Ацæугæ къуыри поэт, прозаик, публицист æмæ æхсæнадон архайæг Козаты Исидоры райгуырдыл 95 азы кæй сæххæст, уый цытæн арæзт æрцыдысты алыгъуызон мадзæлттæ. Хуссар Ирыстоны Анахарсисы номыл национ библиотекæйы уыдис мысæн изæр. 25-æм апрелы та Исидоры мысæн изæр уагъд æрцыдис йæ райгуырæн хъæу Хъорнисы хъæууон клубы. Ардæм æрбацыдысты Знауыры районы администрацийы минæвæрттæ, ахуыргæндтæ, фысджытæ, студенттæ, Исидоры хиуæттæ æмæ йæ хорз чи зыдта, уыцы æмбæстæгтæ.
Мадзал бацæттæ кодтой университеты ректорат, ирон литературæйы историйы кафедрæ æмæ Знауыры районы культурæйы хайад. Мысæн изæр байгом кодта мадзаламонæг Тыбылты Аннæ. Уый арфæйы ныхæстæ загъта йæ хайадисджытæн æмæ ныхасы бар радта профессор Плиты Гацырæн. Гацыр банысан кодта, зæгъгæ, Исидор хорз поэт, фыссæг, публицист æмæ æхсæнадон архайæг кæй уыд, уый бирæтæ зонынц, фæлæ алчи бæстон нæ зоны Исидорæн йæ цард æмæ сфæлдыстады иуæй-иу миниуджытæ æмæ йæ хъуыдымæ гæсгæ, фылдæр хъусдард здахын хъæуы уыдонмæ.
Мадзалы ма Козаты Исидоры цард æмæ сфæлдыстады тыххæй сæ хъуыдытæ дзырдтой Козаты Мадинæ, Хъазиты Мелитон, Биазырты Аллæ, Гæбæраты Юри æмæ Плиты Серго.
Мысæн изæры радгай Исидоры æмæ йыл ирон поэттæ кæй ныффыстой, уыцы æмдзæвгæтæ ирон æмæ уырыссаг æвзæгтыл кастысты университеты студенттæ æмæ Хъорнисы астæуккаг скъолайы ахуыргæнинæгтæ Беджызаты Алинæ, Джиоты Сабинæ, Гаглойты Юри, Козаты Виктория, Дыгъуызты Моникæ, Плиты Эмилия æмæ æндæртæ.
Къæбулты Сусанæ æмæ Джиоты Георги та залы уæвджыты раз сæххæст кодтой цалдæр зарæджы. Знауыры районы культурæйы хайады кафты къорд «Ныфс» дæр йæ аив æмæ рæсугъд кафтæй барухс кодта мадзалы хайадисджыты зæрдæтæ.
ГÆЗЗАТЫ Иван
