28-æм июны Президент Гаглойты Алан бабæрæг кодта Республикон бирæпрофилон медицинон центры куысты уавæр
Инспекцион азылды хайад райста Парламенты Социалон политикæ æмæ æнæниздзинад хъахъхъæныны комитеты сæргълæууæг Плиты Александр дæр. Уый тыххæй нын фехъусын кодтой Президенты пресс-службæйы.
Гаглойты Алан базонгæ ис, рынчынтæн медицинон лæггæдтæ бакæнын цы æмвæзадыл ис, афтæ ма сæ куыд райсынц æмæ сын цы уавæрты хос кæнынц стационары, уыдæттимæ. Паддзахады сæргълæууæг, фыццаджыдæр, бацымыдис кодта медицинон ифтонгады куыстхъомдзинадмæ. Уый федта реанимаци æмæ анестезиологийы блоктæ, афтæ ма хирурги æмæ поликлиникæйы хайæдтæ. Рынчындоны кусджытæ се рвылбонон куысты цы проблемæтыл æмбæлынц, уыдоныл дзургæйæ, рахицæн кодтой цалдæр ахсджиаг фарсты. Уыдонæй сæ иу у поликлиникæ æмæ стационары арæхдæр чи хъæуынц, уыцы диагностикон ифтонгад хæлд кæй у, уый. Ныр æртæ азы дæргъы хæлд у стационарон рентгенисæн аппарат – фехæлд йæ пульт. Уымæ гæсгæ медперсоналы бахъæуы цæугæ мобилон аппаратыл кусын. Уый та бирæ куыстытæ кæнынæн у æдых æмæ уый фæстиуæгæн ацы аппарат дæр арæх фехæлы. РБМЦ-йы техникон кусæг куыд банысан кодта, афтæмæй ацы ифтонгад уагъд кæм цæуы, уыцы организацимæ бахатыдысты, цæмæй сын сæ хæлд пультæн самал кæной программон ифтонгад, (программное обеспечение) фæлæ нырма ницы дзуапп райстой.
«Санкциты фæстиуджытæм гæсгæ уыцы процесс бирæ фæвазыгджындæр фæсарæйнаг организацитимæ бадзырдтæ аразыны тыххæй. Ацы хъуыддаджы финансон фарст сæйраг нæу. Рентген-аппарат цæмæй скуса, уымæн æрмæстдæр хъæуы йæ программон ифтонгад раивын.
ИВЛ-аппараттæ дæр хæлд сты æмæ сæ хъæуы техникон æгъдауæй цалцæг кæнын. Афæдз иу хатт фæцæуынц ивд æгас медицинон ифтонггарзы хъæуæг æрмæджытæ. Реанимацион хайады экстренон æмæ пъланон операцитæ кæныны тыххæй къуырийы æмгъуыдмæ скусдзæн сæ медицинон ифтонгад», – банысан кодта техникон кусæг.
Операцион блокы та хæлд у наркоздæттæн аппарат. Туаггуыр чи радæтты, уыцы датчиктæ фехæлдысты афæдз æмæ æрдæджы размæ. Уый фæдыл цы заказ сарæзтой, уый ныридæгæн Сербийæ æрхæццæ Мæскуымæ æмæ ног къуырийы хъуамæ æрхæццæ уа нæ республикæмæ.
Гаглойты Алан карзæй бафхæрдта, медицинон ифтонгадæн дзуапп чи дæтты, уыцы кусджыты архайд æмæ сын бахæс кодта, цæмæй æвæстиатæй номхыгъд саразой æнæмæнгхъæуæг æрмæгæн. «Аслам аргъæй балхæнæн кæмæн ис, уыцы хæйтты аххосæй ифтонгады куыст куыд æрурæдтат? Нæ республикæйы цæрджытæн уый аххосагæн æнæмæнгхъæуæг медицинон æххуыстæ нæ цæуынц, уагъд нæ цæуынц пъланон операцитæ дæр. Уымæ гæсгæ фæхъæуы уæлдайджынтæй самал кæнын, ныр цух цæмæй стут, ахæм æнæмæнгхъæуæг æрмæджытæ. Цæмæй уæ куыст урæд ма цæуа, уый тыххæй уæ заказты номхыгъдмæ бахæссут, цы хъæуы, уымæй фылдæр æрмæджытæ. Ацы фарст аскъуыддзаг кæнут тагъд рæстæджы, нæй гæнæн æмæ ахæм ахаст уа куыстмæ», – загъта Президент.
Уымæй дарддæр ма туджы биохимийы анализтæ ныртæккæ лабораторийы бæрæг цæуынц æрдæгавтомат ифтонггæрзтыл æмæ къухæй. Профилон хайады кусджытæ уый тыххæй куыд бамбарын кодтой, афтæмæй уыдон кусынц штатон режимы æмæ тестты номхыгъд иууыл æххæст нæ цæуынц, уымæн æмæ хъæуы специалист æрхонын Уæрæсейæ, цæмæй та сын сæ техникæмæ æркæса æмæ ифтонг уа.
Техникы ныхæстæм гæсгæ, ифтонггæрзтæн диагностикæ аразын хъæуы афæдз иу хатт. Раивын фæхъæуы фильтртæ, кюветтæ æмæ датчиктæ. Дохтыр-лаборанттæ бамбарын кодтой, зæгъгæ, æгас республикæйæн ахæм аппарат у æрмæстдæр иу æмæ йыл уымæ гæсгæ цæуы стыр уæз. «Махæн бастдзинад ис нæ специалистимæ, уый хъуамæ æрцæуа ног къуыри», – банысан кодтой дохтыртæ.
Паддзахады сæргълæууæгæн ма фехъусын кодтой, зæгъгæ, æнæмæнгæй кæй хъæуы коагулограммæйы тыххæй анализатор самал кæнын лабораторийæн. Уымæй дарддæр ма поликлиникæйы хайады нæ кусы флюорограф, цифрæйон пленкатæ сын кæй нæ фаг кæнынц сæ компьютертæн, уый аххосæй.
Гаглойты Аланмæ ма медперсонал бахатыдысты, цæмæй сын самал кæной нырыккон хуыздæр УЗИ-аппараттæ. Кусæг дохтыртæ куыд бамбарын кодтой, афтæмæй сæ аппараттæ базæронд сты æмæ сыл гъæдджын диагностикæ уагъд нæ цæуы, ныры бæрзонд стандарттæн дзуапп нæ дæттынц. Нырыккон УЗИ-аппаратурæйыл куыст куы цæуа, уæд сæ диагностикон иртæстыты гъæд дæр бæрæг фæхуыздæр уыдзæн.
Цæрджыты ма тыхсын кæны рынчындонмæ æрбауадзыны режим. Республикон бирæпрофилон медицинон центры территоримæ машинæйыл бацæуыны бар нæ фæдæттынц пациенттæн. Уый фæстиуæгæн уæззау рынчынты бахъæуы фистæгæй бацæуын исæн хайадмæ. Машинæ лæууæн бынæттæ та бацахсы кусджыты автотранспорт. Гаглойты Алан бахæс кодта, цæмæй сæвзæргæ уавæрмæ сæ хъус æрдарой æмæ фарст скъуыддзаг æрцæуа. «Уый куыд гæнæн ис æмæ æххуыс кæмæн хъæуы, ахæм уæззау рынчын йæхæдæг бацæуа исæн хайадмæ? Ацы фарст хъæуы аскъуыддзаг кæнын æвæстиатæй», – загъта Президент.
Бæстæйы сæргълæууæг йæ инспекцион азылды фæстæ бахæс кодта, цæмæй цы проблемæты фæдыл дзырдтой, уыдон æвæстиатæй æххæст æрцæуой æмæ банысан кодта, сæрмагондæй йæхæдæг кæй бабæрæг кæндзæн, бахæсгонд фарстатæ куыд æххæст цæуынц, уый.
