Донхæры доны ахадындзинад егъау кæй у, уый алы зæхкусæг дæр хорз зоны. Нæ республикæ хъæздыг у ахæм дæттæй æмæ стыр ахъаз сты куыд хисæрмагонд хæдзарадты хуымзæххытæ, афтæ арендатортæн дæр, алыгъуызон хъæууонхæдзарадон культурæтæй хъæздыг тыллæг æрзайын кæнынæн. Фæлæ цæмæй æнæкъуылымпыйæ цæуа хъæууон бынæттæм, ууыл дæр бахъæуы кусын. Уыцы хъуыддаг йæ зæрдыл дары республикæйы паддзахадон унитарон куыстуат «Мелиораци»-йы коллектив æмæ æрвылаз дæр фæархайы уавæр æрбæстон кæныныл.
Куыстуарзаг сты Ленингоры районы Цъинагары хъæуы цæрджытæ, уыдон зæххы куыстыл сæхи никуы атигъ кæнынц, сæ дыргъдæттæ æмæ цæхæрадоны халсæрттæм базилынц агротехникæйы домæнтæм гæсгæ æмæ сæ æрзайын кæнынц хорз тыллæг. Фæлæ банысан кæнын хъæуы, цæрджытæ цух кæй сты донхæры донæй æмæ тыхсынц. Раст у, пайда кæнынц, Гуырдзыстоны æрдыгæй сæм цы дон хæццæ кæны, уымæй, фæлæ æххæстбæрцæй не ‘ххæссы хъæуы æппæт быдыртæ æмæ цæхæрадæттыл. Сæ тыхстдзинад фæрог кæныныл сын ацы бонты кусы республикæйы «Мелиораци»-йы коллектив. Куыстуаты хистæр Годжыцаты Таймураз куыд банысан кодта, афтæмæй донхæры къанау бынтон мæгуырау уавæры ис Мамысанты сыхы цур, къутæрбæлæстæ æмæ дзы æндæр ахæмтæй азмæлæнтæ нал ис. Уавæр бахынцыд æрцыд æмæ йæм ацы æввахс бонты рацыдысты куыстуаты нæлгоймæгтæ 12 адæймаджы скондæй. Годжыцайы фырт куыд банысан кодта, уымæ гæсгæ æппæт куыстытæ дæр ахицæн кæндзысты 15 бонмæ æмæ уый фæстæ донхæры дон йæ фæндаг акæндзæн Цъинагары хъæуы хуымзæххытæм.
Хуыбиаты Никъала
