Царды фæндæгтæ алыхуызон сты. Иутæ цæргæйæ бæззайынц, цы уæзæгыл схъомыл вæййынц, уым. Æндæртæн сæ хъысмæт афтæ рауайы æмæ, æнхъæл кæм нæ вæййынц, ахæм дард ран свæййы сæ цæрæн бынат. Фæлæ зæгъын хъæуы, уæддæр адæмы фылдæр хай сæ зæрдæ никуы сивынц, царды ад кæм базыдтой, уыцы уæзæгыл.
Елдзарты Иветæйæн йе ‘фсымæр йе ‘фсæддон хæс намысджынæй æххæст кодта Эстонийы сæйраг горæт Таллины. Хойы зæрдæ уарзæгой у, æрæмысыд йе ‘фсымæры æмæ йæм ацыд уынæг. Горæты аззад иудзæвгар æмæ фæзонгæ, йе ‘фсымæримæ чи службæ кодта, ахæм лæппуимæ, Мамедов – йæ мыггаг. Сæ цард баиу кодтой æмæ цæрæн бынатæн равзæрстой ацы горæт.
Уыцы рæстæджы уым дæсны хирург, Лолайы фырт уыдис ирон диаспорæйы разамонæг æмæ Елдзарты чызг кæддæриддæр хайад иста алыхуызон хиирхæфсæн мадзæлтты. Хъыгагæн, Лолайы фырт йæ цардæй ахицæн æмæ уæд бахъуыд ног хистæры равзарын. Иветæ бæстон базыдта раздæры диаспорæйы куысты сусæгдзинæдтæ æмæ уыцы ахсджиаг хæс райста йæхимæ.
Кæй зæгъын æй хъæуы, ацы горæты ирæттæ афтæ бирæ дæр нæ цæры – æдæппæт сты 100 адæймагмæ æввахс. Фæлæ семæ кусы зæрдиагæй, афæдз сæ æртæ хатты æрбамбырд кæны æмæ сын ауадзы цымыдисон мадзæлттæ. Сæ иу вæййы уалдзыгон, иннæ – фæззыгон æмæ стæй та – Ногазон бæрæгбон. Зæрдиагæй хайад райсынц ирæттæ, кæрæдзийыл фæцин кæнынц, фæкафынц, фæзарынц ирон кæфтытæ, зарджытæ. Бæрæгбонтæм ма æрбацæуынц æндæр адæмты минæвæрттæ дæр. Фæстæ нæ фæлæууы уæд Елдзарон, скæны сын ирон хæбизджынтæ æмæ сæ фæхынцы йæ армыдзагæй. Елдзарон буц у йæхи æртæ сывæллонæй æмæ уыдон цотæй, мадзæлтты хайад кæй райсынц, уый тыххæй.
Æрæджы Елдзарты Иветæ æрцыд йæ уарзон горæтмæ æмæ йын тынг æхсызгон уыд, нæ горæты хуыз хуыздæрæрдæм кæй ивы. Бафæдзæхста мæ, цæмæй бузныг зæгъон нæ республикæйы Президент Гаглойты Аланæн йæ æвæллайгæ куысты тыххæй. Уыд æм цалдæр фæндоны дæр. Сæ иу уыд, æддæ бæстæйæ ардæм чи цæуы, уыдонæн сæ хонæн рæстæг таможнæйы куы фæцыбырдæр кæнид. Елдзарон ма бæллы пенситы фæфылдæрмæ кæннод, зæгъгæ, 10 мин сомы зæронд адæймагæн цасы фаг хъуамæ уой.
ХУЫБИАТЫ Никъала
