РХИ-йы Президент Бибылты Анатоли фембæлд Бастдзинад æмæ дзыллон коммуникациты комитеты сæрдар Джиголаты Хасанимæ æмæ йын радзырдта, Хуссар Ирыстоны нымæцон телеуынынады хызæг аразыны фæдыл куыстытæ куыд цæуынц, уый тыххæй. Йæ ныхæстæм гæсгæ ацы проект хаст æрцыд 2018-2019 азтæн РХИ-йы социалон-экономикон рæзтæн ахъазгæнæг Инвестицион программæмæ æмæ реализаци цæудзæн дыууæ этапы. Фыццаг этапы нысан цæуы нымæцон телеуынынады хызæг, чи уæвынц, уыцы фондз объекты саразын. «Паук»-ы бæрзæндыл цы мæсыг монтаж æрцыд, уый фæрцы горæт æмæ Цхинвалы районы фылдæр хайæн сæ бон у нымæцон телеалæвæрдты 22 каналмæ кæсын.
Уæдæ, ныридæгæн горæт Цхинвал æмæ Цхинвалы районы цæрджытæн сæ бон кæсын у нымæцон телеуынынадмæ. Ахæм æнгæс базæйон станц арæзт æрцыд Ленингоры райцентр æмæ Цъинагары хъæумæ хæстæг дæр. Ныртæккæ та ахæм куыст цæуы Гуфтайы æмæ Малдайы хъæуты. Нымæцон телеуынынад 2018 азы кæронмæ арæзт æрцæудзæн Дзауы райцентр æмæ Знауыры поселочы дæр.
Дыккаг этапы та, 2019 азы ноджыдæр æнгæс объекттæ, ома, базæйон станцтæ арæзт æрцæудзысты Къуайсайы, Знауыры районы æмæ Теделеты хъæуы. «Паук»-ы бæрзæндыл та æвæрд æрцæудзæнис, рухс чи кæны, ахæм 70 метры бæрзæндæн антеннæ.
2018 азæй фæстæмæ Хуссар Ирыстон хизын райдайдзæн нымæцон телеæвдыстадмæ æмæ 2022 азмæ, дунейы иннæ бæстæты куыд у, афтæ æмткæй нæ телеуынынады сигнал суыдзæнис нымæцон. Нымæцон эфирон сигнал æнцонвадат у, хæццæ кæндзæнис дæрддзæф хæххон хъæутæм дæр. Кабелон хызæгтæ æмæ спутникон операторæй пайдагæнджытæй уæлдай, нымæцон эфирон телеуынынадмæ кæсджыты абонентон фиддонтæ фидын нæ хъæудзæнис телевизормæ кæсыны тыххæй, лæвар нымæцон эфирон телеуынынад исынæн хъæудзæн дециметрон диапазоны антеннæ самал кæнын. 2013 азæй фæстæмæ уагъд телевизортæн сæхи мидæг ис DVB-72 мультиплекстæ, уымæ гæсгæ уыдон нæ хъæуы антеннæтæ æлхæнын. Нымæцон эфирон сигнал исыны тыххæй дециметрон антеннæ æмæ приставкæ иугæнæн кабелимæ балхæнæн ис электроникæйы магазинты.
Не ‘мбæстæгтæй бирæтæ не ‘мбарынц, нымæцон телесигнал иуæй æнцонвадатдæр кæй у, стæй фыццаг мультиплексы кæд телеканалы пакеты 10 программæйы уыд, уæд ныр та лæвар кæсæн уыдзæн 20 федералон телеканалмæ ноджы хæрзгъæддæрæй. Электроэнерги дæттæн æмæ ретранслятортæ зæронд кæй сты, уый аххосæй республикæйы дæрддзæф хъæуты цæрджытæм нæ хæццæ кодтой канд бынæттон нæ, фæлæ ма Уæрæсейы телеалæвæрдтæ дæр. Ныр комитет ныфс æвæры, ацы проблемæ иуварс кæй æрцæудзæнис, уымæй.
Президентимæ фембæлды рæстæджы ма Бастдзинад æмæ дзыллон коммуникациты комитеты сæргълæууæг æрдзырдта кабелон интернеты тыххæй дæр. «Хуссар Ирыстоны столицæйы ныр фæуд сты интернеты бастдзинады куыстытæ. Октябры мæйы æнгæс куыстытæ райдайдзысты республикæйы районты. 2019 азы та ахиздзыстæм Ленингоры районы дæрддзæф хъæутæм».
Бибылты Анатоли куыд загъта, афтæмæй не ‘мбæстæгтæй бирæтæ райгонд не сты мобилон интернетæй, уымæ гæсгæ Джиголаты Хасанæн бахæс кодта, цæмæй, бадзурой «Остелеком»-ы къухдариуæгадимæ æмæ лæмбынæгдæр æрдарой сæ хъус ацы хъуыддагмæ.
Джиголаты Хасан куыд загъта, афтæмæй «Остелеком»-ы къухдариуæгад æмбаргæ ахаст дары уыцы фарстатæм, тырны, цæмæй зæронд ифтонгад ивд æрцæуа ногтæй.
Дзырд ма цыд, интернет негативонæй рæзгæ фæлтæрыл куыд æндавы, ууыл дæр.
Уазæгты Марфа
Comments are closed, but trackbacks and pingbacks are open.