РХИ-йы социолон-экономикон рæзтæн ахъазгæнæг Инвестицион программæйы фæлгæтты 2018-2019 азты арæзт хъуамæ æрцæуа нымæцон телеуынынады хызæг. Уый реализаци цæуы дыууæ этапæй. Фыццаг этапы, ома, 2018 азы арæзт æрцыд нымæцон телеуынынады хызæг фондз объекты скондæй. «Паук»-ы бæрзæндыл цы мæсыг монтаж æрцыд, уый фæрцы горæт æмæ Цхинвалы районæн ныридæгæн сæ бон у нымæцон телеуынынады фæрцы 22 ка-налмæ кæсын.
Азы кæрон базæйон станцтæ арæзт æрцыд Ленингоры райцентры, Цъинагары хъæумæ хæстæг. Дзауы райцентры Гуфта æмæ Малдайы хъæуты бæрзæндтыл, афтæ ма Знауыры поселочы дæр.
Дыккаг этапы та, ома, 2019 азы, ноджыдæр æнгæс объекттæ æмæ базæйон станцтæ арæзт æрцæудзысты горæт Къуайсайы, Знауыры районы хъæутæй цалдæры æмæ Теделеты хъæуы. Уый фæстæ «Паук»-ы бæрзæндыл цы 70 метры бæрзæндæн антеннæ ис, уырдæм баиу кæндзысты æппæт базæйон станцтæ æмæ цадæггай республикæ æмткæй ахиздзæнис аналогон телесигналæй нымæцонмæ.
Не ‘мбæстæгтæй бирæтæ нæ зонынц, нымæцон телесигналы хорздзинад цæй мидæг ис, уый.
Мах бахатыдыстæм Паддзахадон унитарон куыстуаты телерадиохызæджы генералон директоры хæстæ рæстæгмæ æххæстгæнæг Чилæхсаты Владиславмæ, цæмæй нын ра-дзура нымæцон телеуынынад нæ республи-кæйы цæрджытæн цы пайда уыдзæн, уый тыххæй.
«Цард размæ цæуы. Уыимæ рæзынц æхсæнады æмæ адæмы домæнтæ. Уыдонæй аразгæ у техникон прогресс дæр. Интернетимæ æмдзу кæны телеуынынад дæр. Нæ республикæйы цæрджытæ дæр цæмæй йæ хæрзиуджытæй цух ма уой, ууыл архайы Хицауад. Цардимæ цы ног технологитæ æмдзу кæнынц, уыдонмæ гæсгæ Ирыстоны телеуынынад дæр хъуамæ рæстæджы домæнтæн дзуапп дæтта. Уыцы æмвæзадмæ цадæггай хизынц Уæрæсейы æппæт регионтæ. Ивгъуыд аз нымæцон телеуынынадмæ ахызт Цæгат Ирыстон-Алани дæр. Мах, республикæйы цæрджытæ, цы аналогон телеуынынадæй пайда кодтам, уый уыд хуыз-дæрхъуаг. Стæй ма нæ республикæйы дæрддзæф хъæуты цæрджытæй алкæмæн фадат нæ уыд нæхи банæттон телеуынынады алæвæрдтæм кæсынæн. Нымæцон телеуынынады руаджы нывалæвæрд иттæг фæхуыздæр уыдзæнис, афтæ зæлы райхъуыст дæр. Нырмæ дæр уыд ахæм фадат, фæлæ уый тыххæй хъуыд балхæнын спутникон антеннæ. Уый та мах уавæрты лæууы зынаргъ. Стæй йæ куы сæвæрай, уæддæр дзы пайда лæвар нæ кæныс», – зæгъы Чилæхсаты Владислав.
Уый ма куыд загъта, афтæмæй кæд нымæцон телеуынынады фæдыл куыст нырма кæронмæ нæ бахæццæ, уæддæр абон горæт æмæ йæ алфæмблай хъæутæй бирæтæ сæрибарæй кæсынц нымæцон телеалæвæрдтæй 22 каналмæ. Ногдæр цы телевизортæ сты, уыдон кусынц уыцы форматæй. Фæлæ, хъыгагæн, фондз азæй фылдæр кæуыл цæуы, уыцы телевизортæ уыцы формат нæ ахсынц. Нымæцон алæвæрд райсыны тыххæй зæронд телевизорты хицæутты хъæуы дециметрон даипазоны антеннæ самал кæнын. 2013 азæй фæстæмæ уагъд телевизортæн та сæхи мидæг ис DVB-72 мультиплекстæ, уымæ гæсгæ уыдон æнæ антеннæ дæр хорз ахсынц ацы сигнал. Ны-мæцон эфирон сигнал исыны тыххæй дециметрон антеннæ æмæ приставкæ иугæнæн кабелимæ балхæнæн ис нæ горæты электроникæйы магазинты.
Бастдзинад æмæ дзыллон коммуникациты фæдыл комитеты пресс-службæйы куыд зæгъынц, афтæмæй Хуссар Ирыстон 2019 азæй цадæггай хъуамæ хизын райдайа нымæцон телеуынынадмæ æмæ 2022 азмæ дунейы иннæ бæстæты куыд у, афтæ æмткæй нæ телеуынынады сигнал суыдзæнис нымæцон. Йæ сигнал æнцонвадат у, хæццæ кæндзæнис дæрддзæф хæххон хъæутæм дæр. Кабелон хызæгтæ æмæ спутникон операторæй пайдагæнджытæй уæлдай нымæцон эфирон фиддонтæ фидын нæ хъæудзæнис телевизормæ кæсыны тыххæй.
Уазæгты Марфа
Comments are closed, but trackbacks and pingbacks are open.