17 майы нæ бæстæйы сæргълæууæг Гаглойты Алан инспекцион азылд сарæзта Цхинвалы арæзтцæуæг объекттыл – «Цæгаттаг» микрорайоны ног хиды арæзтад, Бушы, Козайы фырты æмæ Юри Гагарины уынгты арæзтæдтыл, афтæ ма федта Текстилы районы ног бирæуæладзыгон хæдзæртты арæзтадон куыстытæ куыд цæуынц, уый. Объектты куыстытæ цы æмгъуыдмæ фæуыдзысты, уый тыххæй йæ лæмбынæг базонгæ кодтой Арæзтады министр Елдзарты Константин æмæ Автомобилон фæндæгты арæзтад æмæ эксплуатацийы фæдыл комитеты сæрдар Гæбæраты Алан.
Президенты бахæсмæ гæсгæ хиды ног ахизæн саразыны тыххæй уынаффæ ист æрцыд ацы фадыджы шофыртæ сæ развæндаг æвзæр кæй фæуынынц æмæ дзы арæх аваритæ кæй æрцæуы, уымæ гæсгæ.
Автомобилон фæндæгты арæзтады сæргълæууæг Президентæн баныфсæвæрдта хиды арæзтадон куыстытæ августы райдианмæ кæй фæуыдзысты, уымæй.
Елдзарты Константин банысан кодта, зæгъгæ, столицæйы уынгты æппæт куыстытæ дæр æххæст цæуынц графикмæ гæсгæ. Уый ма радзырдта куыстыты рæстæджы цы къорд проблемæтыл æмбæлынц, уыдоны тыххæй дæр.
Цхинвалы Æфсæнвæндаджы уынджы цæрæг бахатыд Президентмæ ахæм куырдиатимæ, цæмæй сын сцалцæг кæной сæ уынг. Паддзахады сæргълæууæг ын загъта, зæгъгæ, уынг хæрзарæзт æрцæудзæн 2025 азы. Афтæ ма сылгоймагæн баныфсæвæрдтой, тæрккъæвдаты рæстæджы йæ хæдзармæ дон кæй бакæлы, уыцы проблемæ иуварс кæй æрцæудзæн, уымæй дæр.
Раздæры бигæдзаумæтты фабрикæйы бынаты ивгъуыд аз кæронмæ арæзт фесты дыууæ ног корпусы, ноджы ма дыууæ бирæуæладзыгон хæдзары та арæзт æрцæудзысты 2025 азы онг.
Арæзтады министр фехъусын кодта, зæгъгæ, корпустæй иу эксплуатацимæ лæвæрд æрцæудзæн 2023 азы. Уый ма банысан кодта, зæгъгæ, дыккаг корпусæн дæр проект ныридæгæн цæттæ у. Ныртæккæ æвзæрст цæуы бирæфатерон хæдзар арæзт кæм æрцæудзæн, уыцы бынат.
