Донхæры доны ахадындзинад егъау у хъæууон хæдзарады æмæ йæм уымæн здæхтæуы стыр хъусдард уæлдæрлæууæг органты æрдыгæй. Чъехы къанау ныр 75 азы йæ лæггады хай кæны Цхинвал æмæ Знауыры районты хицæн хъæуты цæрджытæн. Нæ республикæйы «Мелиораци»-йы коллектив æрвылаз дæр зæрдиагæй бацархайы, цæмæй донхæргæнæн сезоныл сæмбæлой цæттæйæ æмæ цæрджытæ донæй пайда кæной æмбæлон æгъдауæй. Ахæм уыд сæ фæнд ацы аз дæр, фæлæ бæрæг аххосæгтæм гæсгæ уый нырма сæ къухты нæ бафтыд. Хъуыддаг уый мидæг ис, æмæ ацы аз мæгуырау боныгъæдтæ ахастой æмæ уый бандæвта донхæры дон рæстæгыл хъæутæм рауадзыныл. Куыстуаты инженер Джиоты Валик куыд радзырдта, афтæмæй Чъехы хъæуы мидæгæй къанауы æвæрд сты хызтæ, цæмæй йæм алыгъуызон брæттæ ма хауой. Йæ сыгъдæг кæныныл уыцы куыстытыл архайынц кусджытæ, фæлæ йыл уæддæр нæ тых кæнынц, дон ивылдæй кæй цæуы æмæ йемæ чъизитæ кæй хæссы, уымæ гæсгæ. Ныр æнхъæлмæ кæсынц, боныгъæд хуыздæрæрдæм кæд фæивдзæн, уымæ. Уæд спайда кæндзысты тракторæй, бæстон æй ныссыгъдæг кæндзысты æмæ та донхæры дон æххæстæй лæггад кæндзæн нæ хъæууон хæдзарады фæллойгæнджытæн.
ХУЫБИАТЫ Никъала
