Хуссар Ирыстоны территорийыл нымæцон телеуынынад къуыхцытимæ кæй кусы, уый тыххæй дзырд цыдис Парламенты сæудæджерад, арæзтад, транспорт, бастдзинад æмæ æрдзон ресурсты фæдыл комитеты рабадты. Хайад дзы райста Бастдзинад æмæ дзыллон коммуникациты комитеты сæргълæууæг Джиголаты Хасан дæр. Парламентон комитеты сæрдары хæдивæг Сланты Иван бацымыдис кодта, нымæцон алæвæрдты къуыхцытæ цæмæн вæййы æмæ бафиппайта, зæгъгæ распубликæйы иуæй-иу районты та не ‘вдисы бынæттон телеканал. Джиголаты Хасан сдзуапп кодта, зæгъгæ къуыхцыты аххосæгтæ ссардтой æмæ сæ аиуварс кодтой: «Паук»-ы районы нæ системæйыл чидæр сывæрдта «точки доступа». Уыдон уыдысты адæттæнтæ, кæцытæ хъыг дардтой сигналы. Мах сæ ссардтам, иугай сæ рахицæн кодтам æмæ къуыхцытæ иуварс æрцыдысты.
Депутат Санахъоты Давид ацы цау банымадта диверсийыл, æмæ бафарста, зæгъгæ, датчиктæ чи сæвæрдта, уыдон ссардтой? Бахъаты хъæуы цæрджытæ дæр хъаст кодтой телеуынынады къуыхцыты æмæ сæм бынæттон телеуынынад кæй нæ кусы, уый тыххæй. Джиголаты Хасаны ныхæстæм гæсгæ хъуыддаг лæвæрд æрцыдис прокуратурæмæ. Проблемæтæ ма æвзарын кæнынц зæронд антеннæтæ дæр, уымæн æмæ нымæцон алæвæрдтæ нæ ахсынц. «Уымæй дарддæр ма æрæджы тыхджын тæрккъæвдаты æмæ арвнæрды рæстæджы басыгъдысты æхсæз адæттæны (передатчик). Арвыстам сæ цалцæг кæнынмæ. Ныфс нæ ис æввахс рæстæджы сæ кæй æрласдзыстæм æмæ сæ кæй сæвæрдзыстæм, уымæй. Бахъаты хъæуы дæр проблемæ иуварсгонд у ног антеннæтæ æвæрд кæмæн ис, уыдонæн сæ телевизортæ кусынц хорз», – банысан кодта Джиголаты Хасан.
Нæ уацх.
