Знауыры централон стадионы райдыдта районы чемпионат футболæй. Уый уагъд фæцæуы æрвылаз дæр æмæ дзы хайад райсынц районы хъæуты командæтæ. Уыдон сæрмагондæй сæхи фæцæттæ кæнынц чемпионатмæ. Ныр ерысты сæйраг призыл тох кæндзысты 9 командæйы. Чемпионаты уагæвæрдмæ гæсгæ сæ алкæцы командæ дæр иннæтимæ акæндзæн фæйнæ иу хъазты.
Чемпионаты фыццаг хъазты фембæлдысты Знауыры командæ «Юниор» æмæ Бехъмары командæ. Фембæлды размæ уагъд æрцыд цытджын церемони, цыран ирон æгъдаумæ гæсгæ æртæ уæливых æмæ бæгæныйы кæхцимæ ерысты хайадисджытæн раарфæ кодта Знауыры районы сæргълæууæг Гобозты Алан. Чемпионат байгом кæныны церемонийы ма хайад райста Фæсивæдон политикæ æмæ спорты фæдыл комитеты сæрдары хæдивæг Гасситы Сослан. Уый раарфæ кодта æвзонг футболисттæн æмæ бузныг загъта районы къухдариуæгадæн спорты размæцыдмæ сæ хъусдарды тыххæй.
Чемпионаты фыццаг очкотæ æрæмбырд кодта Бехъмары командæ, кæцы фæуæлахиз командæ «Юниор»-ыл. Ерыстæ уагъд цæудзысты æртæ къуырийы дæргъы.
ДЗЮДО
Санто-Домингойы уагъд æрцыд æфсæддонты ‘хсæн дунейы чемпионат дзюдойæ. Ерысты уæлахиздзау ссис Уæрæсейы æмбырдгонд. Командæйы æнтыстмæ стыр хайбавæрд бахаста Елбачиты Георги. Уый хæцыд 81 кг уæзы категорийы.
ХУРИТЫ Батрадз
