Кæддæр мын республикæйы зынгæ лæг Тедеты Шалико хъазгæйæ афтæ зæгъы: “Дохтыртæ мæ музыкант хонынц, музыканттæ та – дохтыр”. Æз ма сæм бирæ цыдæртæ бафтауин: Цæгат Ирыстоны сгуыхт дохтыр, РЦИ-Аланийы Композиторты цæдисы уæнг, поэт, хъæбысхæстæй Советон Цæдисы спорты мастер, республикæйы æхсæнадон палатæйы уæнг… Æмæ, сæйрагдæр, тынг хорз адæймаг.
Ацы бонты Дзæуджыхъæуы Центрон библиотекæйы нысан кодтой Тедеты Шаликойы 80 азы юбилей. Кадджын мадзалмæ æрбацыдысты фысджытæ, композитортæ, аивады архайджытæ, медицинæйы кусджытæ…
Изæр байгом кодта Цæгат Ирыстоны культурæйы сгуыхт кусæг, библиотекæйы бæстæзонæн хайады хицау Дзугаты-Мурасты Риммæ. Уый бæстон радзырдта Шаликойы сабибонты, стæй йæ цард æмæ сфæлдыстады тыххæй. “Тедеты Шалико кæд адæмæн хос кæны, уæддæр фылдæр зындгонд у, куыд композитор. Уый у дæсгай адæймæгтæн уарзон æмæ зындгонд зарджыты автор, кæцытæ систы нæ эстрадæйы “сыгъзæрин классикæ”.
Тедейы фырты ном фыццагдæр адæм базыдтой 80-æм азты. Уæды зынгæ ансамбль “Суадоны”-ы солисттæ Цоциты Батрадз, Хуыриаты Валери, Джихаты Роман æмæ иннæтæн ныффыста бирæ зарджытæ. Аив лирикон зар-джытæ уайтагъд фæндаг ссардтой адæмы зæрдæтæм. Тедеты Шалико у алы-вæрсыг курдиаты хицау, кæддæриддæр баххуысмæ – цæттæ. Уый Ирыстоны культурæ æмæ медицинæмæ бахаста аккаг бавæрæн”, – дзырдта Риммæ.
“Суадон” сæрæвæрæн фæци Шаликойы сфæлдыстадæн. Йæ зарджытæ йын зарын райдыдтой Бæцæзаты Юри, Хадыхъаты Аллæ, Собиты Станислав, Медойты Светланæ, Тайсауты Олег, Билаонты Долорес, Дзæхойты Зæлинæ, Бекъойты Вано æмæ иннæтæ. Шалико тынг бирæ зарджытæ ныффыста кæстæр фæлтæры фыст æмдзæвгæтыл: Къудухты Маринæйы, Плиты Зæирæйы æмæ афтæ дæрддæр. Куыдфæстагмæ Шалико йæхæдæг дæр ахызт поэзимæ. Рацыд ын дыууæ поэтикон æмбырды “Мысли вслух” æмæ “Мои рифмованные строки”.
Мадзалы дохтыр-поэты тыххæй йæ хъуыдытæ загъта амынд библиотекæйы директор Цъæхилты Зæлинæ æмæ юбиляры схорзæхджын кодта Кады грамотæ æмæ зæрдылдарæн лæварæй.
Тедейы-фырты тыххæй бирæ хъарм ныхæстæ загътой поэттæ Кокайты Тотрадз, Къадзаты Станислав, амалхъом Лалыты Лев, йæ хæлæрттæ медицинæйы къабазы æмæ бирæ æндæртæ.
Библиотекæмæ æнæрцухæй цыдысты йæ курдиатæн табугæнджытæ дидинджытимæ, зæрдылдарæн лæвæрттимæ æмæ зæрдæбын арфæ кодтой юбилярæн.
Юбилейон изæры зæлыдысты, Шалико музыкæтæ цы бирæ æмдзæвгæтæн ныффыста, уыцы зарджытæ. Зарыдысты сæ Хадыхъаты Аллæ, Дауыраты Эдуард, Дзæхойты Зæлинæ, Цоциты Батрадз… Скъладзаутæ та йын бакастыс-ты йæхи фыст æмдзæвгæтæ. Раст загъта Шаликойы тыххæй журналист Елена Толоконникова: “Человек очень светлый, солнечный, талантливый, просто удивительно щедрый душевно – и без остатка покоряющий многогран-ностью своего таланта и своим обоянием всех, кому посчастливилось знать его близко. Его ясный, открытый, неподкупный взгляд сам по себе свидетельствует о духовной состоятельности, внутренной силе”…
Кæмфæнды ма куса Тедеты Шалико, кæдæм фæнды ма ацæуа, алыран дæр йемæ – музыкæ, поэзи. Æнæ уыдон нæу йæ бон цæрын. Уыдон æй цæргæсы дыууæ базырау сисынц уæлæрвтæм. Уый хоны адæймаджы амонд Шалико. Йæхи загъдау:
Мой народ мне дарит звуки,
Я их вместе собираю,
С нежностью беру их в руки
И мелодии слагаю.
ДЖУСОЙТЫ Нинæ
Comments are closed, but trackbacks and pingbacks are open.