Президент Гаглойты Алан азылд Хуссар Ирыстоны Цхинвалы æмæ Знауыры районты арæзтцæуæг объекттыл.
Паддзахады сæргълæууæг базонгæ ис, паддзахадон унитарон куыстуат «Водоканал» цы куыстытæ æххæст кæны Къостайыхъæумæ донуадзæн хахх ауадзыны фæдыл, уыдонимæ.
Кустуаты сæргълæууæг Сиукъаты Иван куыд радзырдта, афтæмæй магистралон донвæд Цхинвал-Къостайыхъæу донуадзæн ифтонг кæндзæн Тъбет æмæ Къостайыхъæуы.
«6 км дæргъ хæтæл зæххы бын фæуыдзæн азы кæронмæ. Уыимæ иумæ сараздзыстæм цъайтæ. Кусынæн бæзгæ бонты æппæт куыстытæ дæр хъуамæ бакæнæм», – загъта Сиукъаты Иван.
Доны цухдзинад рагæй æвзарынц ацы хъæуты цæрджытæ. Дон уырдæм цæуы графикмæ гæсгæ – æртæ бон иу хатт.
Паддзахады сæргълæууæджы бахæсмæ гæсгæ хъуамæ æппæт æнæмæнгхъæуæг куыстытæ бакæной ацы проблемæ аскъуыддзаг кæнынæн.
«Ацы проекты фæлгæтты иннæ азмæ план цæуы донцъирæн станц саразын, уымæн æмæ дон куыд æмбæлы, афтæ нæ цæуы, къуылдымджын бынатмæ гæсгæ. Донцъирæн станц скусын кæнын фæнд кæнæм иннæ азы майы», – загъта Сиукъаты Иван.
Уый ма фехъусын кодта, зæгъгæ, 2024 азы январы паддзахадон унитарон куыстуат «Водоканал» фæнд кæны донцъирæнтæ балхæнын æмæ сæ æрласдзысты 40-50 бонмæ.
Президент бацымыдис кодта, зæгъгæ, хъæуы цæрджытæн донæй пайда кæныны æмбæлон гуырахст лæвæрд цæудзæн æви нæ. «Водоканал»-ы сæргълæууæг куыд банысан кодта, афтæмæй проектмæ гæсгæ йæ хъомысад суткæйы дæргъы у 2100 м³, фæлæ йæ дарддæр фæнд кæнæм фæфылдæр кæнын.
«Мах уынаффæ райстам донцъирæны станц суткæйы дæргъы 3000 кубикон метрæн сæвæрын, хъæуты цæрджыты нымæц куыд фылдæр кæна, уæд цæмæй доны цухдзинад ма æййафой», – загъта уый.
Паддзахады сæргълæууæджы иннæ пункт уыд Дзагъинайы хъæуы хиды арæзтад. Уый реконструкци цæуы Знауыры районы цæрæнуатон-коммуналон хæдзарады тыхтæй.
Иу хъæуы иннæимæ цы хид иу кодта, уымæн йæ иу хайæн разиан кодтой уалдзыгон донивылдтытæ.
Знауыры районы администрацийы сæргълæууæг Гобозты Алан куыд радзырдта, афтæмæй дыууæ къуыримæ фæуæрæхдæр кодтой хиды æмæ ма уæрæх æрцыд хиды фæзуат æмæ фидар ныппæрстой уæлæмхас донуадзæн хæтæлтæ дæр уалдзыгон донивылдтыты рæстæгæн.
Гаглойты Алан райгондæй баззад бакæнгæ куыстытæй æмæ бузныг загъта, чи дзы кусы, уыдонæн.
Банысан кæнын хъæуы, хиды реконструкцийы фарст æвæрд кæй æрцыд Знауыры районы цæрджытимæ Президенты фембæлды рæстæджы ацы аз октябры мæйы. Паддзахады сæргълæууæг бынаты радта хъæугæ хæслæвæрдтæ. Уыдон сæххæст кæнынмæ уайтагъд æрæвнæлдтой Цæрæнуатон-коммуналон хæдзарады кусджытæ.
