Уæрæсейы Федераци нын нæ хæдбардзинад куы банымадта, ууыл 15 азы сæх-хæсты боны цытæн Хетæгкаты Къостайы номыл Паддзахадон драмон театры уагъд æрцыд бæрæгбонон концерт «Танец дружбы». Хайад дзы райстой РХИ-йы æмæ Абхазы паддзахадон ансамблтæ «Симд» æмæ «Кавказ».
Мадзалмæ фæуазæг сты РХИ-йы Хи-цауады сæрдар Джуссойты Константин, Республикæ Хуссар Ирыстоны Уæрæсейы Федерацийы Уæлвæткон æмæ Ӕххæстбарджын минæвар Марат Кулахметов, Республикæ Абхазы РХИ-йы Уæлвæткон æмæ Ӕххæстбарджын минæвар Елбачиты Алан, министрадты æмæ ведомствоты минæвæрттæ, республикæмæ æрцæуæг уазджытæ æмæ бынæттон цæрджытæ.
Сфæлдыстадон коллективтæ сæ арæхстдзинад равдыстой куыд кафынæй, афтæ зарынæй æмæ национ инструменттыл цæгъдынæй дæр. Иттæг хорз сæххæст кодтой адæмы уарзон кæфтытæ «Симд», «Хонгæ», «Горский» æмæ афтæ дарддæр. Хуссарирыстойнаг ансамблы нæлгоймæгты хор ма мадзалмæ æрбацæуджыты зæрдæтæ бахъæлдзæг кодтой сæ диссаджы зардæй – «Мæ Ирыстон», «Алантæ», «Мæ Иры фæсивæд» æмæ æндæртæй. Театралон фæзуаты развæлгъау æвæрд æрцыд егъау манитор æмæ Театры залмæ кæмæн нæ бантыст бацæуын, уыдон маниторыл кастысты концертон программæмæ комкоммæ эфиры.
Кæронбæттæны абхазаг уазджыты РХИ-йы Президенты Гаглойты Аланы Барамындмæ гæсгæ схорзæхджын кодтой паддзахадон хорзæхтæй – «Республикæ Хуссар Ирыстоны сгуыхт артист»-ы ном лæвæрд æрцыдис Милана Джобуа æмæ Омари Тарбайæн. Кафты дæсныйадмæ егъау хайбавæрд кæй бахастой æмæ æнтыстджын сфæлдыстадон архайд кæй кæнынц, уый фæдыл ма ансамбль «Кавказ»-æн нæ Президенты номæй радтой арфæйы грамотæ.
Джиоты Алыксандр
