Цалдæр боны ма баззад æмæ нæ къæсæрыл æрбалæудзæн ног 2024 аз. Афæдзы кæрон ахуырадон уагдæтты уагъд фæцæуынц алыгъуызон мадзæлттæ, хатдзæгтæ арæзт цæуынц афæдзы бакæнгæ куыстытæн. Иу ахæм ногазон мадзал уагъд æрцыд Тедеты Георгийы номыл фыццæгæм музыкалон скъолайы. Ацы скъолайы традицион ссис æрвылаз дæр ахæм ногазон концерттæ уадзын. Концерты хайад райстой музыкалон скъолайы хъо-мылгæнинæгтæ. Мадзалмæ æрбацыдысты ацы скъолайы æмæ музыкалон ахуыргæнæндоны ахуыргæнджытæ, ахуыргæнинæгтæ, сывæллæтты ныййарджытæ, аивадæн табугæнджытæ. Зал уыд бæрæгбонвæлыст. Сценæ рафидауын кодтой ногазон зазбæлæстæ.
Мадзал байгом кодта æмæ йæ уагъта скъолайы ахуыргæнæг, РХИ-йы сгуыхт ахуыргæнæг Котолиты Тамарæ. Уый зæрдæбын арфæтæ ракодта æрæмбырдуæвджытæн æрбалæугæ Ног азы цытæн. Уый фæстæ сценæмæ фæхуыдта иумиагскъолайон кæстæр хоры хайадисджыты сæ ахуыргæнæг Остъаты Олесяйы сæргълæудæй. Сæххæст кодтой дыууæ зарæджы Икъаты Владимиры фыст æмдзæвгæйыл фыст зарæг «Ирыстон – мæ зæрдæ» æмæ «Дети гор». Уыдоны фæстæ сценæйыл сæ арæхстдзинад равдыстой скъолайы иугонд хор РХИ-йы сгуыхт ахуыргæнæг Тасойты Валентинæйы къухдариуæгадæй. Тынг хорз азарыдысты æртæ зарæджы – «Взрослые и дети», «Здравствуй, мир» æмæ «Новый год».
Сывæллæттæ иууылдæр хорз цæттæ уыдысты, фæлæ уæддæр хуыздæрты ‘хсæн алыхатт дæр вæййы ноджы хуыздæртæ. Битеты Виктория, Æлборты Ланæ, Коцты Елизаветæ, Къалаты Дионæ, Попо-ва Полина æмæ Дудникова Евелинæ тынг хорз сæххæст кодтой зарджытæ. 1-æм къласы ахуыргæнинаг Бибылты Анастасия хорз ацагъта скрипкæйыл. Сиукъаты Виктория балалайкæйыл ацагъта ирон мелодитыл йæ фыд Анзоры фыст поппури, Цоциты хотæ Тамарæ æмæ Аннæйы (фортепианойыл иумæ сæххæст кодтой Даниел Хельбахы «Остинато») арæхстдзинад дæр фæцыд сценæмæкæсджыты зæрдæмæ. Ирон кафт «Симд» фæндырыл хорз ацагъта 3-æм къласы ахуыргæнинаг Дзукъаты Даянæ. Сывæллæттæ иууылдæр тырныдтой сæ арæхстдзинад равдисынмæ æмæ сæ къухты æфтгæ дæр бакодта. Æдæппæтæй концерты уыд 27 номыры.
Ирдæй разынд сæ ахуыргæнджыты æвæллайгæ куыст дæр. Æрвылаз дæр сын ахæм концерттæ свæййынц сæ куыстæн фæстиуджытæ саразыны хуызæн. Куыд æрвылаз, афтæ та ныр дæр скъолайы директор Тедеты Маринæ уагдоны хъомылгæнинæгтæн бакодта ногазон лæвæрттæ.
Нæ уацх.
