Æрæджы зынгæ прозаик, Уæрæсейы фысджыты Цæдисы уæнг Дзабайты-Къесаонты Таисæйыл сæххæст 85 азы. Уый фæдыл нæ горæты централон библиотекæйы арæзт æрцыд йæ юбилейон изæр.
Мадзалмæ æрбацыдысты фысджытæ, ахуырдзау фæсивæд, йæ курдиатæн табугæнджытæ… Изæр байгом кодта библиотекæйы бæстæзонæн хайады сæргълæууæг Дзугаты-Мурасты Риммæ. Уый бæлвырд радзырдта Таисæйы цард æмæ сфæлдыстады тыххæй. Уымæн сæйрагдæр йæ дзуринаг уыд фыссæджы роман «Сидзæртæ æмæ сидзæргæстæ». «Таисæ ацы романы афтæ бæлвырд равдыста хæсты æвирхъау фыдæх, фæсчъылдымы тыхст æмæ гæвзыкк цард, хæсты азарæй сабиты саст хъысмæттæ æмæ сæ кæсгæйæ, адæймаджы зæрдæ йæхи къултыл ныххойы. Уый йæ хъайтар Иветæйы хъысмæты равдыста йæхи тæригъæддаг цард. Йæ фыд æмæ йе ‘ртæ фыдыфсымæры фæмард сты хæсты цæхæры. Баззадысты цыппар сывæллоны сæ рынчын мады æвджид. Астаздзыд Таисæ райсомæй изæрмæ куыста колхозы быдырты, изæрæй та-иу, цы къæбæры мур-иу ын радтой, уый йæ чысыл хотæ æмæ æфсымæрæн æрхаста, цыма йæхæдæг куырыхон зæронд уыд, уыйау.
Таисæйы руаджы мингай чиныгкæсджытæ хуыздæр базыдтой хæсты дудгæбæттæ. Чиныг 1981 азы мыхуыры куы фæзынд, уæд ын ахæм стыр æнтыст уыд, æмæ йæ агуырдтой Уæрæсейы алы къуымтæй, стæй фæсарæнтæй дæр. Уый уыд фыссæджы стыр æнтыст. Йæ хъайтартæ сты хæларзæрдæ, рухс æмæ рæстдзинад тауæг. Нæ зæрдæ зæгъы фыссæгæн æнæниз æмæ сфæлдыстадон æнтыстытæ. Ирон литературæйыл ма уæзгæ хуынтæ цы бафтауа».
Уый фæстæ Риммæ бакаст романæй скъуыддзæгтæ. Уы-донмæ хъусгæйæ, йæ цæссыг ничи урæдта.
Дзабайты Таисæйы сфæлдыстадыл ма радзырдтой йæ хъæуккæгтæ: нывгæнæг Дзбойты Михал æмæ ЦИПУ-йы профессор Бекъойты Ва-лодя, Цæгат Ирыстоны фысджыты Цæдисы сæрдары хæдивæг Скъодтаты Эльбрус, фысджытæ Соттиты Риммæ æмæ Колыты Витали, журналист Гасанты Валери, ахуыргæнæг Хæллаты Азæ æмæ иннæтæ. Се ‘ппæтæн дæр сæ сæйраг дзуринаг уыд «Сидзæртæ æмæ сидзæргæстæ».
Изæры ма сæ аивад равдыстой нæ горæты Эстетикон центры аивадон къорд. Библиотекæйы номæй та фыссæг хорзæхджын æрцыд Кады грамотæйæ.
Дзырд дæр ыл нæй, фыссæгæн йæ иннæ роман «Донхæрис» дæр къаддæр бынат не ‘рцахста ирон литературæйы. Кæнæ йæ уацаутæ «Басы хуыпп» æмæ «Хистæр хо», йæ чиныг «Баллада о семи погибших солдатах» æмæ æндæртæ.
Йæ фыдæлты чи нымайы, сæ кад, сæ намыс сын чи хъахъхъæны, сæ рухс ном сæ-нусон кæныныл чи архайы, уый фæрнджын адæймаг у, арфæйаг куыст кæны. Таисæ йæ царды фылдæр хай арвыс-та йе ‘дзард фыд æмæ æртæ фыдыфсымæры хæстон фæндæгтæ сбæрæг кæныныл æмæ йын æнтысгæ дæр бакодта. Йæ хъæппæрисæй сын сæ райгуырæн къуым Хъарман-Сындзы-хъæуы сæ номыл скодтой уынг. Фæлæ фыссæджы æнæнцой зæрдæ ууыл не ‘рлæууыд. Æгæр стыр трагеди у иу чысыл мыггагæй, иу бинонтæй цып-пар цæрынхъуаг лæппуйы фæхъуыд. Халгай фембырд кодта уыдоны тыххæй æрмæг æмæ сæ рауагъта хицæн чиныгæй.
Сылгоймагфысджытæ Ирыстоны кадавар сты, фæлæ Дзабайты-Къесаонты Таисæ иунæг удæй стыр уæзгæ хуын-тæ бахаста ирон литературæмæ, советон салдаты ном сæнусон кæнынмæ æмæ дзы бузныг сты ирон адæм. Арфæ йын кæнæм мах дæр йæ юбилейы фæдыл. Бирæ ма дын бантысæд, Таисæ, Ирыстоны фарнæн.
ДЖУСОЙТЫ Нинæ
Comments are closed, but trackbacks and pingbacks are open.