Кредит райсыны процедурæ фæхуымæтæгдæр

Хуссар Ирыстоны Æфснайæн банг фæхуымæтæгдæр кодта кредиттæ райсыны процедурæ, æмæ уымæ гæсгæ фылдæр кæны æхцаисджыты бæрц дæр.

Март æмæ апрелы мæймæ ратгæ кредитты иумæйаг бæрц уыд 155 милуан сомы. Уый ивгъуыйгæ азы уыцы рæстæгимæ абаргæйæ фылдæр у 2,5 хатты, – фехъусын кодта ИА «Рес»-æн кредитон организацийы директор Джиоты Жаннæ.

Иумæйагæй сисгæйæ, уый куыд банысан кодта, афтæмæй фæстаг мæйты гом акционерон æхсæнад «Хуссар Ирыстоны акционерон æфснайæн банг» фæфылдæр кодта цæрджытæн кредиттæ радтыны гуырахст. «Уыцы æвæрццаг динамикæ баст у кредиттæ дæттыны уавæртимæ хуыздæр кæнынимæ. Ацы азы 15 мартæй процентон ставкæ архайгæ кредиттæм гæсгæ фæкъаддæр ис 16, 5 процентæй 15 процентмæ. Афтæ ма республикæйы цæрджытæн сæ бон у æууæнкджынты фæрцы кредиттæ æхцайы фылдæр бæрцтæй райсын», – загъта Джиоты чызг.

Уый куыд банысан кодта, афтæмæй кæд иу æууæнчы лæгы фæрцы гæнæн уыд райсæн 100 мин сомы, уæд 9 апрелæй уыцы суммæ фæфылдæр ис 150 мин сомы онг. Дыууæ æууæнчы лæгы фæрцы та фæлхасадон кредитты максималон суммæ фæфылдæр ис 200 мин сомæй 300 мин сомы онг.

Джиоты Жаннæйы ныхæстæм гæсгæ, 1 июнæй фæхуымæтæгдæр уыдзæн кредит райсыны процедурæ.

Ныры онг кредит райсынæн хъуыд бирæ рæстæг хардз кæнын, æнæмæнгхъæуæг уыд хи ныффысын æмæ уый фæстæ та байдзаг кæнын æнæмæнгхъæуæг бланктæ. Уыцы процедурæтæ æфстауисæг хъуамæ рацыдаид алыгъуызон кабинетты, кæцы, кæй зæгъын æй хъæуы бæрæг зындзинæдтæ æвзарын кодта. Райдианы уал хъуамæ дæхи ныффысын кодтаис секретармæ банджы химæисæны, уыимæ фыст цыд къуыри иу хатт- къуырисæры æмæ уырдыгæй та æрвыст цыдысты кредитон хайадмæ банджы документтæ байдзаг кæныны тыххæй.

«Мах кредит райсыны процедурæмæ бахастам иуæй-иу ивындзинæдтæ. Ныр клиентæн йæ бон у банджы кредитон хайадмæ йæ паспортимæ бацæуа къуырийы мидæг дыууæ хатты – къуырисæр æмæ цыппæрæмы паспортимæ. Йæ зонæнтæ йын бахæсдзысты кредит райсыны тыххæй куырдиат бахæсджыты регистрацийы чиныгмæ æмæ уыцы хайады уый райсдзæни документы бланктæ, кæцытæ æнæмæнгхъæуæг сты бангмæ бавдисынæн кредит райсыны тыххæй», – банысан кодта кредитон организацийы директор.

Æфснайæн банг ма æркаст кредиттæ райсыны тыххæй хорз кредитон истори кæмæн ис, уый кредитты фæдыл хæстæ  фидар æмгъуыдмæ гæсгæ чи æххæст кодта, уыдоны, банк хынцдзæн радон кредит райсыны рæстæджы. Фæлæ кар, æфтиæгты бæрц æмæ æндæр домæнтæ ивд нæ цæудзысты.

Хорз кредитон истори, Æфснайæн банджы куыд загътой, афтæмæй гæнæн ис фадат радта æрмæст æфстау райсынæн нæ, фæлæ сæ льготон уавæртыл райсынæн дæр. Зæгъæм, кредит æууæнчы къаддæр лæгтимæ райсын. Афтæ ма гæнæн ис уæлæмхас кредит райсын архайгæ кредиты рæстæджы, дыккаг кредит райсыны фæдыл фыццаг æфстау æхгæд куы æрцæуа, уæд.