Донецкы Адæмон Республикæйæ лигъдæттæ цæрынц Цхинвалы хорз уавæрты. Бирæты дзы куыстæй дæр сифтонг кодтой æмæ сæ сывæллæттæ та ахуыр кæнынц столицæйы скъолаты, – радзырдта «РЕС»-æн Уæлвæткон уавæрты министрады планкæнынады хайады хистæр Цхуырбаты Сергей.
Уый банысан кодта, зæгъгæ, 42 лигъдонæй ма Цхинвалы баззад 15 адæймаджы. Иннæтæ аскъуыддзаг кодтой сæ райгуырæн бæстæмæ аздæхын.
«Уыдон сты æхсæз сывæллоны, æмæ кусын чи райдыдта, ахæм хистæр кары фараст адæймаджы. Активонæй хайад исынц æхсæнадон царды. Иу дзы сорганизаци кодта къаннæг бизнес. Æмæ сывæллæттæ та ахуырад исынц, цæуынц скъолатæм, сабидæттæм, афтæ ма алыгъуызон кружоктæм, цыран рæзын кæнынц сæ курдиат. Зæгъæм, Михаил Логачев хъазы шахмæттæй æмæ бирæ хæттыты рамбылдта алыгъуызон турниртæ», – радзырдта Цхуырбайы фырт.
Лигъдæттæ сты паддзахадон ифтонгадыл, уырдæм хауынц цæрæнуат æмæ хæлцæн фидыны фарстатæ дæр.
Уæ зæрдыл уын лæууын кæнæм, 26-æм февралы Цхинвалмæ сэвуакаци кодтой 42 адæймаджы, уыдонæй 24 уыдысты 12 азы онг кæуыл цæуы, ахæм сывæллæттæ. Лигъдæтты æрцæрын кодтой уазæгдон «Виктория»-йы, цыран уыдон цæрынц абоны онг дæр.
