Концерт
Хетæгкаты Къостайы номыл паддзахадон драмон театры уагъд æрцыд Æхсардзинад æмæ адæмы иудзинады боны цытæн бæрæгбонон концерт.
Бæрæгбонон концерты зæлыдысты адæмы уарзон патриотикон æмæ лирикон зарджытæ æмæ нырыккон композицитæ. Уыдонæй аивадуарзджытæ райстой стыр æхцондзинад.
Концертон программæйы хайд райстой Харебаты Вадим, Æлборты Владимир, Харебаты Мартæ, гимнази «Альбион»-ы аивадон къорд Дзабиты Екатеринæйы къухдариуæгадæй æмæ æндæртæ.
Республикæйы сгуыхт артисткæ Гатыгкоты Нинæ фыццаг хатт сæххæст кодта зарæг «Мæ Ирыстон – мæ уарзт». Ныхæстæ æмæ йæм музыкæ ныффыста йæхæдæг.
***
Колыты Аксойы номыл аивæдты лицейы дæр уагъд æрцыд бæрæгбонон концерт «Сыгъдæг иронау зарын æз дæуыл, Ирыстон!», зæгъгæ. Мадзал бацæттæ кодтой 2-æм «б» классы ахуыргæнинæгтæ сæ ахуыргæнæг Цгъойты Аринаимæ.
«Уый у нæ истори, уый у нæ ивгъуыд æмæ нæ рох макуы хъуымæ уа. Сывæллæттæн дæр хъуамæ æмбарын кæнæм, Æхсардзинад æмæ адæмы иудзинады бонæн егъау нысаниуæг кæй ис», – дзырдта ахуыргæнæг.
Бæрæгбонон мадзалы уазджытæ уыдысты Тедеты Сослан æмæ Кобесты Маирбег. Сæ дыууæ дæр сты æртын цыппар азы размæ цауты хайадисджытæ.
Сывæллæттæ сæххæст кодтой зындгонд авторты æмдзæвгæтæ æмæ зарджытæ, сæ иумæйаг тематикæ уыд Райгуырæн бæстæмæ æнувыд уарзондзинад. Хуссар Ирыстоны хъайтар Кобесты Маирбег бузныджы ныхæстæ загъта мадзал бацæттæгæнджытæн, йæ чысыл хайадисджытæн та Ирыстонæн аккаг хъæбултæ суæвыны фæндиæгтæ.
Лицейы директор, республикæйы сгуыхт ахуыргæнæг Плиты Риммæ бузныджы ныхæстæ загъта ныййарджытæн сæ хъусдард æмæ хъомылады тыххæй.
ДРИАТЫ Лейла
