Æрæджы паддзахадон драмон театры сценæйыл Республикæ Хуссар Ирыстоны Культурæйы министрады цур хореографион скъоластудийы æппæт архайæг къордтæ дæр сæ арæхстдзинад равдыстой хыгъдон концерты. Æрыгон кафджытæ сценæмæкæсджыты раз сæххæст кодтой ирон адæмон кæфтытæ æмæ Кавказы адæмты кæфтытæй дæр. Цымыдисон рауад хыгъдон концерт, адæм стыр цинимæ æмбæлдысты æвзонг артисттыл. Иууыл æхсызгондæр адæмæн вæййы иууыл къаннæгдæр артистты кафгæйæ фенын. Нæ чысыл хуртæ симды куы бацæуынц, уæд уый уæлдай тынгдæр агайы зæрдæтæ.
Хореографион скъола-студийы ахуыргæнинæгтæ уæрæсейон конкурстæй, кæддæриддæр стыр хорзæхтимæ æрæздæхынц. Сæ алы уæлахиз дæр, сæ ахуыргæнджыты педагогон дæсныйадимæ баст у æмæ сæ стæм сæрыстыр. Ацы сфæлдыстадон коллектив кæмдæриддæр ирон национ кæфтытæ кæм сæххæст кæны, уым ныууадзы ирон аивады фарн, адæмыхæттытæ та базонгæ вæййынц нæ рагфыдæлты хъæздыг культурæимæ. Нацийы культурон царды уымæн ис стыр нысаниуæг æмæ нæ Культурæйы министрады архайды руаджы ацы кадджын традици дарддæр кæны.
Хыгъдон концерты хореографион скъола-студийы разамонæг, Республикæ Хуссар Ирыстоны адæмон ахуыргæнæг Четион Майæ йæ раныхасы, фыццаджыдæр, бузныджы ныхæстæ загъта сывæллæттæн æмæ сæ ныййарджытæн, ирон кафт, ирон аивадæн стыр аргъ кæй кæнынц, стæй се ‘рвылбонон куыст ахадгæ кæй у, уый сæраппонд. Скъола-студийы директор ма сæрмагондæй банысан кодта ирон кафты нысаниуæг, адæмон кæфтытæ сывæллæтты кæй хъомыл кæнынц культурон æмæ традицион æргъадтыл æмæ сæ афтæмæй кæй дарддæр кæнынц, уый.
«Кафт ирхæфсæн нæу. Мах кæмфæнды ма уæм, кæддæриддæр аккагæй, кадимæ равдисæм нæ республикæйы цæсгом. Мæ хъомылгæнинæгтæн алыхаттдæр бацамонын, цæмæй, фыццаджыдæр, уой раст æмæ æгъдауджын адæймæгтæ, уый фæстæ та тынг хорз кафджытæ. Мæ зæрдæ сын зæгъы, цæмæй сæ царды фæндæгтæ уой рæсугъд æмæ макуы фæфæсмон кæной, кæддæр хореографион скъола-студийы ахуыргæнинæгтæ кæй уыдысты, ууыл. Æз æппæт дæр сарæзтон æмæ абон фæсмон ницæуыл кæнын. Стыр æхсызгон мын у, мæ хъомылгæнинæгтæ мæ фарсмæ кæй сты, уый», – банысан кодта Четион.
Майæйы иузæрдион лæггад æмæ йæ профессионализмы фæрцы нæм рæзы æгъдауджын æмæ æфсармджын фæлтæр. Æцæг профессионалæн бирæ миниуджытæ ис, фæлæ се ‘ппæтæй зæрдæмæдзæугæдæр, мæнмæ гæсгæ, у ахæм – равзаргæ фæндагыл фæстаг улæфтмæ æнæфæцудгæйæ цæуын, фæлтæрддзинад æвзонгадæн дæтгæйæ, национ фидæнæн лæггад кæнын. Ахæм профессионал у «Симд»-ы кæддæры солисткæ Четион Майæ. Уый стыр сценæйыл куы нал кафыд, уæд Цхинвалы 2-æм астæуккаг скъолайы байгом кодта хореографион студи æмæ уæдæй фæстæмæ бирæ азты дæргъы æнæрынцойæ ахуыр кæны рæзгæ фæлтæры ирон æмæ кавказаг кæфтыты дæсныйадыл. Абон уый сæрыстыр у йæ хъомылгæнинæгтæй, уыдонæй бирæтæ сæ цард сбастой хореографиимæ.
Республикæ Хуссар Ирыстоны Культурæйы министр йæ раныхасы банысан кодта хореографион скъола-студийы разамынады егъау хайбавæрд æмæ сæ иузæрдион куыст национ кæфтыты популяризаци кæныны хъуыддагмæ. «Алчидæр æй зоны, ацы хореографион коллектив бирæ азты дæргъы кæй æвзæрста зындзинæдтæ, уый. Фæлæ скъола-студийы разамынад æмæ кафджыты иузæрдион куысты руаджы, махæн нæ бон ссис, национ культурæйы ахсджиаг уагдон йæ рæзты къахыл слæууын кæнын», – банысан кодта министр. Уый ма адæмы зæрдыл æрлæууын кодта хореографион скъола-студийы агъуысты арæзтады фарст кæй ис нæ бæстæйы сæргълæууæджы сæрмагонд хъусдарды бын: «Абон фидарæй зæгъæн ис, скъола-студийы хæрзгъæд куыстæн æввахс рæстæджы æппæт уавæртæ дæр кæй уыдзæн», – банысан кодта Зæгъойты Рада.
Хыгъдон концерты Республикæ Хуссар Ирыстоны Президент Гаглойты Аланы номæй арфæйы ныхæстæ сфæлдыстадон коллективæн загъта Президенты Администрацийы разамонæг Мæргъиты Алан. Уый дæр банысан кодта скъола-студийы куыстхъомдзинад æмæ курдиат. Хореографион скъола-студийы фарсмæ нырæй фæстæмæ дæр республикæйы разамынад кæй уыдзæн æмæ сын кæй æххуыс кæндзæн, уымæй ныфс бавæрдта коллективæн.
Нæ уацх.
