Донхæры доны ахадындзинад егъау кæй у, уыцы ахсджиаг хъуыддаг æмбаргæйæ, æмбæлон органтæ архайынц, цæмæй дзы хъæууон фæллойгæнджытæ алыхатт дæр хайджын уой. Цæвиттон, ивгъуыд æнусы Стыр Фыдыбæстæйон хæсты агъоммæ Хуссар Ирыстоны  уынаффæ райстæуыд, цæмæй Чъехы донхæры доны иу хайæ пайда кодтаиккой Цхинвал æмæ Знауыры районты хицæн хъæуты цæрджытæ æмæ æхсæнадон хæдзарадтæ. Уыцы ахсджиаг æмæ æнæмæнгхъæуæг уынаффæйыл стыр æхсызгондзинады æнкъарæнтимæ сæмбæлдысты цæрджытæ æмæ къанауы арæзтадон куыстыты активон хайад истой нæлгоймæгты æмрæнхъ сылгоймæгтæ дæр. Сæ сæйраг кусæнгæрзтæ та уыдысты бел æмæ джиркъа.

1941 азы Райгуырæн бæстæ кæд уæззау уавæры бахауд, уæддæр ацы арæзтад нæ ферох бынæттон органтæй. Цæвиттон, архивон æрмæджытæй куыд бæрæг у, афтæмæй 1942 азы 10 февралы Хуссар Ирыстоны облæххæстком райста уынаффæ Чъехы къанауы дарддæры арæзтады тыххæй. Уым куыд дзырæуы, уымæ гæсгæ арæзтадон куыстытæ хъæуы сног кæнын, цæмæй уыцы аз бадонхæр кæной 3600 гектары зæххы фæзуæттæ. Уый тыххæй рахицæн чындæуæд бюджетæй 850 мин сомы. Куыстыты хайад истой колхозонтæ. «Райдиан куыстытæ  бакæнæнт ахæм æмгъуыдты: а) къæдзæхджын фадыг райдайæнт 10 февралæй ; б) бетонон æмæ æфсæн-бетонон арæзтадтæ та 12 февралæй ;  в) змис, цемент æмæ хуыр та бынатмæ хæццæ кæнæд 15 февралæй. Фæстæдæр та, 1946 азы 15 ноябры дзырдæй уынаффæйы. Арæзтады кæройнаг куыстытæн рахицæн æрцыд 1. 274 мин сомы. Иугæр дон куы рацыд, уæд хисæрмагонд æмæ æхсæнадон хæдзарадты фæзындысты дыргъы æмæ сæндоны егъау фæзуæттæ æмæ уый та хуыздæрæрдæм фæзынд сæ экономикæйы рæзтыл.

Абоны бон дæр ацы доны нысаниуæг егъау у æмæ йæм æрвылаз дæр хорз хъусдард здахы Паддзахадон унитарон куыстуат «Мелиораци»-йы коллектив. Къанауы дæрддзæг æдæппæт у 42 километры æмæ хæццæ кæны суанг Уелиты хъæумæ. Цæмæй къанауы дон æнæкъуылымпыйæ цæуа, ууыл та ацы бонты зæрдиагæй архайы куыстуат. Йæ хистæр Хуыгаты Вадим куыд радзырдта, уымæ гæсгæ цалцæггæнæн æмæ сыгъдæггæнæн куыстытæм бавнæлдтой æрæджы. Куыстыты иу хай уал райдайдзысты Къостайыхъæуы ахæм бынаты, цыран къанау сыгъдæг нæ уыд 20 азæй фылдæр рæстæджы. Техникæйыл кусы, йæ хъуыддаг хорз чи зоны, ахæм – Плиты Маир. Къанау сыгъдæггæнæн куыстытæ ма æххæст кæнынц æндæр бынæтты дæр. Коллективы ныфс ис, æппæт куыстытæ дæр кæй ахицæн кæндзысты 15 апрелмæ æмæ та донæй хайджын  уыдзысты зæхкусджыты зæххытæ.

Хуыбиаты Никъала

Comments are closed, but trackbacks and pingbacks are open.