты Алан. Уый сын ныфс бавæрдта. Æмæ ныр спортивон зал бакæнынмæ æнхъæлмæ кæсынц канд ахуыргæнинæгтæ нæ, фæлæ ма хъæуы фæсивæд дæр.
Æнæуи скъолайы кæрты ис сæрмагонд спортивон фæзуат, фæлæ боныгъæд æвзæр куы вæййы, уæд ахуыргæнинæгтæн уроктæ ауадзынц скъолайы коридоры. Скъолайæн йæ фыццаг уæладзыг дæр цалцæггæнинаг у.
УАЗÆГТЫ Марфа
