Радон хатт та нæ республикæйы сты Уæрæсейы Федерацийы Уæлвæткон уавæрты министрады центр «Лидер»-ы специалисттæ, цæмæй нæ республикæйы территорийы дарддæр минæтæй сыгъдæг кæной. Фыццаг хатт нæм уыдон æрцыдысты 2016 азы. Æртæ азы дæргъы сын бантыст сæдæ гектары бæрц территори минæтæй ссыгъдæг кæнын æмæ 700 рæмудзæн æрмæджы бæрц сæдас кæнын. Банысан кæнын хъæуы уый, æмæ «Лидер» нымад кæй цæуы иууыл мобилондæр æмæ ахсджиагдæр дæлхайыл Уæрæсейы Федерацийы Уæлвæткон уавæрты министрады.
28 апрелы уæрæсейаг сапёртæ æрлæууыдысты сæ куысты уæлхъус. Уыдон сæ разы æрæвæрдтой хæс, цæмæй рæмудзæн æрмæджытæй ссыгъдæг кæной 20,2 гектары бæрц территори. Сапертæ сæ куыст райдыдтой Зары фæндаджы алыварс, кæцыйы бацæуæнты 2008 азы хæстон архайдтыты агъоммæ æрцыдысты минæтæ æвæрд. Абоны онг уал цы куыст бакодтой, уыимæ 23 майы базонгæ кодтой нæ республикæйы Президент Бибылты Анатолийы.
Республикæйы сæргълæууæг уæрæсейаг специалисттимæ фембæлд Зары хъæуы. Центр «Лидер»-ы сæргълæууæг Алексей Завацкий бæстæйы сæргълæууæгæн фехъусын кодта, зæгъгæ, абоны бонмæ ссардæуыд æмæ æдас æрцыдысты 74 рæмудзæн æрмæджы бæрц. Афтæ ма Алексей Завацкий банысан кодта, зæгъгæ, ифтонг кæй сты æппæт хъæуæг техникæйæ.
Президент Бибылты Анатоли бузныг загъта сапёрты къордæн. «Сымахæн уæ куысты иууыл ахс-джиагдæр ныртæккæ у, цæмæй республикæйы территори кæронмæ сыгъдæг æрцæуа рæмудзæн æрмæджытæй. Кæй зæгъын æй хъæуы, сымахæн ахсджиаг у куысты рæстæджы хи сæрмагонд æдасдзинад бахъахъхъæнын. Тынг ахсджиаг æмæ хъæуæг куыст кæны уæ къорд нæ республикæйы æппæт цæрджытæн», – банысан кодта бæстæйы сæргълæууæг.
Президент ма уæрæсейаг сапёртæн фехъусын кодта, цæмæй нæ республикæйы Уæлвæткон уавæрты министрады кусджытимæ иумиаг агурæн куыстытæ бакæной, Зары хъæуы территорийы цы полигон ис, уым. “Уыцы ран æнæмæнгхъæуæг сты уыцы куыстытæ, уымæн æмæ ныгуылæнæрдыгæй фылдæр срæмыгъдтытæ уыд фыййæутты æмæ цуангæнджыты ‘хсæн”, – фехъусын кодта Президент Бибылты Анатоли.
ТАНДЕЛАТЫ Виленæ
Comments are closed, but trackbacks and pingbacks are open.