Конкурс – Нафийы номыл преми райсыны тыххæй

Хæрзаудæн фонд «АМОНД» (йæ саразæг – г. Самарайы амалиуæггæнджыты компани «Амонд»-ы минæвар – Хуыгаты Ростик, йæ директор – Челехсаты Хъазбег) сиды конкурс зынгæ ирон фыссæг æмæ ахуыргонд, Хетæгкаты Къостайы номыл премийы дыууæ хатты лауреат, филологон зонæдты доктор Джусойты Нафийы номыл национ литературон преми райсыны тыххæй 2018/2019 азтæн. 

Премийы нысаны æмæ йæ уагæвæрды тыххæй нæ уацхæссæг ныхас кæны Челехсаты Хъазбегимæ.

– Хъазбег, цыбыртæй нын куы радзурис премийы тыххæй.

– 2015 азы «Амонд»-ы фонды правлени фæндон рахаста, цæмæй Нафийыл 90 азы кæй сæххæст, уый охыл лæвæрд цæуа æрвыл аз дæр æртæ премийы, ирон æвзагыл фыст æмæ мыхуыргонд аивадон уыцмыстæн.

Премийы бындурæвæрджытæ æмæ расидджытæн сæ сæйраг нысан у, ирон æвзагыл чи фыссы уацмыстæ, уыдонæн сæ курдиатджындæрты фарс балæууын, цæмæй сын Фонды премийы руаджы æххуыс цæуа сæ уацмыстæ фæлдисынæн æмæ сæ мыхуыры рауадзынæн.

– Преми райсынмæ сæ уацмыстæ бавдисын кæй бафæнда, уыдон цымыдис кæндзысты йæ уагæвæрдмæ дæр…

– Нафийы номыл преми райсынмæ кандидаты хъуамæ бавдисой сфæлдыстадон цæдистæ, зонад-иртасæг уагдæттæ æмæ фæндиæгтæ хæссой премийы Фондмæ ахæм информаци бавдисгæйæ:

– премимæ кæй æвдисынц, уый цыбыр сфæлдыстадон биографи;

– фæстаг азты цы уацмыстæ сфæлдыста, уыдон нæмттæ, кæм æмæ кæд æрцыдысты мыхуыргонд æмæ сын мыхуыры цы аргъгонд æрцыдис  литературон  критикæйы.

– премимæ æвдыст цæуынц романтæ, уацаутæ, радзырдты æмбырдгондтæ, пьесæтæ, æмдзæвгæты чингуытæ.

– премимæ æвдисæг организаци йæ фыс-тæгимæ хъуамæ бавдиса ноджы , сфæлдыс-тадон Цæдисы уынаффæ цы Суагъæйы уа, уый халдих.  Фыстæгимæ ма хъуамæ уой фыссæджы уацмысы мыхуыргонд оригинал.

– æвдыст цæуынц иу авторы уацмыстæ. Коллективон фыст уацмыстæ премийы къамис тæрхонмæ нæ хæссы.

– премимæ бавдисæг уацмысы автор цы бынаты цæры, кæнæ цы бæстæйы æмбæстаг у, уымæн ницы нысаниуæг ис.                       

 – премимӕ бавдисӕн ис ӕрмӕст удæгас фысджыты куыстытӕ.

– Премиты бæрцтæ цас уыдзысты?

– Фыццаг преми -150  мин сомы; дыккаг преми -100 мин сомы; æртыккаг преми -50 мин сомы.

Конкурсы чи фæуæлахиз уа, уыдонæн премиимæ иумæ лæвæрд цæудзæн лауреаты диплом æмæ майдан (Джусойты Нафийы фæлгондз кæм ис, ахæм).

Преми лæвæрд цæудзæн цытджын уавæры, æхсæнадон кусджыты, дзыллон информацийы, культурæ æмæ зонад, литературæ æмæ аивады номдзыд минæвæртты раз.

– Цы æмгъуыдмæ ис бавдисæн уацмыстæн?

– Уацмыстæн премимæ бавдисæн ис сентябры æмбисмæ ахæм адресыл: г. Цхинвал, Исахъы уынг, 47 агъуыст, 2-аг уæладзыг, хæрзаудæн фонд «Амонд».  Тел: 8-929-805-30-94

Нæ уацх.