Ацы бонты «Паук»-ы бæрзæндмæ ласт æрцыдысты нымæцон телеуынынад æвæрæн техникæ æмæ ифтонгад. Республикæйы территорийыл æвæрд æрцæудзæн 24 радиотелевизион станц æмæ 18 антенæйы, кæцыты бæрзæнд уыдзæн 50 метрæй 75 метрмæ. Уыдон фæрцы нæ республикæйы цæрæг адæмæн сæ бон уыдзæн фылдæр каналтæм кæсын. Нымæцон телеуынынады фæрцы фæхуыздæр уыдзæн телеуынынады программæты видеоæрмæджыты хæрзгъæддзинад. Уыцы антенæтæ ахъаз уыдзысты радио «Ир»-æн дæр. фæстæдæр уымæн дæр йæ аудиоæрмæг нымæÆцон форматæй раивдзысты.
«Мах канд бынæттон телесигналы куыстмæ нæ дардтам нæ хъус. Уыцыиу рæстæджы нæ бæрны сты Уæрæсейы телеканалтæ дæр. Нæ бæрны цы телемæсгуытæ ис, уыдон сты зæронд æмæ арæх фехалынц. Электроэнергиадæттæн æмæ ретранслятортæ зæронд кæй сты, уый аххосæй абон дæр нæ республикæйы дæрддзæф хъæуты цæрджытæм нæ хæццæ кæны бынæттон телеалæвæрд», – зæгъы Бастдзинад æмæ дзыллон коммуникациты комитеты инженер Чилæхсаты Владислав.
Æцæгдæр, республикæйы ацы проблемæ рагæй ис. Уый фæдыл цæрджытæй хъæстытæ цыд алы инстанцитæм. Хицауад дзыллон коммуникациты комитеты сæргълæууæг Джиголаты Хасан арæх дзырдта Паддзахадон телеканалы лæмæгъ сигналы аххосаг комкоммæ баст кæй у, зæронд æмæ ихсыд ифтонггæрзтимæ. Æппынæдзух хæлгæ кæй кæнынц æмæ уый аххосæй сигнал кæй сæфы, уый та æхсæнады æвзарын кæны тыхстдзинад. Нымæцон телеуынынад саразын æмæ нырыккон ифтонггæрзтæм рахизыны фарс уыд бæстæйы сæргълæууæг дæр. Растдæр уый амындмæ гæсгæ Бастдзинад æмæ массон коммуникациты комитет бадзырд сарæзта Уæрæсейы Федерацийы æнгæс комитетимæ. Ацы фарстыл куыст цыд цалдæр азы, æмæ ныр 2018-19 азты Инвестпрограммæмæ хаст æрцыд. Æрæджы, бюджетæй цы æхцайы фæрæзтæ хицæнгонд æрцыд, уыдонæй балхæдтой хъæуæг ифтонггæрзтæ æмæ ныр «Паук»-ы бæрзæндыл цы зæронд ифтонгад ис, уый ивд цæуы.
Бастдзинад æмæ массон коммуникациты комитеты сæргълæууæг загъта: «Ныртæккæ нæ республикæйы кусы аналогон сигналæй цалдæр Уæрæсейаг каналы æмæ ма Хуссар Ирыстоны паддзахадон телерадиокомпани «Ир». Куыддæр нымæцон телеуынынад мантажгонд æрцæуа, афтæ нæм кусдзæнис 20 уæрæсейаг телеканал æмæ Хуссар æмæ Цæгат Ирыстоны те телеканалтæ дæр. Нымæцон телесигнал кусдзæн аналогоны æмрæнхъ. Уымæн æмæ нымæцон сигнал сæ бон райсын уыдзæнис фæстаг æртæ азы дæргъы ног телевизортæ чи балхæдта, уыдонæн. Ног рауагъд æрвгуыз экрантæн сæ мидæг сты, уыцы нымæцон сигнал чи ахсы, ахæм адаптертæ. Фæлæ зæронд телевизорты хицæуттæн дæр сæ бон уыдзæнис сæрмагонд декодер балхæнын, кæцы исдзæнис цифрæйон сигнал. Уыдонæн балхæнæн уыдзæнис бынаты, сæ аргъ у 1000-1500 сомы».
Комитеты ныфс æвæрынц, фæззæгмæ нымæцон телеуынныад республикæйы дæрддзæф хъæуты дæр кæй скусдзæнис. Уæд республикæйы дæрддзæф хъæуты цæрджытæ хъаст нал кæндзысты бынæттон телесигналæй, фæлæ ма ног форматы кæсдзысты Уæрæсейы телеуынынады 20 каналмæ дæр.
«Æххæстæй уал нымæцон телесигнал лæвæрд цæудзæн нырма сæйраг горæты, стæй цадæггай Цхинвалы æмæ Ленингоры районты, уый фæстæ та Знауыры æмæ Дзауы районты», – зæгъы Джиголаты Хасан.
Уазæгты Марфа
Comments are closed, but trackbacks and pingbacks are open.