«Бастдзинад æмæ массон коммуникациты комитет 2018 азы паддзахадон бюджетмæ бахаста 2018 азы 3 314 862 сомы, пенсион фондмæ та – 2 923 219 сомы», – фехъусын кодта ацы комитеты сæргълæууæг Джиголаты Хасан йæ хыгъдон доклады.
Уый æрдзырдта йæ дæлбар комитеты хæстыл æмæ куыд æххæст цæуынц, уыцы фарстатыл. «Барадон-нормативон нормæтыл æнцойгæнгæйæ дзуапп дæттæм информацион технологитæн, электробастдзинад, постон-телеграфон бастдзинад, телеуынынады алæвæрдтæн æмæ уыдон ног технологитæм ракæнынæн. Комитеты дæлбаруæвæг ПУК «Постон-телеграфон службæ» æмæ ПУК «Электробастдзинады телекоммуникацион компани» субсидитæ исы паддзахадон бюджетæй. 2018 азы «Электробастдзинады телекоммуникацион компани баивта нæ горæты 6 уынджы телеграфон кабелтæ. Цалцæг æрцыдысты Хицауады хæдзары, Хъахъхъæнынады министрад æмæ Тубдиспансеры стационарон телефоны бастдзинады хæххытæ».
Джиголаты Хасаны информацимæ гæсгæ ПУК «Постон-телеграфон службæ» 2018 азы активонæй куыста бынæттон æмæ уæрæсейаг мыхуыр рафыссыныл. Цæрджытæн лæггад кодта фыстæджытæ, бандеролтæ æмæ посылкæтæ æрвитыны хъуыддаджы. Пенситæ æмæ æндæр социалон лæвæрд цыдысты сæ хицæуттæн.
ИНТЕРНЕТ- БАСТДЗИНАДЫ ЛÆГГÆДТÆ
Интернет æмæ мобилон бастдзинады лæггæдты фæдыл тарифон опцитæ фæ-къаддæр кæнын æмæ лæггæдты гъæд фæ-бæрзонддæр кæныныл рагæй куыста Хицауад. Æхгæд акционерон æхсæнад «Остелеком» рагæй ныфс æвæрдта, æмбæлон уагмæ кæй æркæндзæн лæггæдты гъæд. Уый фæдыл бирæ архайдта Бибылты Анатоли, Парламенты спикермæ куы уыд, уæд дæр. Уавæрæй рахизыны нысанæн нæ республикæмæ хуынд æрцыд ног провайдер «Юг-Телеком». Ацы компани кæд бирæ æвзонгдæр у нæ республикæйы архайæг иунæг оператор «Мегафон»-æй, уæддæр ныридæгæн йæхи равдыста æууæнкджынæй интернет-лæггæдты къабазы. Компани ныридæгæн сифтонг кодта горæты 70 проценты кабелон лæггæдтæй. «Юг-Телеком» уæй кæны интернет-лæггæдты дыууæ тарифон планы – 800 æмæ 900 сомы аргъ чи у, ахæмтæ. Ацы оператор нæ республикæмæ æр-бахонынæн æрмæст экономикон нысаниуæг нæй. Компани радта куысты бынæттæ. Сæ куыстмызд хæццæ кæны 25 мин соммæ. Ныртæккæ «Юг-Телеком»-ы лæггæдтæй пайда кæнынц горæты цæрджытæ. Дарддæр уыцы лæггæдтæ сæхиуыл банкъардзысты районты цæрджытæ дæр. Интернеты ног операторы фæзындæн йæ иууыл стырдæр хорздзинад ис уый мидæг, æмæ нырыонг адæм кæд уыцы иу операторы лæггæдтæй пайда кодтой, ома, «Мегафон»-æй æмæ дзы райгонд нæ уыдысты, уæддæр фæрæзтой. Ныр нæ республикæйы разамынды æххуысæй æмæ хайадистæй адæм ацы зындзинад аиуварс кодтой.
НЫМÆЦОН ТЕЛЕУЫНЫНАДЫ СЫРÆЗТ
2018 азы ма Бастдзинад æмæ дзыллон коммуникациты комитеты дæлбар паддзахадон унитарон куыстуат телерадиохызæджы кусджытæ бавнæлдтой нымæцон телеуынынад аразынмæ. Уый реализаци цæуы дыууæ этапæй. Фыццаг этапы, ома, 2018 азы, арæзт æрцыд нымæцон телеуынынады хызæг, фондз объекты скондæй. Базæйон станцтæ арæзт æрцыдысты Ленингоры райцентры, Цъинагар, Гуфта æмæ Малдайы хъæуты бæрзæндтыл, афтæ ма Знауыры поселочы дæр. «Паук»-ы бæрзæндыл дæр монтаж æрцыд мæсыг, ныртæккæ уый фæрцы горæт æмæ Цхинвалы районы хæстæгдæр хъæутæ исынц нымæцон телеуынынады сигнал æмæ сæ бон у кæсын 22 каналмæ.
Дыккаг этапы та, ома, 2019 азы ноджыдæр æнгæс объекттæ æмæ базæйон станцтæ арæзт æрцæудзæн горæт Къуайса, Знауыры районы хъæутæй цалдæры, афтæ ма Теделеты хъæуы бæрзæндыл дæр. Куыддæр базæйон станцтæ арæзт фæуой, афтæ уыдон се ‘ппæт баиу уы-дзысты, «Паук»-ы бæрзæндыл цы 70 метры бæрц антеннæ ис, уымæ.
Джиголаты Хасан ма загъта, зæгъгæ, 2019 азы республикæйы телесигнал цадæггай хъуамæ ахиза нымæцонмæ. Цардимæ цы ног технологитæ æмдзу кæны, уыдонмæ гæсгæ Ирыстоны телеуынынад дæр хъуамæ рæстæджы домæнтæн дзуапп дæтта. Нымæцон телеуынынады руаджы бирæ хатт фæхуыздæр уыдзæнис телеуынынады нывты гъæд. Æрмæст фондз азы размæ нæ цæрджытæ цы телевизортæ балхæдтой, уыдон уыцы формат нæ ахсынц. Нымæцон алæвæрд райсыны тыххæй зæронд телевизорты хицæутты хъæуы дециметрон диапазоны антеннæ самал кæнын. 2013 азæй фæстæмæ уагъд телевизортæн та сæхи мидæг ис DVD-72 мультиплекстæ, уымæ гæсгæ уыдон æнæ антеннæ дæр хорз ахсынц ацы сигнал. Нымæцон сигнал исыны тыххæй дециметрон антеннæ æмæ приставкæ иугæнæн кабелимæ балхæнæн ис нæ горæты магазинты.
Бастдзинад æмæ массон коммуникациты комитеты къухдариуæггæнæг ма куыд зæгъы, афтæмæй Хуссар Ирыстон 2019 азæй цадæггай хъуамæ хизын райдайа нымæцон телеуынынадмæ æмæ 2022 азмæ, дунейы иннæ бæстæты куыд у, афтæмæй нæ телеуынынады сигнал суыдзæнис нымæцон. Йæ сигнал æнцонвадат кæй у, уымæ гæсгæ хæццæ кæндзæнис дæрддзæф хъæутæм дæр. Кабелон хызæгтæ æмæ спутникон операторæй пайдагæнджытæй уæлдай нымæцон эфирон фиддонтæ фидын нæ хъæудзæнис телевизормæ кæсыны тыххæй.
Хыгъдон æмбырды дзырд цыд стационарон телефонон бастдзинады АТС-тæ æдзæллаг уавæры кæй сты, уыцы риссаг фарстыл дæр. Абоны бон республикæйы уыцы бастдзинадæй пайда кæны 800 абонентæй фылдæр. Уыдон, сæйраджыдæр, сты паддзахадон структурæтæ. Фæлæ сæм куырдиæттæ арæх бадæттынц цæрджытæ дæр. Уæлдайдæр, ацæргæ адæм. Уымæн æмæ ацы бастдзинады лæггæдтæ иуæй сты асламдæр мобилонæй, аннæмæй та у æдасдæр. Фæлæ АТС-тæ зæронд кæй сты, стæй горæты уынгтæ аразыны рæстæджы кабелтæ кæй бахъыгдард сты, уымæ гæсгæ алкæмæн йæ куырдиат сæххæст кæнын сæ бон нæу.
Уазæгты Марфа
Comments are closed, but trackbacks and pingbacks are open.